Otro-otro el cosa kita quierre si acerca na mudada y ichura. Si sigui kita con el cuanto principio na Biblia, puede kita bisti con el cosa kita quierre y hace tambien alegre con Jehova. Considera kita con el cuanto maga principio.

1. Cosa maga principio kita debe sigui si ta iscuji camisa y mudada?

Debe kita “usa camisa decente y bisti na un manera humilde y modesto” y con buen pensamiento. Necesita tambien kita mentena limpio el diaton ichura que ta reflecta el diaton devocion con Dios. (1 Timoteo 2:​9, 10) Considera con este cuatro principio: (1) El diaton camisa debe “decente.” Como cosa tu ya observa na maga miting, el maga siervo de Jehova tiene diferente maga mudada y estilo de pelo pero ta dale siempre se mira respeto con el diaton Dios. (2) Si “modesto” el diaton mudada, quierre decir ta evita kita usa maga ropa que ta causa con otro para pensa mal cosas o ta saca atencion del otro. (3) Ta dale kita mira que ta muda kita con buen pensamiento si gendeh kita ta sigui con el maga popular estilo de mudada. (4) El diaton ichura debe pirmi ta reflecta con el diaton devocion con Dios para puede dayun mira el otro que ta adora kita con el verdadero Dios.​​—1 Corinto 10:31.

2. Paquemodo el diaton ichura y mudada puede afecta con el diaton maga hermano y hermana?

Maskin puede kita iscuji si cosa kita quierre usa, debe kita considera si cosa el efecto de este con otro. Ta hace kita el todo para gendeh ofende con maskin quien y “hace alegre con [el diaton] maga vicinos y ayuda canila para ay queda sila mas fuerte na diila fe.”​​—Le con el Roma 15:​1, 2.

3. Paquemodo el diaton mudada puede causa con otro para queda interesao aprende acerca con Jehova?

Pirmi kita ta pricura muda decente pero mas con cuidao kita na diaton mudada na maga miting y na ministerio. No quierre kita que perde el atencion del otro na importante mensaje por causa na diaton mudada. Sino, quierre kita que el diaton mudada puede causa kanila para queda interesao na verdad y dale “honor con el doctrina del diaton Dios.”​​—Tito 2:​10.

 APRENDE PA MAS

4. El decente mudada ta dale mira respeto con Jehova

Cosa el de con todo importante razon si porque kita debe asigura que decente el diaton mudada? Le con el Salmo 47:2 y despues, discuti con este maga pregunta:

• Ciendo ta representa kita con Jehova, paquemodo se debe afecta na diaton maga decision acerca na mudada?

• Importante ba gayot el diaton mudada si ta atende miting y ta participa na ministerio? Porque?

 5. Si paquemodo hace maga buen decision acerca na mudada y ichura

Man play con el VIDEO.

Caro man o barato el diaton maga camisa, debe limpio este y propio para na cada ocasion. Le con el 1 Corinto 10:24 y 1 Timoteo 2:​9, 10. Despues, discuti si porque kita debe evita el mudada que . . .

• gendeh limpio o sobra de gendeh formal.

• bien ipit o ta causa con otro para pensa cosas malo.

El maga Cristiano gendeh necesita sigui con el Ley de Moises pero puede sila sabe aqui si cosa el mirada de Jehova. Le con el Deuteronomio 22:5 y despues, discuti con este pregunta:

• Porque kita debe evita con el mudada y ichura que ta hace con el hombre dol mujer o con el mujer que dol hombre?

Le con el 1 Corinto 10:​32, 33 y 1 San Juan 2:​15, 16, y despues, discuti con este maga pregunta:

• Porque kita debe considera el efecto del diaton mudada na comunidad o na congregacion?

• Cosa maga estilo de mudada y ichura el comon na lugar donde tu ta queda?

• Para contigo, el cuanto ba de ese maga estilo posible gendeh justo para na un Cristiano? Porque?

 SUMARIO

Si ta puede kita hace justo decision acerca na diaton mudada y ichura, ta dale kita mira respeto con Jehova y con otro.

Repaso

• Porque el diaton mudada y ichura importante para con Jehova?

• Cosa el cuanto maga principio que puede ayuda kanaton hace maga decision acerca na diaton mudada?

• Paquemodo el diaton mudada puede afecta con el mirada del otro con Jehova?