Si Jesus el Cabeza del Cristiano congregacion. (Efeso 5:​23) Estaba na cielo, si Jesus ta guia ahora con el de suyu maga siguidores na tierra por medio del “fiel y sabio esclavo.” (Le con el Mateo 24:​45, NWT.) Cay si Jesus mismo el ya iscuji con ese “esclavo,” tiene ese autoridad para hace cuanto decision. Pero, debe siempre ese esclavo obedece con el Cristo y sirvi con el maga hermano del Cristo. Quien se esclavo? Paquemodo ese esclavo ta cuida kanaton?

1. Quien el “fiel y sabio esclavo”?

Desde antes, si Jehova ya usa maga hombre o un grupo de maga hombre para dale direccion con el de suyu maga siervo. (Malaquias 2:7; Maga Hebreo 1:1) Despues del muerte de Jesus, el maga apostoles y el maga anciano na Jerusalem amo el ya guia con el maga siervo del Dios. (Maga Actividad 15:2) Ahora na igual manera, un diutay grupo de maga anciano​​—el Cuerpo Gobernante del maga Testigo de Jehova​—el ta dale espiritual comida y ta guia con el trabajo predicacion. Este grupo amo el ‘fiel y sabio esclavo con quien si Jesus ya encarga.’ (Mateo 24:45a, NWT) Todo miembro del Cuerpo Gobernante amo maga iscujido Cristiano quien tiene el esperanza que junto rula con el Cristo na Reino na cielo despues el diila vida aqui na tierra.

2. Cosa espiritual comida el ta dale el fiel esclavo?

Ya habla si Jesus que el fiel esclavo hay ‘dale come con el diila maga uban Cristiano na justo tiempo.’ (Mateo 24:45b, NWT) Igual si paquemodo el comida que ta come kita ta ayuda kanaton para esta mafuerza y tiene buen salud, el espiritual comida​​—el instruccion estaba na Palabra del Dios—​ta dale kanaton el fuerza que necesita para puede kita esta leal con Jehova y hace con el trabajo que ya manda kanaton si Jesus. (1 Timoteo 4:6) Ta ricibi kita con ese espiritual comida por medio na maga miting, asemblea y convencion, y tambien por medio na maga publicacion y video que base na Biblia que ta ayuda kanaton para entende el voluntad del Dios y hace fuerte el diaton relacion con ele.

 APRENDE PA MAS

3. Debe organizao el maga siervo de Jehova

Bajo na direccion de Jesus, el Cuerpo Gobernante ta organiza con el trabajo del maga Testigo de Jehova. Semejante tambien se na arreglamiento na tiempo del maga Cristiano del primer siglo. Man play con el VIDEO.

Le con el 1 Corinto 14:​33, 40 y despues, discuti con este pregunta:

• Paquemodo este maga texto ta dale mira que quierre si Jehova que organizao el de suyu maga Testigo?

4. El fiel esclavo ta organiza con el diaton trabajo predicacion

El predicacion amo el de con todo importante trabajo que ya hace el maga primer Cristiano. Le con el Maga Actividad 8:​14, 25 y despues, discuti con este maga pregunta:

• Na tiempo del maga primer Cristiano, quien el ya guia con el trabajo predicacion?

• Cosa ya hace si Pedro y Juan con el instruccion que ya ricibi sila estaba na diila maga uban apostoles?

El predicacion amo el de con todo importante trabajo que ta organiza el Cuerpo Gobernante. Man play con el VIDEO.

 Ya hace claro si Jesus si paquemodo de importante el trabajo predicacion. Le con el Marcos 13:10 y despues, discuti con este maga pregunta:

• Porque bien importante para na Cuerpo Gobernante el trabajo predicacion?

• Porque kita necesita con el “fiel y sabio esclavo” para organiza con este trabajo na entero mundo?

5. El fiel esclavo ta dale direccion

El Cuerpo Gobernante ta dale direccion para na maga Cristiano na entero mundo. Paquemodo este ta decidi si cosa direccion dale? Considera si cosa ya hace el cuerpo gobernante del maga primer Cristiano. Le con el Maga Actividad 15:​1, 2 y despues, discuti con este maga pregunta:

• Cosa problema ya tiene el maga primer Cristiano?

• Con quien ya anda kanda Pablo, Bernabe y el otro para arregla con el problema?

Le con el Maga Actividad 15:​12-​18, 23-​29 y despues, discuti con este pregunta:

• Antes hace un decision, cosa ya considera el cuerpo gobernante cuando ta busca sila el guia del Dios acerca na problema?​​—Mira con el versiculo 12, 15 y 28.

Le con el Maga Actividad 15:​30, 31 y 16:​4, 5, y despues, discuti con este maga pregunta:

• Cosa ya hace el maga primer Cristiano na direccion que ya dale el cuerpo gobernante?

• Paquemodo si Jehova ya bendici con el diila obediencia?

Le con el 2 Timoteo 3:​16 y Santiago 1:​5, y despues, discuti con este pregunta:

• Onde el Cuerpo Gobernante ta busca guia si ta hace maga decision ahora?

 SUMARIO

El Cuerpo Gobernante amo el “fiel y sabio esclavo” que ya iscuji el Cristo. Sila el ta dale direccion y espiritual comida na maga Cristiano na entero mundo.

Repaso

• Quien el ya iscuji con el “fiel y sabio esclavo”?

• Paquemodo el Cuerpo Gobernante ta cuida kanaton?

• Ta creé ba tu que el Cuerpo Gobernante amo el “fiel y sabio esclavo”?