El Biblia ya predicta que despues del muerte de Jesus, tiene maga Cristiano quien hay queda maga falso maestro y enseña maga cosas que gendeh asegun na Biblia. (Maga Actividad 20:29, 30) Ese gayot el cosa ya sucede. Ya mezcla sila maga ideá del pagano religión na maga enseñanza de Jesus, poreso ya tiene falso Cristianidad. (2 Timoteo 4:3, 4) Paquemodo kita puede asigura que justo el diaton entendimiento na cosa gayot el Biblia ta enseña?

Ya llega ya el tiempo para revela si Jehova con el verdad. Ele ya predicta que durante el ‘tiempo del fin, el verdadero sabeduria hay queda abundancia.’ (Daniel 12:4) Del 1870, tiene un diutay grupo quien ya busca con el verdad na Biblia. Ya puede sila notá que mucho maga enseñanza del iglesia gendeh basé na Biblia. Poreso, ya examina sila con el maga originál enseñanza del Biblia y na ayuda de Jehova ya puede sila se entende.

El maga sincero gente ya estudia gayot enbuenamente con el Biblia. Aquellos maga sincero Estudiante del Biblia, como cosa ta llama con el maga Testigo de Jehova de antes, ya usa un manera de estudiada que ta usa kame hasta ahora. Ta estudia sila el Biblia tema por tema. Si tiene un texto que dificil entende, ta busca sila otro versiculo para sabé si cosa quel quierre decir. Si tiene ya sila ideá que harmonia na todo parte del Biblia, ta escribi sila este. Por causa cay ya usa sila con el Biblia para explica si cosa este ta enseña, ya descubri sila otravez con el verdad acerca na nombre del Dios, na su Reino, su proposito para na maga gente y na tierra, el condicion del muerto y esperanza de resureccion. Por medio de ese, ya queda sila librao desde na maga falso enseñanza y tradicion.—Juan 8:31, 32.

Del 1879, ya mira el maga Estudiante del Biblia que tiempo ya para manda sabé con todo el verdad. Poreso na aquel mismo año, ya principia sila hace el magasin que hasta ahora ta imprimi siempre kame. Ahora, ta predica kame el verdad na 240 lugar y na mas de 750 lengguaje. Ya queda gayot abundancia el verdadero sabeduria!

• Despues del muerte de Cristo, cosa ya pasa con el verdad na Biblia?

• Paquemodo kame ya descubri otravez con el verdad na Palabra del Dios?