Cuando cerca ya su muerte, si Jesus ya converza na su cuatro maga dicipulo—kanda Pedro, Santiago, Juan y Andres. Cuando ta habla le el señal del su presencia na ultimo maga dia, ya preguntá le: “Quien ba gayot el fiel y sabio esclavo con quien su amo ya hace encargao na todo su maga trabajante de casa, para dale kanila comé na justo tiempo?” (Mateo 24:3, 45, NW; Marcos 13:3, 4) Si Jesus ya dale asiguranza na su maga dicipulo que como el diila “amo,” iscuji le si quien hay dale permanente espiritual comida na su maga siguidores durante el tiempo del fin. Quien hay formá con este esclavo?

Un diutay grupo este de maga iscujido siguidores de Jesus. Como un diutay grupo de maga iscujido hermano, el Cuerpo Gobernante del maga Testigo de Jehova amo ta formá con el “esclavo.” Ta dale sila espiritual comida na justo tiempo con aquellos quien ta adora tambien con Jehova. Ta confia kame con este fiel esclavo que hay continua sila ‘dale kanamon comé na hora justo.’—Lucas 12:42.

Sila el encargao na entero propiedad del diila amo. (Lucas 12:44) Si Jesus ya dale un pesao responsabilidad con el esclavo que mira con el trabajo del organizacion de Jehova aqui na tierra—cuida con el materiál cosas de este, guiá con el trabajo predicacion y enseña kanamon por medio na diamon congregacion. El “fiel y sabio esclavo” ta dale kanamon espiritual comida na justo tiempo por medio na maga publicacion que ta usa kame na ministerio y na maga programa na diamon maga miting y asemblea.

Fiel el esclavo cay ta sigui sila si cosa el verdad na Biblia y ta cumpli con el mandato que predica el buen noticia. Sabio tambien sila na manera si paquemodo sila ta cuida con el todo cosas aqui na tierra que ya encarga si Cristo kanila. (Maga Actividad 10:42) Ta bendici si Jehova con el diila trabajo poreso mas manada gente el quien ta guinda na verdad y ta puede sila dale abundancia de espiritual comida.—Isaias 60:22; 65:13.

• Con quien ya iscuji si Jesus para dale espiritual comida na su maga siguidores?

• Porque puede habla que fiel y sabio el esclavo?