Pirmi ta menciona el nombre de kanda Bernabe y apostol Pablo na Cristiano Griego Escritura. Este maga hombre ta sirvi como maga traveling overseer que ta visitá na maga congregacion. Porque? Cay importante para kanila el bien del diila maga hermano y hermana na fe. Si Pablo ya habla que quierre le “visita oleh” con el maga hermano para mira si quetal ya sila. Preparao le viaja mas de ciento kilometro para anima kanila. (Maga Actividad 15:36) Ansina tambien el maga traveling overseer ahora.

Ta anima sila kanamon. El cada circuit overseer ta visitá na maga 20 congregacion dos beses na un año. Ta esta sila un semana na cada congregacion. Ta beneficia gayot kame na maga experiencia de este maga hermano y del diila maga esposa, si casao. Ta pricura sila conocé con todo y ta sigui sila kanamon na predicacion y na maga Bible study. Este maga hermano ta visitá tambien na maga miembro del congregacion junto na maga anciano. Por medio na diila maga discurso na maga miting y asemblea, ta puede sila anima y hace fuerte kanamon.—Maga Actividad 15:35.

Interesao sila na todo. Bien importante para na maga circuit overseer el espiritualidad del congregacion. Tan miting sila junto na maga anciano y siervo ministerial para mira si cosa el progreso del congregacion y para dale ayuda kanila si paquemodo cumpli el diila responsabilidad. Ta ayudá sila con el maga pioneer si paquemodo queda mas efectivo na ministerio. Alegre tambien sila conocé con aquellos nuevo pa na congregacion y sabé el progreso na diila espiritualidad. Cada uno kanila con todo voluntad ta sirvi como ‘uban na trabajo para ayudá kanamon.’ (2 Corinto 8:23, El Nuevo Testamento) Debe lang kita imita con el diila fe y devocion con Dios.—Maga Hebreo 13:7.

• Porque ta visitá el maga circuit overseer na maga congregacion?

• Paquemodo tu beneficia na diila visita?