Imagina este ecsena: Si ta mira si Julia na espejo, ta puede le mira que bien gorda le. “Necesita yo queda flaco,” ta habla le​—maskin pa el de suyu maga mayores y amiga ta habla que bien flaco le.

Nuevo lang, ya pensa si Julia que hace el maskin cosa para menggua de suyu pesades “maskin cuanto kilo lang.” Necesita, gendeh le come por cuanto dia . . .

Si ansina tu ta sinti igual con Julia, cosa tu hace?

Normal lang que tiene tu queber na de tuyu ichura. Gane, el Biblia ta dale positivo comento acerca na ichura del cuanto maga mujer y hombre igual kanda Sara, Raquel, Abigail, Jose y David. El Biblia ta habla que si Abisag, un mujer que “bien bonita.”​—1 Rey 1:4.

Pero, manada jovenes sobra el lingasa na diila ichura. Puede se resulta na manada problema. Por ejemplo:

• Na un survey, 58% del maga mujer ta habla que overweight sila. Pero el deverasan, 17% lang el overweight.

• Na otro survey, 45% del maga mujer que underweight ta pensa que bien pesao sila!

• Para lang menora el diila pesades, manada maga jovenes el ya tiene anorexia​—un enfermedad que puede causa muerte cay gendeh mas sila ta come.

 Si tiene tu sintomas de anorexia o otro pa enfermedad que tiene que hace na comida, pidi ayuda. Puede tu se habla na de tuyu mayores o otro adulto que ta confia tu. El Biblia ta habla: “El verdadero amigo ta ama na todo tiempo y un hermano quien ya nace para na tiempo de dificultad.”​—Proverbio 17:17.

El deverasan, el personalidad del un persona amo el razon si porque el otro ta gusta con ele o gendeh. Considera el anak de Rey David, si Absalom. El Biblia ta habla:

“Nuay gente igual con Absalom con quien ya alaba gayot por causa na de suyu guapura. . . . Nuay cosa umalin con ele.”​—2 Samuel 14:25.

Pero, este joven bien orgulloso, ambicioso y traidor! Negativo el cosa ta habla el Biblia acerca con Absalom; ta dale este mira que ele un gente gendeh leal y lleno de rabia.

Poreso, el Biblia ta dale kanaton este consejo:

“Visti el camisa del nuevo naturaleza [personalidad, NW].”​—Colosa 3:10.

“No ustedes usa maga adorno na cuerpo . . .  El de ustedes maga adorno necesita talli na adentro na de ustedes maga corazon.”​—1 Pedro 3:3, 4.

Gendeh malo si quierre tu que enbuenamente el de tuyu ichura pero mas importante siempre el de tuyu personalidad. Mas gusta contigo el maga gente si bueno el de tuyu custumbre contra si bale el de tuyu cuerpo! “Puede contigo nota dayun si bonita tu,” ya habla el un mujer, si Phylicia, “pero el de tuyu buen custumbre amo el cosa que mas acorda el maga gente acerca contigo.”

Pirmi ba tu gendeh ta gusta con el de tuyu ichura?

Ya puede ya ba tu pensa man retoke o man sobra de diet para queda bale el de tuyu ichura?

Si puede tu cambia de tuyu ichura, cosa tu cambia? (Iscuji con el de tuyu contestacion.)

• ALTOR

• PESADES

• PELO

• CUERPO

• CARA

• COLOR

Si ya contesta tu “si” na primer dos pregunta y ya iscuji tu tres o mas pa na ika-tres pregunta, considera este: Posible que gendeh ansina de negativo el mirada del otro contigo. Facil lang queda sobra malingasa na de tuyu ichura.​—1 Samuel 16:7.