Porque bien alegre este maga gente na letrato? Por causa cay ta atende sila na uno del diamon maga asemblea. Ya manda con el maga siervo del Dios de antes que man junto sila todo tres beses na un año. (Deuteronomio 16:16) Kame tambien ta espera gayot con ese clase de ocacion. Todo el año, tiene kame tres asemblea: dos asemblea de circuito que de un dia y un asemblea de región de tres dia. Cosa el beneficio si ta atende kame con este maga ocacion?

Ta hace este fuerte el diamon relacion como maga hermano y hermana na fe. Como maga Israelita de antes que alegre alaba con Jehova “na maga asemblea,” kame tambien alegre adora con ele na este especial maga ocacion. (Salmo 26:12, footnote; 111:1) Un oportunidad este para conocé y man junto con el maga hermano y hermana de otro congregacion y maskin de otro lugar. Si media dia, alegre kame comé junto-junto na lugar donde ta hace el asemblea. Un oportunidad este para omenta el diamon maga amigo y amiga. (Maga Actividad 2:42) Ta experienciá kame aqui el amor que ta hace kanamon unido como un asosacion del ‘todo maga creyente’ na entero mundo.—1 San Pedro 2:17, El Nuevo Testamento.

Ta ayudá este para progresa el diamon espiritualidad. Ya beneficia el maga Israelita cay “ya entende sila con el maga palabra” na Escritura que ya explica kanila. (Nehemias 8:8, 12) Kame tambien ta aprecia gayot con el enseñanza estaba na Biblia que ta ricibi kame na maga asemblea. El cada programa basé na Escritura. Na ayuda del maga discurso, simposyum y demonstracion, ta aprende kame si paquemodo hace el voluntad del Dios. Ta dale kanamon animo el maga experiencia que ta oi kame acerca del maga hermano y hermana que ta esta fiel maskin pa ta enfrenta maga dificultad na vida. Na asemblea de región, tiene maga costume drama que basé na maga estoria na Biblia donde ta puede kame saca maga practicál leccion. Na cada asemblea, ta bautiza con aquellos quien ya dedica el diila vida con Dios.

• Porque el maga asemblea un alegre ocacion?

• Cosa el beneficio si atende tu na asemblea?