El maga Cristiano del primer siglo ta canta, ta reza, ta le y ta discuti con el Escritura na diila maga miting. Nuay sila maskin cosa rituál ta hace. (1 Corinto 14:26) Ansina tambien el cosa kame ta hace ahora na diamon maga miting.

Estaba na Biblia el maga enseñanza y practicál. Cada Sabado o Domingo, ta man junto-junto el maga miembro del cada congregacion para oi el discurso basé na Biblia adentro de 30 minuto. Ta discuti aqui si cosa el coneccion del Escritura na diaton vida y na maga suceso ahora. Ta anima tambien con todo le na diila mismo Biblia el maga texto ta menciona. El siguiente de ese amo el un hora Estudiada de “Watchtower” que basé na un articulo del edicion de estudio del Watchtower. Todo quien ya atende puede man comento durante el estudiada. Este ta ayudá kanamon si paquemodo aplica na diamon vida el maga principio na Biblia. Igual lang el articulo que ta estudia na mas de 110,000 congregacion na entero mundo.

Ta ayudá kanamon queda mas efectivo maestro.Tiene tambien kame miting na otro dia del semana que ta llama Vida y Ministerio de Cristiano. Un programa este que tiene tres parte base na Vida y Ministerio Workbook cada mes. El primer parte de este miting que amo el Tesoro Estaba na Palabra del Dios ta ayudá kanamon queda familiar con el cuanto capitulo na Biblia que ya le adelantao el congregacion. El siguiente amo el Queda Mas Efectivo na Ministerio que tiene maga demonstracion si paquemodo discuti con el Biblia con otro. Ayudá kanamon el un hermano para mejora el diamon lehida y manera de converzada. (1 Timoteo 4:13) Na ultimo parte, el Vida de Cristiano, ta considera si paquemodo kame aplica cada dia con el maga principio na Biblia. Tiene tambien este discusion por medio de pregunta y contestacion que ta ayudá kanamon para mas entende con el Biblia.

Si atende tu na diamon maga miting, hay aprecia gayot tu el calidad del educacion que hay ricibi tu estaba na Biblia.—Isaias 54:13.

• Cosa tu puede oi na maga miting del maga Testigo de Jehova?

• Cosa maga programa na diamon miting el quierre tu atende?