Mucho maga gente el gendeh mas ta anda na iglesia cay gendeh sila ta obtene comforta y guia na diila espiritualidad. Entonces, porque tu debe atende na miting del maga Testigo de Jehova? Cosa tu hay experienciá alla?

El alegria junto con el maga amable gente. Del primer siglo, el maga Cristiano na cada congregacion ta man junto-junto para adora con Dios, estudia con el Escritura y para anima con uno y otro. (Maga Hebreo 10:24, 25) Cay tiene sila amor na uno y otro, ya sinti sila que junto kanila el diila deverasan maga amigo—maga hermano y hermana na fe. (2 Tesalonica 1:3; 3 San Juan 14) Ese tambien el cosa tu hay experienciá na diamon maga miting ahora.

Hay aprende tu si paquemodo aplica el maga principio na Biblia. Na igual manera como cosa ta dale mira na Biblia, ta man junto-junto tambien na miting el maga hombre, mujer y maga bata. El maga qualificao hombre ta usa con el Biblia para ayudá kanaton hace entende si paquemodo aplica el maga principio na diaton vida. (Deuteronomio 31:12; Nehemias 8:8) Todo puede dale comento y participa na cancion cay este un manera para honra y alaba con Dios.—Maga Hebreo 13:15.

Queda mas fuerte el de tuyu fe con Dios. Si apostol Pablo ya habla na uno del maga congregacion na su tiempo: “Quiere gayot yo anda visita con ustedes para . . . puede kita dale animo con uno y otro por causa del di aton fe.” (Roma 1:11, 12, El Nuevo Testamento) Si pirmi tu man junto na maga hermano y hermana durante el miting, queda fuerte el de tuyu fe y determinacion vivi como un Cristiano.

Quierre ba tu experienciá el cosa ya menciona arriba? Ta invita kame contigo para atende na diamon maga miting. Alegre kame mira contigo alla. Nuay tu cosa debe paga y nuay coleccion.

• Cosa ejemplo kame ta sigui na diamon maga miting?

• Cosa tu puede beneficia si tu hay atende na diamon maga miting?