LECCION 44
El Todo Ba Celebracion Aceptable con Dios?
Quierre si Jehova que queda kita alegre na diaton vida y celebra pa gane tiene vez. Pero, todo ba celebracion aceptable con ele? Na este maga situacion, paquemodo kita puede dale mira el diaton amor para con Jehova?
1. Porque manada celebracion el gendeh aceptable con Jehova?
Posible espanta tu que manada celebracion el gendeh base na maga enseñanza del Biblia o estaba na maga pagano. Ese maga celebracion posible conectao na maga falso religion. Posible tiene este que hace na espiritismo o yan base na idea que el alma gendeh ta muri. El cuanto celebracion ya origina na supersticion o na idea de suerte. (Isaias 65:11) Si Jehova ya manda con el de suyu maga siervo: “No man junto kanila. No mete el maga cosa-cosa manchao” o mabuling.—2 Corinto 6:17. a
2. Cosa ta sinti si Jehova na maga celebracion donde ta dale honor con el maga gente?
Si Jehova ya habla que gendeh kita debe “confia con el poder del gente.” (Le con el Jeremias 17:5.) El cuanto maga holiday ta honra con el maga lider o maga soldao. El otro ta celebra con el maga simbolo y independiencia del nacion. (1 San Juan 5:21) Mientras el cuanto celebracion tiene que hace na politica y na campaña del maga gente. Cosa gaha sinti si Jehova si dale kita honor na un persona o un organizacion, especialmente aquellos quien ta suporta con el maga idea que contra na De Suyu proposito?
3. Cosa maga practica el puede hace gendeh aceptable con el maga celebracion?
Gendeh aceptable na Biblia el “borracherias, ambrentadas de comida y tomada.” (1 Pedro 4:3) Na cuanto celebracion, el maga gente nuay control na cuerpo y ta hace imoral cosas. Para esta amigo de Jehova, necesita kita desaleja con ese maga imoral cosas.
APRENDE PA MAS
Sabe si paquemodo tu puede hace alegre con Jehova si ta hace maga decision acerca na maga celebracion.
4. Desaleja na maga celebracion que gendeh aceptable con Jehova
Le con el Efeso 5:10 y despues, discuti con este maga pregunta:
-
Cosa kita necesita asigura si ta decidi si celebra con el un holiday?
-
Cosa maga holiday el comon na de ustedes lugar?
-
Ta mira tu, ese ba maga holiday ta hace alegre con Jehova?
Por ejemplo, cosa gaha el mirada del Dios na cumpliaño o birthday? Na Biblia, nuay record que tiene siervo de Jehova quien ya celebra cumpliaño. Pero ya menciona este acerca na dos celebracion de cumpliaño que ya celebra el maga gente quien gendeh ta sirvi con Ele. Le con el Genesis 40:20-22 y Mateo 14:6-10. Despues, discuti con este maga pregunta:
-
Cosa el comon na este dos celebracion de cumpliaño?
-
Base na este maga record na Biblia, cosa gaha ta sinti si Jehova acerca na cumpliaño?
Pero baka pensa tu, ‘Ta afecta ba gayot con Jehova si ta participa yo na un cumpliaño o otro celebracion que gendeh base na Biblia?’ Le con el Exodo 32:1-8. Despues, man play con el VIDEO y discuti con este maga pregunta.
-
Porque necesita kita asigura si cosa el aceptable con Jehova?
-
Paquemodo se kita puede hace?
Si paquemodo puede sabe si el un celebracion gendeh aceptable con Dios
-
Base ba este na enseñanza del Biblia? Para sabe, examina si onde este ya origina.
-
Ta honra ba este con el maga gente, organizacion o simbolo del nacion? Mas ta honra kita con Jehova que con otro y ta confia kita que ele el puede solva con el maga problema del mundo.
-
Tiene ba este maga practica que gendeh uyun na maga principio na Biblia? Necesita kita esta limpio na moral.
5. Ayuda con otro que respeta con el cosa tu ta creé
Posible, dificil resisti si el otro ta man pressure contigo que participa na maga celebracion que gendeh aceptable con Jehova. Explica con el de tuyu decision con paciencia y respeto. Para mira un ejemplo si paquemodo este hace, man play con el VIDEO.
Le con el Mateo 7:12 y despues, discuti con este maga pregunta:
-
Base na este texto, debe ba tu habla con el de tuyu familia quien gendeh Testigo de Jehova que gendeh sila debe celebra con el un holiday?
-
Cosa tu hace para asigura con el de tuyu familia que maskin gendeh tu ta celebra junto kanila, ta ama tu y ta aprecia kanila?
6. Quierre si Jehova que queda kita alegre
Quierre si Jehova que queda kita alegre junto con el diaton maga familia y amigo. Le con el Eclesiastes 8:15 y despues, discuti con este pregunta:
-
Paquemodo este texto ta dale mira que quierre si Jehova que queda kita alegre?
Quierre si Jehova que el de suyu maga siervo tiene alegria mientras ta man junto-junto. Man play con el VIDEO para sabe si paquemodo este claro ta puede mira na diaton maga internacional convencion.
Le con el Galacia 6:10 y despues, discuti con este maga pregunta:
-
Necesita ba kita celebra maga holiday para ‘hace bueno’ con otro?
-
Cosa contigo puede hace mas alegre—si obligao tu dale cay holiday o si ta dale tu cay quierre tu?
-
Manada maga Testigo de Jehova ta hace tiene vez maga especial cosas para na diila maga anak y ta dale kanila maga regalo. Si tiene tu maga anak, cosa cuanto especial cosas el puede tu hace para kanila?
EL CUANTO TA HABLA: “Gendeh importante si onde ya origina el un holiday. El importante amo que queda kita alegre junto con el diaton maga familia y amigo.”
-
Cosa tu puede habla?
SUMARIO
Quierre si Jehova que queda kita alegre junto con el diaton familia y maga amigo. Pero, quierre tambien le que evita kita con el maga celebracion que gendeh aceptable con ele.
Repaso
-
Cosa maga pregunta kita puede usa para determina si aceptable ba con Jehova el un celebracion?
-
Paquemodo kita ayuda con el diaton familia y amigo para entende con el diaton decision acerca na maga holiday?
-
Porque tu puede habla que quierre si Jehova que tene kita alegria?
SABE PA MAS
Considera con el cuanto especifico holiday que el maga Cristiano gendeh ta celebra.
Sabe el cuatro razon si porque kame ta creé que el celebracion de cumpliaño gendeh aceptable con Dios.
“Porque Gendeh Ta Celebra Cumpliaño el Maga Testigo de Jehova?” (Articulo na website)
Mira si paquemodo el maga bata quien ta ama con Jehova puede hace alegre con ele na tiempo de holiday.
Millones de maga Cristiano el gendeh ta celebra Pascua. Cosa sila ta sinti na diila decision?
“Ya Puede Sila Incuntra un Cosa que Mas Bueno” (The Watchtower, Deciembre 1, 2012)
Baka Gusta Tambien Tu
MAGA COMON PREGUNTA
Cosa el Bible Study que Ta Ofrece el Maga Testigo de Jehova?
Na programa de Bible study que ta ofrece el maga Testigo de Jehova, puede tu usa maskin cosa translation de Biblia. Puede tu invita con el de tuyu entero familia o maskin quien amigo para man junto contigo.
