PREGUNTA 9
Debe Ba Yo Creé na Evolucion?
COSA TU HACE?
Imagina este ecsena: No sabe si Alex si cosa le creé. Ya engranda le que ta creé na Dios y na creacion. Pero este dia, el de suyu maestra na biology ya habla que deverasan el evolucion y base este na research del ciencia. No quierre si Alex que mira con ele como nuay saber. Ya pensa le, ‘Si ya dale prueba el maga scientist que deverasan el evolucion, porque man yo gendeh creé?’
Si etu si Alex, creé ba tu na evolucion cay amo se el ta habla na cuanto maga libro?
PENSA ANAY!
Aquellos quien ta creé na creacion y na evolucion facil lang habla si cosa sila ta creé pero no sabe sila si porque sila ta creé con ese.
-
El cuanto maga gente ta creé na creacion cay amo se kanila ta enseña na iglesia.
-
El cuanto maga gente ta creé na evolucion cay amo se kanila ta enseña na escuela.
SEIS PREGUNTA QUE DEBE CONSIDERA
El Biblia ta habla: “Todo casa tiene quien ya planta. Pero quien ya hace con el mundo amo el Dios.” (Maga Hebreo 3:4) Rasonable ba se?
Si habla kita que nuay quien ya crea con el vida, dol ta habla kita que nuay quien ya planta con este casa
COSA TA HABLA EL OTRO: Todo cosas na univerzo ya existi por causa del big bang.
1. Quien o cosa ya causa con el big bang?
2. Cosa el mas maka-creé, el todo ya principia na nuay o tiene quien ya crea con ese?
COSA TA HABLA EL OTRO: El maga gente yan evolve estaba na maga animal.
3. Si yan evolve el gente estaba na animal—por ejemplo, na maga chonggo—porque bien otro gayot el pensamiento del maga gente contra na maga chonggo?
4. Porque el de con todo “simple” forma de vida bien complicao?
COSA TA HABLA EL OTRO: Tiene prueba si porque deverasan el evolucion.
5. El quien ya habla con ese ya investiga ba gayot con el maga evidencia?
6. Paquemodo de manada el ta creé na evolucion por causa lang cay ya habla kanila que ta creé con ese el maga inteligente?
“Si ta camina tu na un lugar que manada pono y ya puede tu mira un bonito casa, habla ba tu: ‘Wow! Siguro justo gayot el tumbada del maga pono poreso ya queda casa.’ Siempre gendeh! Imposible se. Poreso, porque man kita creé que todo cosas na univerzo bigla lang ya tiene?”—Julia.
“Imagina que tiene contigo ya habla que tiene cosa ya rebenta na un printing plant y el tinta que yan calayat na pader y na quisame ya forma un diccionario. Creé ba tu?”—Gwen.
SI PORQUE DEBE CREÉ NA DIOS
El Biblia ta habla que “necesita examina gayot kita enbuenamente.” (1 Tesalonica 5:21, El Nuevo Testamento) Quierre decir, el de tuyu creencia na Dios gendeh lang debe base na
-
EMOCION (Ta sinti yo que tiene mas poderoso kanaton)
-
INFLUENCIA DEL OTRO (Religioso el maga gente alrededor kanamon)
-
PRESSURE (Ta creé yo con Dios cay amo se el cosa ya enseña conmigo de mio mayores)
Sino, debe tiene tu pesao razon si porque tu ta creé na un cosa.
“Na clase, si tan explain diamon maestra si paquemodo tan function diaton cuerpo, mas convincido yo que tiene gayot Dios. Tiene function el cada parte del cuerpo, maskin na de con todo diutay detalle y ta sucede este que gendeh kita ta puede nota. Gendeh gayot basta-basta el cuerpo del gente!”—Teresa.
“Si ta mira yo bien alto building, barco o auto, ta puede yo pensa, ‘Quien ya hace con ese?’ Por ejemplo, necesita maga gente inteligente para puede hace auto cay manada este maga diutay pieza que necesita para corre. Y si tiene quien ya diseña con el auto, tiene tambien na maga gente.”—Richard.
Si Anthony ya habla: “Mas ta omenta de mio saber acerca na ciencia, mas gendeh ya maka-creé con el evolucion.” Ya menciona tambien le que para con ele, mas dificil creé na evolucion contra creé con Dios.
PENSA TU ESTE
Maskin pa despues del cuanto decada de research, gendeh siempre tan uyun el maga scientist na diila explanacion acerca na evolucion. Si gendeh tan uyun el maga scientist quien mas experto, malo ba si cuestiona tu con ese teoria?
