Cuando cerca ya muri si Jesus, ya habla le: “Este Buen Noticia acerca del Reino ay anuncia na entero mundo, para man testigo con todo el maga nacion. Entonces ay llega ya el fin.” (Mateo 24:14) Pero paquemodo hace con ese trabajo de predicacion na entero mundo? Cuando taqui pa na tierra si Jesus, ya dale le mira si paquemodo con ese hace.—Lucas 8:1.

Ta anda kame con el maga gente na diila casa. Del primer siglo, ya enseña si Jesus con su maga dicipulo que predica el buen noticia na casa en casa. (Mateo 10:11-13; Maga Actividad 5:42; 20:20) Ya dale le kanila maga teritorio para donde predica. (Mateo 10:5, 6) Na igual manera, bien organizao tambien el diamon trabajo de predicacion ahora y el cada congregacion tiene maga teritorio que debe cubri. Por medio de ese, ta puede kame visitá na mas manada gente mientras ta pricura kame cumpli con el mandato de Jesus que ‘predica na maga gente.’—Maga Trabajo 10:42, El Nuevo Testamento.

Ta predica kame maskin onde tiene gente. Ya predica si Jesus na maga de publico lugar, igual na aplaya o na pozo. (Marcos 4:1; Juan 4:5-15) Ta converza tambien kame na maga gente acerca na Biblia maskin onde—na maga calle, lugar de negocio, parque o maskin por medio de telefono. Si tiene oportunidad, ta predica tambien kame na diamon maga vicinos, classmate, ubán na trabajo y na maga pariente. Por medio con ese maga esfuerzo, millones maga gente na entero mundo el ya puede ya oi con ‘el buen noticia del salvacion.’—Salmo 96:2.

Tiene ba tu con quien quierre converza acerca el buen noticia del Reino del Dios y si cosa el maga beneficio de ese? No esconde con ese mensaje de esperanza. Mientras tiene pa tiempo, predica kanila!

• Acerca de cosa el “buen noticia” que debe anuncia?

• Paquemodo ta sigui el maga Testigo de Jehova con el manera del predicacion de Jesus?