Si junto kita con el diaton maga hermano y hermana, ta sinti kita el cosa ya sinti si Rey David: “Bien bueno y bonito que el maga hermano tan junto-junto que tiene unidad!” (Salmo 133:1) Gendeh kita automatico ta tiene unidad. El cada uno kanaton ta hace con el diaton papel para mentena con este.

1. Cosa el bonito na maga siervo del Dios?

Si atende tu miting na otro lugar, posible gendeh tu entende con el lengguaje pero queda siempre tu comfortable. Porque? Cay maskin donde, ta estudia kita con el Biblia usando el igual maga publicacion. Mas pa, ta pricura kita dale mira amor. Maskin onde kita ta queda, todo kita ta “llama con el nombre de Jehova, para sirvi con ele con unidad.”​​—Sofonias 3:​9, footnote.

2. Cosa tu puede hace para mentena con el unidad?

“Ama deverasan con uno y otro y con todo el corazon.” (1 Pedro 1:​22) Paquemodo tu aplica con este? En vez de man focus na imperfeccion del otro, mira con el diila maga buen calidad. No man junto con aquellos lang quien tiene semejante interes igual contigo. Pricura conoce con el maga hermano quien diferente el background. Puede kita hace esfuerzo para quita con el sentido de discriminacion.​​—Le con el 1 Pedro 2:​17, NWT. a

3. Cosa tu hace si tiene tu problema na un hermano o hermana?

Unido kita pero imperfecto. Tiene vez puede kita hace luya o hace pa gane sinti duele con otro. Poreso, el Palabra del Dios ta habla kanaton: “Perdona con uno y otro . . . igual como ya perdona el Señor con ustedes.” (Le con el Colosa 3:​13.) Ta puede kita hace sinti duele manada beses con Jehova pero ta perdona siempre le kanaton. Poreso ta expecta le que perdona kita con el diaton maga hermano. Si ya realiza tu que ya puede tu hace sinti duele con otro, hace manera para arregla con el problema.​​—Le con el Mateo 5:​23, 24. b

 APRENDE PA MAS

4. Quita con el sentido de discriminacion

Quierre kita ama con el todo diaton maga hermano. Pero baka tan dificil kita acepta con aquellos quien dol diferente kanaton. Cosa puede ayuda kanaton? Le con el Maga Actividad 10:​34, 35 y despues, discuti con este maga pregunta:

• Ta acepta si Jehova con el todo clase de gente para queda de suyu maga Testigo. Paquemodo este debe afecta con el de tuyu mirada con otro quien tiene diferente background?

• Cosa clase de discriminacion que comon na de ustedes lugar el quierre tu evita?

Le con el 2 Corinto 6:​11-​13 y despues, discuti con este pregunta:

• Ta mira tu, paquemodo tu puede queda cerca con el maga hermano y hermana quien tiene diferente background?

5. Perdona y pricura tene paz

Ta perdona kanaton si Jehova maskin gendeh le necesita el diaton perdon. Le con el Salmo 86:5 y despues, discuti con este maga pregunta:

• Cosa el texto ta habla acerca na perdon de Jehova?

• Porque tu ta aprecia con el de suyu perdon?

• Na cosa maga situacion kita posible man dificil que mentena con el paz con otro?

Paquemodo kita imita con Jehova y esta unido con el diaton maga hermano y hermana? Le con el Proverbio 19:11 y despues, discuti con este pregunta:

• Si tiene ya hace consumi o ya hace sinti duele contigo, cosa tu puede hace para queda bueno el situacion?

 Tiene vez ta puede kita hace sinti duele con otro. Si sucede se, cosa kita debe hace? Man play con el VIDEO y despues, discuti con el pregunta.

• Na video, cosa ya hace el hermana para tene paz?

 SUMARIO

Puede tu ayuda mentena con el unidad na congregacion si perdona tu y dale mira amor con todo maga hermano y hermana.

Repaso

• Paquemodo tu puede quita con el sentido de discriminacion?

• Cosa tu hace si tiene tu problema na un hermano o hermana?

• Porque tu quierre imita el ejemplo de Jehova si ta perdona con otro?