Desde antes, bien importante para con el maga Testigo de Jehova el educacion estaba na Biblia. Poreso, tiene maga escuela para con aquellos quien ta dedica largo tiempo na trabajo predicacion para puede sila ‘hace enbuenamente el diila servicio.’—2 Timoteo 4:5.

Pioneer Service School. Si un año ya de regular pioneer el un Testigo de Jehova, qualificao ele para entra con este escuela de seis dia na Kingdom Hall. El proposito de este amo para ayudá con ele queda mas cerca con Jehova, mas queda efectivo na todo parte del ministerio y para puede le continua na su fiel servicio.

School for Kingdom Evangelizers. Un escuela este de dos meses para con aquellos maga experienciao pioneer quien preparao sirvi na maskin onde lugar que ta necesitá kanila. Igual con Jesucristo, el de con todo buen Predicador que ya sirvi aqui na tierra, ta habla tambien sila, “Taqui yo! Imbia conmigo!” (Isaias 6:8; Juan 7:29) Posiblé, necesita sila man anat na mas simplé vida na lugar onde kanila imbia. Otro tambien siguro el cultura, clima y el comida alla. O baká necesita sila aprende otro lengguaje. Este escuela hay ayudá con el maga soltero, dalaga y maga casao que el edad 23 hasta 65 año para cultiva maga calidad y abilidad que necesita sila para puede pa mas usa kanila si Jehova y el su organizacion.

Watchtower Bible School of Gilead. Na Hebreo, el termino “Gilead” tiene coneccion na palabra “Testigo.” Desde ya principia este escuela del 1943, mas de 8,000 ya el quien ya gradua y ya queda maga misionario para predica na “entero parte del mundo.” (Maga Actividad 13:47) Y ya tiene gayot este buen resulta. Cuando ya llega el maga misionario na Peru, nuay pa congregacion na aquel lugar. Pero ahora, tiene ya mas de 1,000. Cuando ya principia sirvi el maga misionario na Japan, nuay llega diez el maga Testigo alla. Ahora, mas de 200,000 ya. Ta invita con el maga special pioneer o field missionary y con aquellos quien ta sirvi na maga oficina del maga Testigo de Jehova o na circuito para na este escuela. Durante el cinco meses estudio na Gilead, hay estudia sila enbuenamente con el Biblia y aprende si paquemodo sila ayudá pa mas na trabajo que ta hace na entero mundo.

• Cosa el proposito del Pioneer Service School?

• Quien puede estudia na School for Kingdom Evangelizers?