Imagina este ecsena: Tan viaje si David na un lugar que gendeh le familiar. Otro el maga caratula na camino poreso sabe le que ya perde le. Posible que mali el onde le ya pasa.

Si etu si David, cosa tu hace?

Tiene tu cuanto opcion:

1. Pregunta.

2. Mira na mapa o usa GPS.

3. Continua maneja y esperanza que puede tu llega na de tuyu destinacion.

Claro que gendeh efectivo si iscuji tu con el C.

Mas bueno el B contra na A. Mas facil mira na mapa o GPS para guia con el de tuyu camino.

Ansina tambien el Biblia!

Este libro puede

• guia contigo si tiene tu problema

• ayuda contigo conoce de tuyu mismo cuerpo y queda mas buen gente

• enseña contigo si paquemodo tiene el de con todo buen vida

Desde maga bata pa kita, manada ya kita pregunta.

• Porque azul el cielo?

• Porque ta brilla el maga estrellas?

Ta pregunta tambien kita acerca na maga cosas que ta sucede na mundo.

• Porque ta sucede el maga mal cosas?

• Porque ta muri el maga gente?

Paquemodo si el maga contestacion ya dura ya gale escribido na Biblia?

Mucho maga gente ta habla que el Biblia ta contene puro maga istoria que gendeh deverasan, que este de antes pa o bien dificil entende con este. Pero deverasan ba gaha el cosa sila ta habla o otro lang el cosa sila ya oi acerca na Biblia? Posible gaha que gendeh justo el informacion que ya sabe sila?

Por ejemplo, pensaba el maga gente el Biblia ta habla que el mundo talli na poder del Dios. Pero paquemodo ese queda posible? El mundo ahora bien trambulicao! Mucho el quien ta sufri, ta enferma y ta muri, ta experiencia pobreza y calamidad. Bien imposible que un amable Dios el responsable con ese todo!

Quierre ba tu sabe el contestacion? Baka espanta tu si cosa ta habla el Biblia acerca si quien ta controla con el mundo.

Siguro ya puede tu nota que el maga consejo na este brosyur base na Biblia. Convincido el maga Testigo de Jehova que puede kita confia con el guia na Biblia. Por causa se cay este “inspirao de Dios y puede gayot usa con provecho para insiña, para discuti, para guia el vida del maga gente.” (2 Timoteo 3:16, 17) Puede gayot tu beneficia si examina tu con este libro!