Maskin pa camina kame y pasa na buuk o malo el tiempo, pirmi siempre kame ta atende na diamon maga miting. Maskin manada problema na vida y cansao na diila trabajo, porque ta pricura el maga Testigo de Jehova man junto na diila maga hermano y hermana na fe?

Para este na bien diamon. “Pensa kita pirmi . . . con uno y otro,” ya escribi si Pablo na maga miembro del congregacion. (Hebreo 10:24, El Nuevo Testamento) Na ese maga palabra, si Pablo ta anima kanaton que debe kita tiene lingasa y conocé enbuenamente con uno y otro. Mientras ta conocé kame con el maga miembro na congregacion, ta puede kame sabé que el los demas kanila ya pasa maga problema igual como cosa kame ta experienciá. Poreso, puede sila ayudá kanamon si paquemodo con ese enfrenta.

Ta queda mas fuerte el diamon relacion como man amigo y amiga. Na diamon maga miting, tan junto-junto kame como maga amigo y amiga y gendeh basta cay conoce lang. Tiene vez, ta man junto kame entretene na maga recreacion. Cosa el buen efecto de este para kanamon? Mas ta queda hondo el diamon amor y apresacion con uno y otro. Ciendo tiene kame buen amistad, gendeh kame man alang-alang ayudá con otro si tiene sila problema. (Maga Proverbio 17:17) Por medio na diamon asosacion na maga miembro del congregacion, ta dale kame mira que ‘ta man lingasa kame con uno y otro.’—1 Corinto 12:25, 26.

Ta anima kame contigo iscuji amigo o amiga aquel quien ta hace el voluntad del Dios, igual con el maga Testigo de Jehova. No permiti que tiene maskin cosa sangga contigo para asocia junto kanamon.

• Cosa el beneficio si ta asocia kame na maga hermano y hermana durante el miting?

• Cuando tu quierre atende na diamon miting y conocé con el maga Testigo de Jehova?