Si tiene ta sucede calamidad, el maga Testigo de Jehova enseguidas ta ayudá con el diila maga hermano y hermana quien ya salé afectao. Por medio de ese, ta dale kame mira que deverasan el diamon amor na uno y otro. (Juan 13:34, 35; 1 San Juan 3:17, 18) Paquemodo kame ta ayudá kanila?

Ta dona kame sen. Cuando ya experienciá hambre el maga gente na Judea, ya imbia sen el maga Cristiano de Antioquia para con el diila maga hermano y hermana na fe alla. (Maga Actividad 11:27-30) Ahora, si ya sabé kame que afectao na calamidad el cuanto del diamon maga hermano na otro lugar, ta imbia tambien kame kanila maga donacion por medio na diamon congregacion.—2 Corinto 8:13-15.

Ta dale kame practicál ayuda. El maga anciano que talla na lugar donde ya sucede el calamidad ta busca y ta asigura que enbuenamente el situacion del cada miembro del congregacion. Un relief committee el quien ta dale comida, agua, ropa, ayuda medical y lugar para donde queda. Manada maga Testigo que tiene abilidad el ta man voluntario na relief work o para compone maga casa y Kingdom Hall. Por causa na diamon unidad y experiencia mientras junto ta trabaja, ta puede kame ayudá dayun si tiene maga calamidad que ta sucede. Maskin ta ayudá kame “con el [diamon] maga hermano y hermana na fe,” ta ayudá tambien kame con otro maskin cosa pa el diila religión.—Galacia 6:10.

Ta dale kame comforta estaba na Biblia. Ta necesitá gayot comforta el maga victima de calamidad. Na ese maga tiempo, si Jehova, “el Dios de todo clase de comforta,” hay hace kanamon fuerte. (2 Corinto 1:3,4, NW) Alegre kame dale comforta con aquellos quien ya perde el diila esperanza por medio na maga promesa estaba na Biblia. Igual el promesa que el Reino del Dios cerca ya termina con el todo clase de calamidad que ta causá dolor y sufrimiento.—Revelacion 21:4.

• Si tiene maga calamidad, porque ta puede dayun ayudá el maga Testigo de Jehova?

• Cosa comforta estaba na Biblia el puede kame dale con el maga victima de calamidad?