Imagina este ecsena: Ta juga si Tim junto con el de suyu maga amigo cuando ya puede le guerria el bola na espejo del auto del diila vecinos y ya quebra este.

Si etu si Tim, cosa tu hace?

TIENE TU TRES OPCION:

1. Corre.

2. Menta con otro.

3. Habla con el de tuyu vecinos si cosa ya sucede y habla que paga tu el cosa ya quebra.

Baka quierre tu iscuji con el Opcion A. Pero tiene buen razon si porque debe tu admiti con el de tuyu maga kamali​—ya puede man tu hace quebra el espejo o maskin cosa pa.

1. Ese el justo cosa que debe hace.

   El Biblia ta habla: “Quierre kame queda honesto na todo cosas.”​—Hebreo 13:18, NW.

2. Mas tiene posibilidad que hay perdona con aquellos quien ta admiti el diila maga kamali.

   El Biblia ta habla: “El quien ta tapa con el de suyu kamali gendeh puede esconde con ese, pero hay dale mira lastima con el quien ta admiti y gendeh mas ta hace con ese.”​—Proverbio 28:13.

3. El mas importante, ta hace se alegre con Dios.

   El Biblia ta habla: “Ta odia si Jehova con el un gente que gendeh honesto, pero tiene Le buen amistad con el maga recto.”​—Proverbio 3:32.

Si Karina, un 20 año, nuay habla con el de suyu tata que tiene le violation na manejada. Pero nuay le quel puede esconde hasta para cuando. “Maga un año despues,” ya habla si Karina, “ya puede nota mi tata con el ticket de violation bajo na de mio nombre. Mas yan problema lang yo!”

El leccion? Ya habla si Karina: “Mas queda lang grabe si esconde tu el de tuyu kamali. Na uliji, hay experiencia siempre tu el mal resulta de ese!”

El Biblia ta habla: “Todo kita ta comete culpa muchas veces.” (Santiago 3:2) Como cosa kita ya aprende, humilde y mature kita si ta admiti kita el diaton maga kamali​—y ta hace con ese dayun.

Despues, aprende na de tuyu maga kamali. El un mujer, si Vera, ya habla: “Ta pricura yo mira con el cada kamali como un experiencia que tiene yo cosa puede aprende y como un leccion que puede ayuda conmigo queda mas buen persona. Si experiencia yo el situacion otravez, sabe ya yo si paquemodo con ese enfrenta.” Mira kita si paquemodo tu hace con ese.

Ya presta tu el motor del de tuyu tata y ya queda este malo. Cosa tu hace?

• No habla con el de tuyu tata y esperanza que gendeh le nota.

• Habla con el de tuyu tata si cosa ya pasa.

• Habla con el de tuyu tata si cosa ya pasa pero menta con otro.

Nuay tu pasa na test cay nuay tu estudia. Cosa tu hace?

• Habla que bien dificil gayot el test.

• Admiti que culpa de tuyu si porque tu nuay pasa.

• Habla que rabiao contigo el maestra.

 Ahora, bira tu con el dos ecsena y imagina que etu el (1) de tuyu tata y (2) de tuyu maestra. Cosa gaha sila pensa si ya admiti tu con el de tuyu kamali? Cosa sila pensa si esconde tu con el de tuyu kamali?

Ahora, pensa un kamali que ya hace tu del otro año y contesta con el siguiente pregunta.

Cosa quel kamali? Paquemodo tu ya enfrenta con aquel?

• Ya esconde yo.

• Ya menta yo con otro.

• Ya admiti yo.

Si nuay tu admiti con el de tuyu kamali, cosa tu ya sinti?

• Alegre—nuay conmigo cuji!

• Yan conciencia—era ya habla yo el deverasan.

Cosa era tu ya hace para mas bueno el resulta?

Cosa tu ya aprende na de tuyu kamali?

Porque tan alang-alang el otro admiti diila kamali?

Cosa pensa el maga gente contigo si pirmi tu ta tapa de tuyu maga kamali y cosa sila pensa si ta admiti tu con ese?​—Lucas 16:10.