LECCION 46
Porque Dedica y Bautiza?
Si ta dedica tu de tuyu vida con Jehova, ta promete tu con ele por medio na rezo que con ele lang tu hay adora y pone tu una na de tuyu vida el de suyu voluntad. (Salmo 40:8) Despues con ese hace, puede ya tu bautiza. Na ese manera, ta dale tu mira con otro que ya puede ya tu hace el de tuyu dedicacion. El decision que dedica con el de tuyu vida con Jehova amo el de con todo importante decision que puede tu hace. Hay cambia este con el de tuyu vida. Cosa posible manda move contigo para hace este decision?
1. Cosa el manda move con el un persona para dedica el de suyu vida?
El diaton amor amo ta manda move para dedica kita con el diaton vida con Jehova. (1 San Juan 4:10, 19) El Biblia ta anima kanaton: “Ama con el Señor, el dituyo Dios con todo el dituyo corazon, con todo el dituyo alma, con todo el dituyo pensamiento y con todo el dituyo fuerza.” (Marcos 12:30) Ta dale kita mira el diaton amor con Dios gendeh lang por medio na palabra sino na cosa tambien kita ta hace. Igual con el man novio y novia que ta casa cay ta ama sila con uno y otro, el diaton amor para con Jehova amo ta manda move kanaton para dedica el diaton vida con ele y bautiza.
2. Cosa maga bendicion ta dale si Jehova con el de suyu maga bautizao siervo?
Si bautiza tu, hay queda tu parte del alegre familia de Jehova. Hay puede tu experiencia el de suyu amor na manada manera y hay queda tu mas cerca con ele. (Le con el Malaquias 3:16-18.) Puera que queda si Jehova de tuyu Tata, hay tene tu maga espiritual hermano y hermana na entero mundo quien ta ama con ele y contigo. (Le con el Marcos 10:29, 30.) Siempre, necesita tu hace cuanto cosas antes tu puede bautiza. Necesita tu aprende acerca con Jehova, ama con ele y tene fe na de suyu Anak. Despues, necesita tu dedica el de tuyu vida con Jehova. Si hace tu se maga cosas y despues bautiza, hay tene tu oportunidad vivi hasta para cuando. El Palabra del Dios ta habla: ‘El bautismo ta salva con ustedes ahora.’—1 Pedro 3:21.
APRENDE PA MAS
Examina si porque importante que dedica tu el de tuyu vida con Jehova y bautiza.
3. Todo kita debe iscuji si con quien kita sirvi
Na Israel de antes, el cuanto maga gente ta pensa que puede sila adora con Jehova mientras ta adora tambien con el falso dios, si Baal. Poreso, ya imbia si Jehova con el de suyu profeta, si Elias, para corecta kanila. Le con el 1 Rey 18:21 y despues, discuti con este pregunta:
-
Cosa decision necesita hace el maga Israelita?
Igual con el maga Israelita, kita tambien debe iscuji si con quien kita sirvi. Le con el Lucas 16:13 y despues, discuti con este maga pregunta:
-
Porque kita gendeh puede adora con Jehova mientras ta adora tambien con otro?
-
Paquemodo kita puede dale mira con Jehova que ta iscuji kita adora con ele?
4. Medita con el amor de Jehova para contigo
Si Jehova ya dale kanaton manada precioso regalo. Cosa kita puede dale con ele? Man play con el VIDEO.
Na cosa maga manera si Jehova ya dale mira amor contigo? Le con el Salmo 104:14, 15 y 1 San Juan 4:9, 10, y despues, discuti con este maga pregunta:
-
Cosa maga regalo estaba con Jehova el ta aprecia gayot tu?
-
Cosa tu ta sinti para con Jehova por causa con ese maga regalo?
Si ya ricibi kita un regalo que ta gusta gayot kita, quierre kita dale mira apresacion con el quien ya dale con ese. Le con el Deuteronomio 16:17 y despues, discuti con este pregunta:
-
Si ta considera tu el todo cosa ya hace si Jehova para contigo, cosa se ta manda move contigo para dale con ele?
5. El dedicacion ta resulta na manada bendicion
Manada gente ta creé que queda sila alegre si popular sila, tiene prominente trabajo o manada sen. Deverasan ba se? Man play con el VIDEO y despues, discuti con este maga pregunta.
-
Maskin el atleta na video quierre-quierre juga soccer, porque le ya deja con ese?
-
Ya decidi le que dedica de suyu vida, gendeh na soccer, sino con Jehova. Ta mira tu, justo ba el de suyu decision? Porque?
Antes queda un Cristiano si apostol Pablo, tiene le prominente trabajo. Ya estudia le con el maga ley del maga Judio junto con el un conocido maestro. Pero ya deja se ele para queda un Cristiano. Ya arripinti ba si Pablo con el de suyu decision? Le con el Filipo 3:8 y despues, discuti con este maga pregunta:
-
Porque si Pablo ya habla que “igual como basura” el todo cosa le ya hace antes le queda un Cristiano?
-
Pero, cosa le ya tiene por causa na de suyu decision?
-
Cosa tu puede habla acerca na servicio con Jehova si compara na otro cosas que puede tu hace na de tuyu vida?
Cuando ya queda Cristiano si Pablo, mas grande el cosa le ya tene contra na cosa le ya deja
EL CUANTO TA HABLA: “Sabe yo este el verdad. Pero gendeh yo puede dedica el de mio vida con Dios.”
-
Ta mira tu, porque justo lang que dedica tu el de tuyu vida con Jehova?
SUMARIO
El amor amo ta manda move kanaton para dedica el diaton vida con Jehova y bautiza.
Repaso
-
Porque si Jehova conviene ricibi el diaton con todo corazon amor y adoranza?
-
Paquemodo si Jehova ta bendici con el de suyu maga bautizao siervo?
-
Quierre ba tu dedica el de tuyu vida con Jehova?
SABE PA MAS
Mira si porque el un singer y el un atleta ya iscuji dedica el diila vida con Jehova.
Pregunta del Maga Jovenes—Cosa Yo Hay Hace na De Mio Vida?—El De Mio Vida de Antes (6:54)
Considera con el cuanto pa maga razon para dedica el de tuyu vida con Jehova.
“Porque Dedica De Tuyu Mismo Cuerpo con Jehova?” (The Watchtower, Enero 15, 2010)
Na este music video, mira el alegria de aquellos quien ya dedica el diila vida con Jehova.
Na istoria “Ya Dura Ya Yo Ta Pensa, ‘Porque Kita Taqui?’” mira si cosa ya manda move con el un mujer para examina con el de suyu prioridad.
“El Biblia Puede Cambia con el Vida” (The Watchtower, Noviembre 1, 2012)
Baka Gusta Tambien Tu
MAGA COMON PREGUNTA
Cosa el Bible Study que Ta Ofrece el Maga Testigo de Jehova?
Na programa de Bible study que ta ofrece el maga Testigo de Jehova, puede tu usa maskin cosa translation de Biblia. Puede tu invita con el de tuyu entero familia o maskin quien amigo para man junto contigo.
