Si ta estudia tu el Biblia junto na maga Testigo de Jehova, posiblé ta prepara tu adelantao con el cosa ustedes hay estudia. Hay beneficia tambien tu si prepara tu antes de atende na maga miting y mas bueno el resulta si pirmi tu se hace.

Decidi si cuando y onde hay estudia. Cuando ba tu ta puede concentra na de tuyu estudiada? Aga ba, antes de principia el de tuyu trabajo? O denoche, si durmido ya el maga bata? Dale tiempo na de tuyu estudiada maskin unrato lang y no permiti que tiene maskin cosa entrevini contigo. Iscuji un lugar silencio y quita todo cosa que posiblé distorba na de tuyu estudiada, igual el radio, televicion y cell phone. Si hay reza tu antes de estudia, hay ayudá se para ulvida tu el de tuyu maga lingasa na entero dia y puede tu concentra na estudiada del Palabra del Dios.—Filipo 4:6, 7.

Marcá con el cosa tu ta estudia y prepara para man comento. Mira una si cosa el tema del cosa tu hay estudia. Considera con el titulo del articulo o capitulo y si cosa el coneccion del cada subtitulo na tema. Examina tambien el maga letrato y el maga pregunta de repaso que ta dale mira si cosa el maga importante punto. Despues, le con el cada parapo y busca con el contestacion na maga pregunta. Le con el maga texto que ya cita y pensa si paquemodo este ta suporta con el cosa tu ta estudia. (Maga Actividad 17:11) Si sabe ya tu el contestacion na maga pregunta, marcá con el maga importante palabra o frase para acorda tu el contestacion. Durante el miting, puede tu alsa mano para dale corto comento asegun na cosa tu ya entende.

Si prepara tu cada semana para na maga miting, hay omenta el de tuyu saber na Biblia.—Mateo 13:51, 52.

• Para puede tu prepara na maga miting, cosa tu debe hace?

• Paquemodo tu prepara comento para na miting?