Ya enseña si Jesus que el de suyu maga siguidores debe ‘gendeh parte del mundo.’ (Juan 15:19) Necesita kita queda neutral que quierre decir gendeh kita debe suporta na maga politica y guerra. El deverasan, gendeh pirmi facil queda neutral. Posible gangguia kanaton el otro por causa con este. Paquemodo kita esta neutral y queda leal con Dios Jehova?

1. Cosa el mirada del maga deverasan Cristiano na maga gobierno del gente?

Ta respeta el maga Cristiano con el gobierno. Ta hace kita el cosa ya habla si Jesus: “Devolve ustedes con Caesar el cosa de Caesar.” (Marcos 12:17) Este quierre decir que ta obedece kita con el maga ley del gobierno igual na maga ley acerca na pagada de tax o impuesto. El Biblia ta enseña que ta rula el maga gobierno del gente por causa lang cay ta permiti kanila si Jehova. (Roma 13:1) Poreso sabe kita que limitao lang el autoridad del maga gobierno del gente. Ta esperanza kita que el Dios y el de suyu Reino na cielo amo el solva con el maga problema del maga gente.

2. Paquemodo kita puede dale mira que neutral kita?

Igual con Jesus, gendeh kita ta participa na politica. Cuando ya mira el maga gente con Jesus que ya hace un milagro, ya pricura sila hace rey con ele aqui na tierra. Pero, nuay le permiti kanila. (Juan 6:​15) Porque? Cay como cosa ele ya habla na uliji, “el dimio Reino gendeh de este mundo.” (Juan 18:36) Como maga dicipulo de Jesus, ta dale kita mira diaton neutralidad na manada manera. Por ejemplo, gendeh kita ta participa na guerra. (Le con el Miqueas 4:3.) Ta respeta kita con el maga simbolo del nacion​​—igual na bandera​​—pero gendeh kita ta adora con ese. (1 San Juan 5:​21) Y gendeh kita ta suporta o ta man contra con el maskin cosa partido o maskin quien candidato na politica. Na este y otro pa maga manera, ta dale kita mira que leal gayot kita na gobierno del Dios​​—el de suyu Reino.

 APRENDE PA MAS

3. Neutral el maga deverasan Cristiano

Si Jesus y de suyu maga siguidores ya dale mira buen ejemplo para kanaton. Le con el Roma 13:​1, 5-7 y 1 Pedro 2:​13, 14. Despues, man play con el VIDEO y discuti con este maga pregunta.

• Porque kita debe respeta con el maga gobierno del gente?

• Na cosa maga manera kita ta dale mira que ta somete kita kanila?

Si tiene guerra, el cuanto maga nacion posible ta clama que neutral sila pero ta asisti sila con el maga grupo na ese guerra. Cosa el deverasan neutralidad? Le con el Juan 17:16. Despues, man play con el VIDEO y discuti con este pregunta.

• Cosa quierre decir que queda neutral?

Paquemodo si ta manda contigo el gobierno que hace un cosa que contra na ley del Dios? Le con el Maga Actividad 5:​28, 29. Despues, man play con el VIDEO y discuti con este maga pregunta.

• Si gendeh uyun el ley del gente na ley del Dios, de quien ley kita debe obedece?

• Na cosa gaha maga situacion el maga Cristiano gendeh hay obedece con el maga secular autoridad?

 4. Queda neutral na pensamiento y accion

Le con el 1 San Juan 5:​21, NWT. Despues, man play con el VIDEO y discuti con este maga pregunta.

• Na video, porque ya decidi si Ayenge que gendeh queda parte del partido na politica o participa na maga nacionalistico ceremonia igual como saluda na bandera?

• Ta mira tu, bueno ba el de suyu decision?

Na cosa otro maga situacion posible pone na probanza con el diaton neutralidad? Man play con el VIDEO y despues, discuti con este maga pregunta.

• Paquemodo kita esta neutral si ta mira maga juego del maga atleta quien estaba na diferente maga nacion?

• Paquemodo kita esta neutral maskin pa personal kita afectao na maga decision del maga politico?

• Paquemodo el maga noticia o maga con quien kita ta asocia puede afecta con el diaton neutralidad?

 SUMARIO

El maga Cristiano ta hace gayot esfuerzo para queda neutral na politica na diila pensamiento, palabra y accion.

Repaso

• Cosa debe el diaton mirada na gobierno del gente?

• Porque kita ta esta neutral na politica?

• Na cosa maga situacion posible pone na probanza con el diaton neutralidad?