El Mirada del Biblia

Debe Ba Tu Participa na Maga Peligroso Sport?

“NA ESTE MAGA TIEMPO MAS TA QUEDA MANADA EL GENDEH CONFORME MIRA LANG SINO SILA MISMO EL TA SALTA NA EROPLANO PARA MAN PARACHUTE, TA SUBI NA PANGPANG DEL MAGA MONTE, TAN KAYAK Y TA PASA NA MAGA BUSAY Y TA NADA JUNTO NA MAGA TIBORON.”—THE WILLOW GLEN RESIDENT NEWSPAPER.

ESTE comento ta dale mira que ta queda uso el maga sport. El maga peligroso sport que bien popular ya ahora, igual na skydiving, ice climbing, paragliding y BASE jumping * ta dale mira que el mundo quierre-quierre na maga peligroso sport. Ta usa tambien con el maga snowboard, mountain bike, skateboard y rollerskate para puede man lampas con el personal limitacion por medio que subi na maga de con todo alto monte, na maga de con todo alto pangpang y para hace el maga de con todo alto saltada. Como cosa ya habla el Time magasin, el pagka-popular del “maga peligroso sport”—el maga sport que donde necesita hace peligroso cosa el quien ta participa—ta dale mira el gana del millones para participa na “figurativo limitacion donde el peligro, abilidad y miedo, ta dale con aquellos quien ta participa na fin del semana lang o weekend warrior y amo tambien con el maga profesional atleta que sinti sila que ya puede sila man lampas na diila personal limitacion.”

Cay ta queda mas popular este maga peligroso sport y el gente ta hace con el maga normal sport na mas peligroso manera, manada el ta sinti duele. Na United States durante el 1997, el maga paciente na emergency-room quien yan accidente na skateboarding ya subi na mas de 33 por ciento, para na snowboarding 31 por ciento y para na mountain climbing 20 por ciento. Gane na otro maga sport mas grabe pa el resulta ciendo ya subi el numero del maga muerto que tiene que hace na maga peligroso sport. El maga gente quien ta hace con este maga sport sabe que peligroso este. El un mujer quien ya participa na un peligroso skiing ya habla: “Pirmi yo ta pensa que puede yo muri.” El un profesional snowboarder ya habla acerca con ese que “si gendeh tu sinti duele, quierre decir gendeh tu ta hace el todo.”

Ahora cay sabe ya kita si paquemodo de peligroso este maga sport, debe ba el maga Cristiano juga con este? Paquemodo el Biblia puede ayuda kanaton si ta decidi si debe ba kita participa na maga peligroso sport? Si considera kita si cosa el mirada del Dios acerca na pagka-sagrao del vida hay puede se ayuda kanaton para contesta con ese maga pregunta.

El Mirada del Dios na Vida

El Biblia ta habla kanaton que si Jehova amo el “Tuburan del vida.” (Salmo 36:9) Puera que ya crea le con el maga gente, ya hace tambien le grande esfuerzo para dale kanaton el diaton necesidad para queda alegre. (Salmo 139:14; Maga Actividad 14:16, 17; 17:24-28) Poreso, razonable lang para pensa que ta expecta le kanaton que cuida con el cosa le ya dale kanaton. El maga ley y principio que ya dale na nacion del Israel puede ayuda kanaton aprecia con ese verdad.

El Ley de Moises ta pidi con el individual que hace maga manera para protege con el vida del otro. Si nuay con este hace y tiene vida ya perde, el persona quien puede era previni con el tragedia hay considera como culpable de sangre. Por ejemplo, ya manda con el maga dueño de casa que pone un barandilla alrededor del techo del de suyu nuevo casa. Si gendeh le hace con este hay queda le culpable de sangre si tiene quien ya cae na techo y ya muri. (Deuteronomio 22:8) Si el un toro ya curnia con el un persona y ya muri este, el dueño del toro gendeh queda responsable na de este muerte. Pero, si conocido con el toro que peligroso y ya dale ya aviso con el dueño de este pero nuay le guarda con este enbuenamente, si tiene con quien ya curnia el toro puede considera con el dueño de este como culpable de sangre y puede con ele mata. (Exodo 21:28, 29) Ciendo precioso con Jehova el vida, el de suyu ley ta dale mira que importante que preserva y protege con el vida.

El maga fiel siervo del Dios ta entende que este maga principio puede tambien aplica na hacida del maga peligroso cosa. Na Biblia puede kita le que si David ya expresa con el de suyu deseo que “toma agua estaba na pozo na grande fuerte del Betlehem!” El Betlehem bajo na control del Filisteo na aquel tiempo. Cuando ya puede quel oi el tres soldao de David, ya pricura sila entra na campo del maga Filisteo, ya saca agua estaba na pozo na Betlehem y ya lleva este con David. Cosa el reaccion de David? Nuay le toma con el agua sino ya vacia le este na tierra. Ele ya habla: “Gendeh gayot yo puede toma con el sangre de este maga hombre quien ya pone na peligro el diila vida cay gendeh este ta hace alegre con el de mio Dios! Ya pone sila na peligro el diila vida cuando ya saca sila con este.” (1 Cronicas 11:17-19) Para con David gendeh gayot bueno que pone na peligro con el vida para lang satisfecha con el cosa le quierre.

Semejante tambien el reaccion de Jesus cuando ya tenta con ele el Diablo, posible por medio na un vision, que salta estaba na templo para mira si protege ba con ele el maga angel. Si Jesus ya contesta: “No tenta [“pone na probanza,” NWT] con el Señor, el dituyo Dios.” (Mateo 4:5-7, El Nuevo Testamento na Chavacano) Si, sabe si David y Jesus que gendeh justo na vista del Dios para hace maga peligroso cosa que puede pone na peligro el vida del gente.

Na ese maga ejemplo posible kita pregunta, “Paquemodo kita puede sabe si cosa maga sport el peligroso? Ciendo el cuanto gente ta juga con el maga sport na peligroso manera, paquemodo kita puede sabe si cosa el justo manera para juga?

Debe Ba Pone na Peligro con el Vida Por Causa con Este?

Para puede hace justo decision debe kita pensa enbuenamente acerca con el sport que quierre kita juga. Por ejemplo, puede kita pregunta con el diaton mismo cuerpo, ‘Paquemodo de manada el ta accidenta na este sport? Tiene ba yo el training o el gamit para evita el desgracia? Cosa sucede si ya cae yo o gendeh justo el de mio saltada o ya queda malo el de mio safety equipment? Gendeh ba yo tanto sinti duele o tiene posibilidad que tene serioso injury o muri?’

Si el un Cristiano intencional hace maga peligroso cosa para lang na recreacion, puede se afecta na de suyu precioso relacion con Jehova y con el de suyu cualificacion para na maga especial privilegio na congregacion. (1 Timoteo 3:2, 8-10; 4:12; Tito 2:6-8) Claro que maskin na maga recreacion, el maga Cristiano necesita considera si cosa el mirada del Creador na pagka-sagrao del vida.

[Footnote]