Ya puede ba tu observa na maga letrato con el maga Testigo de Jehova si paquemodo sila de mudao si ta atende na maga miting? Porque man bien importante para kanamon que decente kame mudá?

Ta dale kame mira respeto con el diamon Dios. Deveras, el Dios gendeh ta mira con el maga gente asegun na diila maga ichura. (1 Samuel 16:7) Pero si tan junto kame para adora con Dios, quierre kame dale mira el diamon respeto con ele y para con el diamon maga hermano y hermana na fe. Si invita kanaton el un rey o el presidente na de suyu casa, asigurao hay mudá gayot kita enbuenamente cay quierre kita dale mira que ta respeta kita con el de suyu posicion. Na igual manera, si kita hay mudá decente ta dale kita mira el diaton respeto con “el Rey eterno,” si Jehova, y na lugar onde kita ta adora con ele.—1 Timoteo 1:17.

Para dale mira que ta vivi kame asegun na principio del Biblia. Ta anima el Biblia con el maga Cristiano que “usa camisa decente.” (1 Timoteo 2:9, 10) Quierre decir, evita kita usa maga ropa que ta saca atencion del otro igual maga camisa bien corto y gendeh arreglao. Gendeh tambien debe por demas el diaton mudada. Pero gendeh este quierre decir que gendeh ya kita puede bisti otro maga ropa que quierre ta. Por medio na diamon decente y bonito mudada na maga miting, ta puede kame “lleva alabanza con el enseñanza acerca de Dios” y ‘dale gloria’ con ele. (Tito 2:10, El Nuevo Testamento; 1 Pedro 2:12) Ta dale kame mira con otro si paquemodo de importante el adoranza con Jehova.

Numa tiene huya atende na Kingdom Hall maskin nuay tu formál camisa. Gendeh man necesita que de caro el de tuyu ropa. El importante limpio, presentablé y justo el de tuyu mudada.

• Paquemodo de importante el diaton mudada si ta adora kita con Dios?

• Cosa principio debe guiá kanaton si ta iscuji kita ropa y si paquemodo kita ta mudá?