LECCION 57
Paquemodo si Ya Comete Tu un Serioso Culpa?
Maskin ta ama gayot tu con Jehova y ta pricura evita con el maskin cosa que puede hace sinti duele con ele, man kamali siempre tu tiene vez. Pero tiene maga culpa que mas serioso que con otro. (1 Corinto 6:9, 10) Si ya comete tu un serioso culpa, acorda que si Jehova ta ama siempre contigo; preparao le perdona y ayuda contigo.
1. Cosa kita debe hace para perdona kanaton si Jehova?
Aquellos quien ta ama con Jehova ta sinti bien triste si ya comete sila un serioso culpa. Pero ta comforta kanila si Jehova por medio na de suyu promesa na de suyu maga siervo: “Maskin pa el de ustedes maga culpa bien colorao, este hay queda blanco igual na nieve.” (Isaias 1:18) Si sincero kita arripinti, si Jehova hay perdona gayot kanaton. Cosa el arripintimiento? Este quierre decir que ta sinti gayot kita triste, gendeh mas kita ta hace otravez el cosas malo y ta pidi kita con Jehova que perdona kanaton. Mas pa, ta hace kita esfuerzo para cambia con el diaton mal pensamiento o custumbre que ya causa kanaton para culpa, y ta pricura kita sigui con el maga principio de Jehova.—Le con el Isaias 55:6, 7.
2. Paquemodo si Jehova ta usa con el maga anciano para ayuda kanaton si ta culpa kita?
Si ya comete kita serioso culpa, si Jehova ta manda kanaton “llama con el maga Anciano.” (Le con el Santiago 5:14, 15.) Este maga anciano ta ama con Jehova y con el de suyu maga carnero. Cualificao sila que ayuda kanaton para tene kita otravez buen relacion con Jehova.—Galacia 6:1.
Paquemodo el maga anciano hay ayuda kanaton si ya comete kita un serioso culpa? Tiene dos o tres anciano quien hay corecta kanaton usando el maga consejo na Biblia. Hay dale tambien sila kanaton maga practical sugestion y consejo para ayuda kanaton evita culpa otravez. Para protege con el congregacion, el maga anciano ta quita na congregacion con maskin quien que ya comete serioso culpa y gendeh ta arripinti.
APRENDE PA MAS
Hace hondo con el de tuyu apresacion na manera si paquemodo si Jehova ta ayuda kanaton si ya comete kita serioso culpa.
3. Grande ayuda kanaton si admiti kita
Ta hace kita sinti duele con Jehova si ta culpa kita poreso justo lang que con ele kita admiti el diaton culpa. Le con el Salmo 32:1-5 y despues, discuti con este pregunta:
-
Porque bueno para kanaton que admiti el diaton culpa con Jehova en vez de esconde con ese?
Puera que admiti con Jehova, hay sinti tambien kita alivio si pidi kita ayuda na maga anciano. Man play con el VIDEO y despues, discuti con el pregunta.
-
Na video, paquemodo el maga anciano ya ayuda con Canon para bira con Jehova?
Necesita kita habla el todo y queda honesto na maga anciano; talli sila para ayuda kanaton. Le con el Santiago 5:16 y despues, discuti con este pregunta:
-
Porque mas facil para na maga anciano que ayuda kanaton si honesto kita?
Admiti el de tuyu culpa, queda honesto na maga anciano y acepta el ayuda de Jehova
4. Ta dale mira lastima si Jehova con aquellos quien ya culpa
Si el un persona quien ya comete serioso culpa no quierre mas sigui con el maga principio de Jehova, hay quita con ele na congregacion y gendeh kita ta asocia con ele. Le con el 1 Corinto 5:6, 11 y despues, discuti con este pregunta:
-
Igual si paquemodo el levadura ta afecta con el entero masa, paquemodo sale afectao el congregacion si tan junto este con el un persona quien gendeh ta arripinti?
Ta imita el maga anciano con Jehova y ta dale mira lastima con aquellos quien ya culpa. Ta pricura sila busca y ayuda con aquellos con quien ya quita na congregacion. Manada el ya puede bira na congregacion por causa na disciplina que ya ricibi sila. Maskin pa duele se, ya ayuda se kanila para realiza que mali el cosa sila ya hace.—Salmo 141:5.
Porque tu puede habla que razonable, lastimoso y amable si Jehova con aquellos quien ya culpa?
5. Ta perdona si Jehova si ta arripinti kita
Ya usa si Jesus un ilustracion que ta ayuda kanaton para entende si cosa ta sinti si Jehova si ta arripinti el un persona. Le con el Lucas 15:1-7 y despues, discuti con este pregunta:
-
Cosa este ta enseña contigo acerca con Jehova?
Le con el Ezequiel 33:11 y despues, discuti con este pregunta:
-
Cosa kita debe hace para dale mira que deverasan kita ta arripinti?
Igual na un pastor, si Jehova ta ama gayot con el de suyu carnero
EL CUANTO TA HABLA: “Tiene yo miedo que si habla yo el de mio culpa na maga anciano, quita sila conmigo na congregacion.”
-
Cosa tu hay habla con el un persona quien ta sinti ansina?
SUMARIO
Si ya comete kita un serioso culpa pero sincero kita ta arripinti y determinao kita que gendeh hace otravez con el mal cosas, si Jehova hay perdona kanaton.
Repaso
-
Porque bueno para kanaton si admiti kita el diaton culpa con Jehova?
-
Cosa kita necesita hace para perdona kanaton si Jehova?
-
Si ya comete kita un serioso culpa, porque kita debe pidi el ayuda del maga anciano?
SABE PA MAS
Mira si paquemodo el un hombre ya puede experiencia con el lastima de Jehova que ya menciona na Isaias 1:18.
Paquemodo el maga anciano ta pricura ayuda con aquellos quien ya comete serioso culpa?
Sabe si paquemodo ta dale mira amor y lastima con aquellos quien nuay arripinti.
“Ayuda Para con Aquellos con Quien Ya Quita na Congregacion” (El Torre de Guardia, Agosto 2024)
Na istoria “Necesita Yo Bira con Jehova,” aprende si porque el un hombre quien ya queda lejos na verdad ya sinti que ya ayuda con ele si Jehova para bira otravez con Ele.
“El Biblia Puede Cambia con el Vida” (The Watchtower, Abril 1, 2012)
Baka Gusta Tambien Tu
MAGA COMON PREGUNTA
Cosa el Bible Study que Ta Ofrece el Maga Testigo de Jehova?
Na programa de Bible study que ta ofrece el maga Testigo de Jehova, puede tu usa maskin cosa translation de Biblia. Puede tu invita con el de tuyu entero familia o maskin quien amigo para man junto contigo.
