LECCION 51
Paquemodo Tu Puede Hace Alegre con Jehova na De Tuyu Converzada?
Cuando ya crea kanaton si Jehova, ya dale le kanaton un bonito regalo—el abilidad para converza. Importante ba para con ele si paquemodo kita ta usa con ese regalo? Si! (Le con el Santiago 1:26.) Paquemodo kita puede usa con ese abilidad na manera que ta hace alegre con Jehova?
1. Paquemodo kita debe usa con el diaton converzada?
El Biblia ta habla kanaton que “necesita [kita] dale animo con uno y otro, y man ayudajan para puede crici na fe.” (1 Tesalonica 5:11) Tiene ba tu conoce con quien tu necesita dale animo? Cosa tu puede hace para sinti sila alivio? Habla kanila que importante sila contigo. Puede tu menciona si cosa tu ta aprecia kanila. Cosa texto gaha el puede ayuda kanila? Manada texto na Biblia el puede tu usa. Acorda tambien que el manera si paquemodo tu ta habla el un cosa puede tambien anima con otro. Poreso, pirmi converza na buen y amable manera.—Proverbio 15:1.
2. Cosa kita debe evita na diaton converzada?
El Biblia ta habla: “No ustedes habla malo.” (Le con el Efeso 4:29.) Este quierre decir que gendeh kita debe usa maga mal palabra o habla cosas gendeh bueno para hace sinti duele con otro. Gendeh tambien kita debe man chismis o hace malo con otro.—Le con el Proverbio 16:28.
3. Cosa hay ayuda para el diaton converzada puede anima con otro?
Mas mucho, el cosa kita ta habla ta revela si cosa el na diaton corazon o pensamiento. (Lucas 6:45) Poreso, necesita kita man train con el diaton mismo cuerpo para man focus na maga cosas que recto, limpio, amable y bueno. (Filipo 4:8) Para puede se hace, necesita kita iscuji enbuenamente con el diaton entretenimiento y maga amigo. (Proverbio 13:20) Puede tambien kanaton ayuda si pensa kita antes converza. Considera si cosa sinti el otro na de tuyu maga palabra. El Biblia ta habla: “El converzada que nuay pensa igual como maga lanciada de espada, pero el lenggua del un sabio ta cura.”—Proverbio 12:18.
APRENDE PA MAS
Aprende si paquemodo converza na manera que ta hace alegre con Jehova y ta anima con otro.
4. Controla con el de tuyu converzada
Tiene vez, ta puede kita habla maga cosas que ta arripinti kita na uliji. (Santiago 3:2) Le con el Galacia 5:22, 23 y despues, discuti con este maga pregunta:
-
Cosa na este maga calidad el puede tu pidi na rezo para ayuda contigo controla con el de tuyu converzada? Paquemodo este maga calidad puede ayuda contigo?
Le con el 1 Corinto 15:33 y despues, discuti con este pregunta:
-
Paquemodo el de tuyu maga amigo y entretenimiento puede afecta con el de tuyu converzada?
Cosa puede influencia con el manera si paquemodo tu ta converza?
Le con el Eclesiastes 3:1, 7 y despues, discuti con este pregunta:
-
Cuando posible mas bueno que esta silencio o espera con el justo tiempo para converza?
5. Habla buen cosas acerca con otro
Paquemodo kita puede evita hace sinti duele con otro o habla maga cosas gendeh bueno? Man play con el VIDEO y despues, discuti con el maga pregunta.
-
Na video, porque el hermano quierre cambia con el manera si paquemodo le tan cuento acerca con otro?
-
Cosa le ya hace para cambia?
Le con el Eclesiastes 7:16 y despues, discuti con este pregunta:
-
Cosa kita debe acorda si ta pensa kita habla negativo cosas acerca con otro?
Le con el Eclesiastes 7:21, 22 y despues, discuti con este pregunta:
-
Paquemodo este maga texto puede ayuda contigo para gendeh rabia si tiene quien ya habla negativo cosas acerca contigo?
6. Converza con el de tuyu familia na amable manera
Quierre si Jehova que converza kita con el diaton familia na buen y amable manera. Man play con el VIDEO y despues, discuti con el pregunta.
-
Cosa puede ayuda contigo para converza con el de tuyu familia na amable manera?
Le con el Efeso 4:31, 32 y despues, discuti con este pregunta:
-
Paquemodo kita puede converza na manera que puede anima con el diaton familia?
Ya habla si Jehova si cosa le ta sinti acerca con el de suyu Anak, si Jesus. Le con el Mateo 17:5 y despues, discuti con este pregunta:
-
Paquemodo tu puede imita con Jehova si ta converza tu con el de tuyu familia?
Busca maga oportunidad para comenda con otro
EL CUANTO TA HABLA: “Ta habla lang yo el cosa yo ta pensa. Nuay yo queber si no quierre el otro el cosa yo ta habla.”
-
Uyun ba tu con ese? Porque?
SUMARIO
Tiene poder el maga palabra. Necesita kita pensa enbuenamente si cosa kita habla, si cuando y si paquemodo kita se habla.
Repaso
-
Na cosa maga manera tu puede usa con el de tuyu converzada para ayuda con otro?
-
Cosa clase de converzada tu quierre evita?
-
Cosa puede ayuda kanaton para pirmi puede converza na buen manera y para puede anima con otro?
SABE PA MAS
Cosa puede ayuda kanaton para queda positivo na diaton converzada?
Aprende si cosa puede ayuda contigo para evita usa maga mal palabra.
“Malo Ba Gayot Habla Maga Mal Palabra?” (Articulo na website)
Mira si paquemodo tu puede evita con el tendencia que man chismis.
Sabe si paquemodo si Jehova ya ayuda con el un persona para descanza usa maga mal palabra.
Baka Gusta Tambien Tu
MAGA COMON PREGUNTA
Cosa el Bible Study que Ta Ofrece el Maga Testigo de Jehova?
Na programa de Bible study que ta ofrece el maga Testigo de Jehova, puede tu usa maskin cosa translation de Biblia. Puede tu invita con el de tuyu entero familia o maskin quien amigo para man junto contigo.
