Imagina este ecsena: Malingasa ya si Brian mientras ta atraca con ele el de suyu dos hombre schoolmate. Na este semana, dos beses ya con ele ya pricura manda puma. Este ya el ika-tres beses.

El primer hombre ya habla:

Ya mata le ojos cuando ya habla le con el palabra “amigo” mientras tiene cosa ta saca na de suyu bolsa y ya hace alcanza con Brian.

Cuando ya mira si Brian con el cigarillo na mano del de suyu schoolmate, mas malingasa ya le.

Si etu si Brian, cosa tu hace?

Ya pensa ba el maga uban de Brian si cosa sila ta hace? Sila ba mismo ya decidi puma? Posible gendeh. Grande el posibilidad que ya sigui lang tambien sila na influencia del otro. Quierre sila que acepta kanila el otro poreso ta sigui sila na cosa ta hace el otro.

Si na igual situacion tu, paquemodo tu resisti con el peer pressure y gendeh sigui kanila?

1. EXPECTA DAAN

   El Biblia ta habla: “El un sabio ta puede mira con el peligro y ta esconde, pero el nuay experiencia ta continua y hay sufri na mal resulta.”​—Proverbio 22:3.

   Na manada situacion, ta puede tu daan mira si tiene peligro sucede. Por ejemplo, ya puede tu mira que ta puma el un grupo del de tuyu maga schoolmate. Si expecta ya tu daan si cosa sucede, mas sabe tu si cosa hace.

2. PENSA

   El Biblia ta habla: “Guarda firmi limpio el de ustedes conciencia.”​—1 Pedro 3:16.

   Pregunta na de tuyu mismo cuerpo, ‘Cosa yo sinti na uliji si sigui lang yo na cosa ta hace el otro?’ Posible, na primero gendeh sila contigo gangguia. Pero cosa tu sinti na uliji? Conforme ba tu esconde si quien gayot tu para lang queda alegre el de tuyu maga classmate?​—Exodo 23:2.

3. DECIDI

   El Biblia ta habla: “Cosa el gente ta siembra, ese tamen ele ay cosecha.”​—Galacia 6:7.

   Llega siempre el tiempo que necesita kita decidi y experiencia el resulta del diaton decicion. Ya habla el Biblia que si Jose, Job y Jesus ya hace justo decicion. Ta menciona tambien este que si Cain, Esau y Judas ya hace mal decicion. Cosa tu hace?

El Biblia ta habla: “Quien fiel na maga cosa-cosa diutay, fiel tamen na maga cosa-cosa grande.” (Lucas 16:10) Si ya pensa ya tu el resulta del cosa tu hace y ya decidi ya, mas facil ya lang habla con ese​—y queda tu alegre.

No man lingasa​—gendeh tu necesita man sermon con el de tuyu maga uban. Bastante ya que habla kanila GENDEH. O para mas hace claro el de tuyu decicion, puede tu habla:

• “Nuay yo lli labut!”

• “Gendeh yo ta hace ansina!”

• “Sabe ustedes si cosa de mio decicion.”

El importante amo contesta tu dayun kanila y dale mira que convincido tu na de tuyu decicion. Si hace tu se, gendeh mas sila man pressure contigo!

Cosa tu hace si ta gangguia contigo el de tuyu maga uban? Paquemodo si habla sila miedutin tu? Ese amo un peer pressure. Cosa tu hace? Tiene tu dos opcion.

• Puede tu man uyun na cosa sila ya habla. (“Justo ustedes, ta tiene yo miedo!” Y despues, dale corto razon.)

• Puede tu hace bira kanila el pressure. Habla si porque no quierre tu hace el cosa sila ta habla y manda kanila pensa. (“Pensaba ba yo sabe ustedes que gendeh bueno puma!”)

Si ta gangguia siempre sila contigo, sale tu! Acorda que si man junto pa tu kanila, mas man pressure sila contigo. Si sale tu, ta dale tu mira que gendeh tu kanila permiti que cambia si quien gayot tu.

El deverasan, gendeh tu puede evita con el peer pressure. Pero puede tu decidi si cosa tu quierre hace, habla el de tuyu decicion y etu mismo controla con el de tuyu vida. De tuyu siempre se decicion!​—Josue 24:15.