Imagina este ecsena: Dos meses pa lang man novio y novia si Heather y Mike pero ta sinti si Heather que bien conoce ya gayot le con el de suyu novio. Pirmi sila tan text, tan cuento na cellphone por cuanto hora y sabe pa gane sila si cosa ta pensa el cada uno! Pero ahora mas pa con ese el cosa quierre hace si Mike.

Del ya pasa dos meses, si Mike y Heather tan agarrahan mano lang y tan kiss unrato. No quierre si Heather hace mas pa con ese. Pero no quierre tambien le que deja con ele si Mike. Ta manda con ele sinti si Mike que bien bonita y especial le. Ya habla si Heather na de suyu mismo cuerpo, ‘Bien in love kame dos . . .’

Si na edad ya tu para tiene novio o novia y na situacion tu de Heather, cosa tu hace?

Si gendeh tu sigui con el un fisical ley igual na law of gravity, hay experiencia tu mal resulta. Ansina tambien si gendeh tu sigui con el ley de moralidad igual como: “Queda . . . lejos na maga immoralidad.”​—1 Tesalonica 4:3.

Cosa el maga resulta si desobedece con ese mandamiento? El Biblia ta habla: “El maga gente ta hace cosa inmoralidad, ta peca contra con el disuyo mismo cuerpo.” (1 Corinto 6:18) Porque se deverasan?

 Asegun na maga researcher, manada na maga jovenes quien tan sex maskin nuay pa casa ta experiencia uno o mas de este mal resulta abajo.

• TRISTEZA. Mayoria del maga jovenes quien yan sex antes casa ya habla que ya arripinti sila na uliji.

• PERDE CONFIANZA. Despues man sex, el cada uno ta pensa, ‘Con quien pa gaha le yan sex?’

• MAN LUYA. El deverasan, manada mujer el mas quierre que el un persona protege kanila y gendeh kanila abusa. Y manada hombre ta perde interes na maga mujer quien ta conforma man sex kanila.

• Acorda: Si conforma tu man sex maskin nuay pa tu casa, ta hace tu bajo de tuyu mismo cuerpo cay ta dale tu el un cosa que bien precioso. (Roma 1:24) Bien valoroso el de tuyu cuerpo!

Dale mira que tiene tu animo “queda . . . lejos na maga immoralidad.” (1 Tesalonica 4:3) Si llega el dia casa ya tu, puede ya tu man sex. Y puede tu con este hace que gendeh tan lingasa, ta arripinti y ta tiene miedo​—maga comon resulta si man sex antes casa.​—Proverbio 7:22, 23; 1 Corinto 7:3.

• El persona ba quien deverasan ta ama contigo hay pone na peligro de tuyu cuerpo y emocion?

• El persona ba quien deverasan ta ama contigo hay pruba influencia contigo para destroza de tuyu relacion con Dios?​—Maga Hebreo 13:4.