Nuay kame pagao clero na diamon organizacion. En vez, igual de antes cuando ya principia el congregacion, tiene maga iscujido hermano quien qualificao “cuida enbuenamente con el maga creyente del . . . Dios.” (Maga Trabajo 20:28, El Nuevo Testamento) Este maga anciano quien tiene fuerte relacion con Jehova ta guiá y ta cuida con el congregacion gendeh cay “como deber lang, sino con todo gayot . . . corazon” y gendeh “por ganancia lang de cen, sino con ansias.” (1 San Pedro 5:1-3, El Nuevo Testamento) Cosa sila ta hace para na bien diamon?

Ta cuida y ta protege sila kanamon. El maga anciano ta cuida y ta ayudá con el congregacion que esta cerca con Jehova. Ciendo sabe sila que el Dios amo el quien ya dale kanila este privilegio, el maga anciano gendeh ta domina con el maga miembro del congregacion. Ta sirvi sila para na alegria y bien del todo. (2 Corinto 1:24) Igual como un pastor que ta cuida enbuenamente con su cada uno carnero, el maga anciano tambien ta pricura conocé con el cada miembro del congregacion.—Maga Proverbio 27:23.

Ta enseña sila kanamon si paquemodo hace el voluntad del Dios. Cada semana, el maga anciano amo el quien ta encabeza con el maga miting na congregacion para hace fuerte el diamon fe. (Maga Actividad 15:32) Este maga fiel hombre ta guiá tambien kanamon na predicacion. Tan junto sila kanamon y ta enseña diferente manera de predicacion.

Ta anima sila kanamon. El maga anciano ta visitá na casa o ta man cuento kanamon na Kingdom Hall para dale comforta estaba na Biblia y ayudá hace fuerte el diamon relacion con Jehova.—Santiago 5:14, 15.

Fuera na diila trabajo na congregacion, mayoria del maga anciano tiene secular trabajo y responsabilidad na diila familia que necesita tambien dale tiempo y atencion. Poreso, debe lang kita respeta con este maga responsablé hermano.—1 Tesalonica 5:12, 13.

• Cosa el maga responsabilidad del maga anciano na congregacion?

• Paquemodo el maga anciano ta dale mira que interesao sila kanamon?