Maga Endnote
1. Si Quien el Grande Babilonia
Paquemodo kita ya sabe que el “Grande Babilonia” ta representa con el todo falso religion? (Revelacion 17:5) Considera con el siguiente:
Presente le y activo na entero mundo. Ya menciona que el Grande Babilonia sintao entre na ‘maga raza y maga nacion.’ Tiene ele “poder sobre con el maga rey del mundo.”—Revelacion 17:15, 18.
Gendeh le un organizacion de politica o comercio. El “maga rey del mundo” y el “maga negociante” ta existi siempre despues con ele destroza.—Revelacion 18:9, 15.
Gendeh le deverasan ta representa con Dios. Ya llama con ele como un mala mujer o prostitute cay tan alianza le con el maga gobierno para na sen o otro maga favor. (Revelacion 17:1, 2) Ta engaña le con el maga gente de todo nacion. Y responsable le na muerte del manada maga gente.—Revelacion 18:23, 24.
2. Cuando Abuya el Mesias?
El Biblia ya habla que hay pasa 69 semana antes llega el Mesias.—Le con el Daniel 9:25.
Cuando ya principia el 69 semana? Na año 455 B.C.E. Na ese tiempo, si Gobernador Nehemias ya llega na Jerusalem para “restora y construi otravez” con el ciudad.—Daniel 9:25; Nehemias 2:1, 5-8.
Paquemodo de largo el 69 semana? Na cuanto maga profecia na Biblia, el un dia ta representa un año. (Numero 14:34; Ezequiel 4:6) Poreso el cada semana ta representa siete año. Quierre decir na este profecia, el 69 semana tiene largor de 483 año (69 semana x 7 dia).
Cuando el fin del 69 semana? Si cunta kita 483 año principia 455 B.C.E., hay llega kita na año 29 C.E. a Amo este el exacto año que ya bautiza con Jesus y ya queda le el Mesias!—Lucas 3:1, 2, 21, 22.
3. Maga Curada Medical que Envuelto el Sangre
Tiene maga curada medical que ta usa con el mismo sangre del paciente. El cuanto de ese gendeh aceptable para na maga Cristiano. Por ejemplo, el cuanto gente ta dona con el diila mismo sangre o ta hace pondo con ese para usa durante el un operacion despues. El maga Cristiano gendeh ta hace ansina.—Deuteronomio 15:23.
Pero, el otro curada medical posible aceptable. Incluido aqui el blood test, hemodialysis, hemodilution o el usada del cell-salvage o heart-lung bypass machine. Na este y otro maga caso, donde gendeh ta hace pondo con el sangre del un paciente para usa despues, el cada Cristiano debe decidi si paquemodo usa con el de suyu mismo sangre durante el un medical curada, test o proceso. Posible, el cada doctor tiene diferente manera si paquemodo ta hace con este maga curada. Poreso, antes acepta con el maskin cosa clase de curada o test, el un Cristiano necesita sabe si paquemodo hay usa con el de suyu mismo sangre. Considera con el siguiente pregunta:
Paquemodo si tiene sangre que hay hace sale na de mio cuerpo y posible descanza unrato el corrida de este? Permiti ba el de mio conciencia que mira con este como parte siempre del de mio cuerpo que gendeh necesita hace derrama “na tierra”?—Deuteronomio 12:23, 24.
Paquemodo si saca conmigo sangre durante el un medical curada, mezcla con este medicina y despues, hace bira na de mio cuerpo? Hay man conciencia ba yo o hay acepta yo el curada?
4. Separacion na Matrimonio
El Biblia ta habla que el marido y mujer gendeh debe man separtajan y ta hace este claro que si man separtajan sila, nuay sila el derecho para casa otravez. (1 Corinto 7:10, 11) Pero, tiene maga situacion donde el cuanto maga Cristiano puede considera que man separtajan con el diila marido o mujer.
Intencional gendeh ta suporta con el familia: El marido no quierre dale el material necesidad del familia y nuay mas sila maskin para na maga importante necesidad del vida.—1 Timoteo 5:8.
Por demas abuso na fisical: Abuso donde na peligro ya el salud o vida del un marido o mujer.—Galacia 5:19-21.
Ta pone na peligro el espiritualidad: El marido (o mujer) ta hace manera para gendeh mas puede sirvi con Jehova el de suyu mujer (o marido).—Maga Actividad 5:29.
5. Maga Holiday y Celebracion
El maga Cristiano gendeh ta participa na maga holiday que gendeh aceptable con Jehova. Pero, el cada uno Cristiano debe usa con el de suyu conciencia que base na Biblia para decidi si cosa hace na maga situacion si el otro ta celebra maga holiday. Considera con el cuanto ejemplo.
Tiene yan greet contigo por causa na un celebracion. Puede tu contesta con ele, “Gracias.” Pero si quierre pa le sabe mas, puede tu explica con ele si porque tu gendeh ta celebra con el celebracion.
El de tuyu marido o mujer quien gendeh Testigo de Jehova ya invita contigo para come junto na maga pariente durante el un holiday. Si el de tuyu conciencia ta permiti contigo que anda, puede tu explica adelantao con el de tuyu marido o mujer que si tiene practica de pagano na ese celebracion, gendeh tu hay participa.
El de tuyu amo ya dale contigo un bonus durante el tiempo de holiday. Debe ba tu gendeh ricibi con el bonus? Depende. El de tuyu amo ba ta mira con el bonus como parte del celebracion o ta dale lang le con este para dale mira apresacion na de tuyu buen trabajo?
Tiene quien ya dale contigo un regalo durante el tiempo de holiday. Posible el quien ta dale hay habla, “Sabe yo que gendeh tu ta celebra con el holiday pero quierre lang yo dale contigo este.” Posible bueno lang gayot ele y quierre dale. Pero paquemodo si ta pensa tu que el quien ta dale ta pruba lang con el de tuyu fe o ta pricura contigo hace envuelto para celebra con el holiday? Depende contigo si acepta ba tu con el regalo. Na todo diaton maga decision, quierre kita mentena un limpio conciencia y queda fiel con Jehova.—Maga Actividad 23:1.
6. Contagioso Enfermedad
Cay ta ama kita con el maga gente, con cuidao gayot kita que gendeh hace tapon contagioso enfermedad con otro. Poreso si sabe kita que tiene kita ansina enfermedad o ta pensa kita que baka enfermo kita y puede hace tapon con otro, hay queda gayot kita con cuidao. Ta hace kita este cay el Biblia ta habla: “Ama con el dituyo maga vicinos como ta ama tu con el dituyo mismo cuerpo.”—Roma 13:8-10.
Paquemodo el un persona quien tiene contagioso enfermedad puede dale mira amor con otro? Gendeh le debe abraza o besa con otro. Gendeh le debe rabia si el cuanto gendeh ta invita con ele na casa cay quierre sila protege con el diila familia. Y antes de bautiza, debe le informa con el coordinator del grupo del maga anciano acerca na de suyu condicion para puede hace maga arreglamiento para protege con el otro quien bautiza tambien. Antes principia man novio o novia, el un persona quien posible ya queda infectao na un contagioso enfermedad debe manda man blood test. Si hace tu este, ta dale tu mira que ta ama tu con otro y gendeh tu ta ‘busca el interes lang del de tuyu mismo, sino ta busca tu el interes del los demas.’—Filipo 2:4.
7. Problema Acerca na Negocio y Legal Cosas
Puede kita evita manada problema si pone kita na maga escribido contrata el cosas acerca na sen y negocio—maskin pa ese contrata entre kanaton y na otro maga hermano o hermana. (Jeremias 32:9-12) Maskin pa hace ansina, el maga Cristiano posible siempre tiene vez tene maga diutay problema entre con uno y otro acerca na sen o otro cosas. Debe sila dayun arregla con ese maga problema na amable manera y na privado.
Pero paquemodo tu debe arregla con el maga serioso problema igual si ya hace contigo loco o ya acusa falso contigo? (Le con el Mateo 18:15-17.) Ya menciona si Jesus el proceso que debe kita sigui:
Pricura arregla con el problema entre con ustedes mismo.—Mira con el versiculo 15.
Si nuay resulta el primer accion, lleva con el uno o dos mature hermano o hermana.—Mira con el versiculo 16.
Si nuay pa siempre puede solva con el problema, amo lang este el tiempo que atraca tu na maga anciano.—Mira con el versiculo 17.
Na mayoria del maga situacion, gendeh kita debe lleva con el diaton maga hermano na corte cay posible se causa para tene negativo mirada el otro con Jehova y con el congregacion. (1 Corinto 6:1-8) Pero, tiene cuanto maga problema que necesita arregla na corte: el proceso de divurcio, decision acerca si quien cuida con el anak, el cantidad para paga despues del divurcio, el pago de insurance, el proceso acerca na maga last will y otro pa. El un Cristiano quien ta anda na corte para arregla con el ansina clase de maga caso na amable manera gendeh ta viola con el consejo na Biblia.
Si tiene serioso crimen—igual na rape, abuso de maga bata, fisical ataque, robo o matanza—el un Cristiano quien ta reporta con ese na secular autoridad gendeh ta viola con el consejo na Biblia.
a Principia del 455 B.C.E. hasta 1 B.C.E. tiene 454 año. Principia 1 B.C.E. hasta 1 C.E. tiene un año (nuay cero año). Y principia del 1 C.E. hasta 29 C.E. tiene 28 año. El suma total de este amo 483 año.
