Desde antes pa, quierre si Jehova que el cada miembro del familia dale tiempo para man junto-junto, para hace fuerte el diila espiritualidad y el diila relacion na uno y otro. (Deuteronomio 6:6, 7) Amo se el razon si porque el maga Testigo de Jehova ta dale tiempo cada semana para man junto-junto el diila familia na adoranza—discuti el espiritual necesidad del familia na manera que gendeh bien formál. Maskin solo lang tu, puede tu usa con ese tiempo para mas queda cerca con Dios. Puede tu iscuji tema na Biblia que quierre tu estudia.

Un oportunidad este para queda mas cerca con Jehova. “Atraca con Dios y Ele ay atraca con ustedes.” (Santiago 4:8) Mas conocé pa kita con Jehova por medio na su Palabra. Puede kita qui sabé si cosa el de suyu personalidad y su maga accion. El un simplé manera para principia el de familia adoranza amo el suena y junto lehida de Biblia que posiblé sigui na semanal programa del Vida y Ministerio de Cristiano. Cada miembro del familia puede le un porcion na Biblia y despues hay discuti sila si cosa sila ya puede aprende.

Un oportunidad este para queda mas cerca el relacion del uno y otro. Ta queda fuerte el relacion del man maridable y del mayores na maga anak si ta estudia sila junto con el Biblia. Debe este queda un alegre ocacion que ta espera gayot el maga miembro del familia cada semana. Depende na edad del maga anak, el maga mayores puede iscuji tema para discuti estaba na The Watchtower y Awake! o na diaton Website, el jw.org. Puede tambien ustedes man cuento acerca el maga problema del maga bata na escuela y si paquemodo sila enfrenta con ese. Puede ustedes mira programa na JW Broadcasting (tv.pr418.com) y despues discuti con ese. O baká quierre ustedes man practice maga cancion que hay usa na maga miting. Despues de ese, puede ustedes meriendá.

Este especial ocacion del de familia adoranza cada semana puede ayudá kanila para obtene el alegria na estudiada del Palabra del Dios. Hay bendici gayot si Jehova con el de ustedes esfuerzo.—Salmo 1:1-3.

• Porque kame ta dale tiempo para na de familia adoranza?

• Cosa debe hace el maga mayores para queda este un alegre ocacion para con todo?