Quierre ba tu man research para mas omenta el de tuyu saber na Biblia? Interesao ba tu sabé mas acerca el un texto, gente, lugar o un cosa que ya menciona na Biblia? O quierre ba tu sabé si puede ayudá el Palabra del Dios na de tuyu problema? El libreria na Kingdom Hall puede ayudá contigo.

Puede se ayudá contigo na de tuyu research. Posiblé, gendeh pa completo el de tuyu maga publicacion que basé na Biblia del maga Testigo de Jehova na de tu lengguaje. Mucho del maga reciente publicacion puede incuntra na libreria del Kingdom Hall. Baká tiene tambien este otro-otro translation de Biblia, diccionario y otro pa referencia. Puede tu usa con el libreria antes y despues del miting. Si tiene computer, posiblé tiene se Watchtower Library. Un program se de computer que ta contene mucho del diamon maga publicacion y facil con este usa para busca referencia acerca na un tema, palabra o texto.

Usable este para na maga estudiante del Miting de Vida y Ministerio. Si entrao tu con este escuela, puede contigo ayudá el libreria del Kingdom Hall si ta prepara tu el de tuyu parte. El overseer del Miting de Vida y Ministerio amo el encargao con el libreria. Responsabilidad de suyu asigura que completo y arreglao el maga reciente publicacion. Ele o el quien ta man Bible study contigo puede ayudá si paquemodo tu man research. Pero, gendeh tu debe saca con el maga libro na libreria del Kingdom Hall. Siempre, con cuidao kita si ta usa con el maga libro y no escribi con este.

Asegun na Biblia, para “incuntra tu el saber del Dios” debe preparao tu para busca con este “igual como escondido tesoro.” (Maga Proverbio 2:1-5) El libreria na Kingdom Hall puede ayudá contigo principia ese enbuscada.

• Cosa-cosa tiene na libreria del Kingdom Hall que puede ayudá na de tuyu research?

• Quien puede ayudá contigo na usada del libreria?