Imagina este ecsena: Miercoles tarde. Ya acaba ya si Geoff, un 17 año, con el de suyu trabajo na casa y quierre ya le man relax. Ya abri le con el TV y ya sinta na de suyu favorito bangco.

Ya llega el de suyu tata y gendeh alegre.

Si etu si Geoff, cosa tu hace para evita este confrontacion?

Si ta converza tu na de tuyu mayores igual lang como ta maneja tu auto. Si tiene sanggadura na camino, puede tu busca otro ruta.

 POR EJEMPLO:

“Tan dificil yo man cuento con el de mio tata,” ya habla el un mujer, si Leah. “Tiene vez, tan cuento yo con ele, despues ta habla lang le, ‘Sorry. Cosa quel?’”

TIENE TRES OPCION SI LEAH.

1. Grita con el de suyu tata.

   Grita si Leah, “Oi conmigo! Importante este!”

2. Gendeh mas le man cuento con el de suyu tata.

   Gendeh mas man cuento si Leah con el de suyu tata acerca na de suyu problema.

3. Espera el justo tiempo y man cuento otravez con el de suyu tata.

   Personal man cuento si Leah con el de suyu tata na otro tiempo o escribi le carta con el de suyu tata acerca na de suyu problema.

Cosa opcion tu recomenda con Leah?

CONSIDERA: Tiene cosa ta pensa el tata de Leah poreso no sabe le si cosa ta sinti si Leah. Si iscuji si Leah con el Opcion A, baka gendeh entende de suyu tata si porque le ta grita. Posible, gendeh siempre oi con ele de suyu tata y gendeh este ta dale mira respeto y honor con ele. (Efeso 6:2) Entonces, nuay buen resulta este opcion.

Facil hace con el Opcion B pero gendeh este justo. Porque? Para puede solva si Leah con el de suyu problema, necesita le man cuento con el de suyu tata. Para puede ayuda el tata con el de suyu anak, necesita le sabe si cosa ta pasa con Leah. Gendeh este sucede si man silencio lang si Leah.

Na Opcion C, gendeh permiti si Leah que este situacion hay sangga con ele para man cuento con el de suyu tata. Sino, espera le otro tiempo. Y si decidi le escribi carta con el de suyu tata, sinti dayun alivio si Leah.

Si escribi le carta, puede tambien le pensa enbuenamente si cosa le habla con el de suyu tata. Si le de suyu tata con el carta, puede le sabe si cosa con ele quierre habla si Leah y ayuda este con ele para entende si cosa gayot el problema del de suyu anak. Igual sila hay beneficia na Opcion C. Personal man o por medio de carta, este opcion ta sigui con el consejo del Biblia que ‘busca con ansias el maga cosa-cosa que ta hace crici con el paz.’​—Roma 14:19.

Cosa pa el otro opcion que puede hace si Leah?

Pensa un opcion y si cosa el resulta de ese.

Acorda que gendeh pirmi igual el cosa tu ya habla y si cosa ya entende el de tuyu mayores.

POR EJEMPLO:

Ya pregunta contigo de tuyu mayores si porque nuay tu na mood. Ya habla tu, “No quierre yo man cuento acerca con ese.”

Pero el ya entende de tuyu mayores: “Gendeh yo habla cay gendeh yo ta confia con ustedes. Habla yo con el de mio maga amigo pero gendeh con ustedes.”

Imagina que tiene tu problema y ya habla de tuyu mayores que ayuda sila contigo. Pero ya habla tu: “No conmigo man lingasa. Puede yo con este solva.”

• Cosa posible entende de tuyu mayores?

• Cosa posible el mas bueno contestacion?