Imagina este ecsena: Un menor de edad si Karen. Nuay pa le diez minuto na party cuando ya oi le un familiar voz atras con ele.

Ya bira cara si Karen y ya mira con el de suyu amiga, si Jessica, que ta agarra dos botella de beer. Ya dale si Jessica el un botella con Karen y ya habla, “Gendeh ya tu bata para gendeh toma, gendeh ba?”

No quierre saca si Karen pero amiga de suyu si Jessica. Y no quierre le pensa de suyu amiga que boring con ele man junto. Pati, un buen amiga si Jessica. Si ta toma le, quierre decir gendeh se malo. ‘Beer lang este,’ na pensamiento de Karen. ‘Gendeh man este droga.’

Si etu si Karen, cosa tu hace?

Para puede hace justo decicion na este situacion, necesita gayot tu conoce si quien tu, si cosa clase de persona tu y si cosa tu ta creé. Na ese manera, puede tu controla con el de tuyu vida en vez el otro.​—1 Corinto 9:26, 27.

Paquemodo tu se hace? El de tuyu contestacion na cuatro pregunta hay ayuda contigo.

Hay tiene tu mas confianza na de tuyu mismo cuerpo si sabe tu el de tuyu maga abilidad y buen calidad.

EJEMPLO NA BIBLIA: Si apostol Pablo ya escribi: “Maskin gendeh yo bueno para man sermon, tiene yo mucho saber.” (2 Corinto 11:6) Cay ya entende le enbuenamente con el Escritura, ya esta fuerte si Pablo maskin pa manada el ya cuestiona con ele. Nuay le permiti el diila negativo maga comento hace hina con el de suyu confianza.​—2 Corinto 10:10; 11:5.

EXAMINA CON EL DE TUYU MISMO CUERPO: Escribi si cosa talento o abilidad tu tiene.

Escribi si cosa el de tuyu maga buen calidad. (Por ejemplo, amable ba tu? gendeh lagak? puede confia el otro? pirmi na hora?)

Si permiti tu que el de tuyu maga mal inclinacion amo el controla con el de tuyu vida, hay queda malo el de tuyu buen personalidad.

EJEMPLO NA BIBLIA: Sabe si Pablo si cosa el de suyu maga inclinacion. Ya escribi le: “Adentro conmigo ta ama gayot yo con el Ley del Dios, pero ta puede experiencia otro ley na mi cuerpo que ta pelea contra con el ley del dimio pensamiento. Y este amo el ta manda comigo queda un muchacho del ley del pecado.”​—Roma 7:22, 23.

EXAMINA CON EL DE TUYU MISMO CUERPO: Cosa el maga mal inclinacion que necesita tu controla?

Hay munta ba tu na auto y habla con el driver que man bira-bira na camino hasta acaba el gasolina de este? Siempre gendeh y magasto pa!

El leccion? Si tiene tu goal, ayuda se contigo para tiene direccion el de tuyu vida. Sabe tu si onde tu anda y tiene tu plano si paquemodo llega alla.

EJEMPLO NA BIBLIA: Ya escribi si Pablo: “Ta corre yo: Para gana gayot.” (1 Corinto 9:26) En vez de espera si cosa sucede na de suyu vida, tiene goal si Pablo y ya vivi le harmonia con ese.​—Filipo 3:12-14.

EXAMINA CON EL DE TUYU MISMO CUERPO: Escribi el tres goal que quierre tu alcanza na otro año.

Si no sabe tu si cosa gayot tu ta creé, man dificil tu hace decicion. Igual na un chameleon, hay cambia tu color para queda igual na de tuyu maga uban​—un señal que tu mismo no sabe si cosa clase de persona tu.

Pero si el de tuyu accion base na cosa tu ta creé, gendeh tu cambia maskin cosa pa hace el otro.

EJEMPLO NA BIBLIA: Cuando teenager pa si profeta Daniel, “ya decidi” le que obedece con el maga ley del Dios maskin pa separtao le con el de suyu familia. (Daniel 1:8) Por causa con ese, nuay le man tampa-tampa sino ya vivi le asegun na cosa le ta creé.

EXAMINA CON EL DE TUYU MISMO CUERPO: Cosa tu ta creé? Por ejemplo: Ta creé ba tu con Dios? Si ta creé tu, porque? Porque tu convincido que ta existi gayot le?

Ta creé ba tu que para na bien de tuyu el maga principio del Dios acerca na moral? Si ta creé tu, porque?

Cosa tu quierre queda​—un hojas que ta hace bula el viento maskin onde o un pono que ta esta parao maskin pa na fuerte viento? Conoce pa mas si quien gayot tu y queda tu igual con ese pono. Y hay ayuda se contigo para puede contesta con el pregunta, Quien iyo?