Ya Acepta Yo el Mirada del Dios na Sangre

Ya Relata el Un Doctor con el De Suyu Istoria

NA AUDITORIUM yo quel del un hospital y ta dale sumario na maga resulta del un autopsy na un grupo de maga doctor. El paciente quien ya muri tiene un grabe tumor y ya habla yo, “Puede kita habla que el razon si porque ya muri el paciente amo por causa na hemolysis [ya muri el maga red blood cells] y ya queda malo el riñon del paciente por causa cay ya abona con ele manada sangre.”

El un professor ya levanta y ya grita, “Quierre decir mali el sangre que ya pone kame?” Ya contesta yo, “Gendeh se el cosa yo quierre decir.” Ya dale yo kanila mira cuanto letrato de maga diutay seccion del riñon del paciente y ya habla yo, “Puede kita mira que ya muri el manada maga red blood cells na riñon [lysis] y puede kita habla que por causa con ese, ya queda malo el riñon.” * Puede gayot sinti el tension na alrededor y ya queda seco el de mio boca por causa na nervios. Maskin un joven doctor lang yo y un professor le, ya sinti yo que nuay razon para cambia yo con el cosa yo ya habla.

Cuando ya sucede este incidente, gendeh pa yo un Testigo de Jehova. Ya nace yo del 1943 na Sendai, un ciudad na norte parte del Japan. Ciendo un pathologist y psychiatrist el de mio tata, ya decidi yo que saca curso medicina. Del 1970, durante el de mio segundo año na medical school, ya casa yo con el un joven mujer que si Masuko.

Ya Estudia Yo Pathology

Ya trabaja si Masuko para puede yo acaba entra escuela. Quierre-quierre yo con el cosa yo ta aprende na curso de medicina. Yan bilib gayot yo si paquemodo de bonito ya diseña con el cuerpo del gente! Maskin pa ansina, nuay gayot yo pensa que tiene Creador. Pensaba yo el medical research puede dale proposito con el de mio vida. Poreso despues yo queda un doctor, ya decidi yo que estudia pathology para aprende pa mas si paquemodo el maga enfermedad ta afecta kanaton.

Cuando ya examina yo con el cuerpo del maga paciente quien ya muri por causa na cancer, ya principia yo man duda si efectivo ba gayot el abonada de sangre. El maga paciente quien tiene grabe cancer posible anemic y bien maluya. El chemotherapy puede con ese hace mas grabe poreso mas mucho, el maga doctor ta recomenda que abona sangre. Pero, ya puede yo pensa que el abonada de sangre ta hace mas calayat con el cancer. Ahora, sabe el maga doctor que el abonada de sangre puede hace mas maluya con el maga paciente quien tiene cancer. Puede tambien este hace bira con el cancer na paciente y mas dificil ya para kanila que queda bueno. *

Del 1975, ya sucede el incidente que ya menciona yo na principio de este articulo. El professor amo un especialista del maga enfermedad de sangre y ele el ta agarra el caso del paciente quien ya muri. Poreso, gendeh mas maka-estraña que ya queda le bien rabiao cuando ya oi le conmigo que ya habla que ya muri el paciente por causa na abonada de sangre! Maskin pa ansina, ya continua yo con el de mio presentacion y hinay-hinay le ya queda calmao.

Nuay Mas Enfermedad o Muerte

Aquel tiempo, tiene un de edad mujer que uno del maga Testigo de Jehova quien ya visita con el de mio mujer. Ya menciona le con el palabra “Jehova” mientras ta converza. Ya pregunta el de mio mujer si cosa quel quierre decir. El Witness ya contesta, “Jehova el nombre del verdadero Dios.” Desde bata, ta le ya si Masuko con el Biblia pero na de suyu Biblia, ya cambia con el nombre del Dios na “SEÑOR.” Ahora, ya puede le sabe que tiene nombre el Dios!

Si Masuko ya principia dayun estudia con el Biblia junto con el de edad Witness. Cuando ya bolbe yo estaba na hospital maga 1:00 a.m., el de mio mujer alegre ya habla conmigo, “El Biblia ya habla que perde ya el enfermedad y muerte!” Ya contesta yo, “Bien bonito se!” Ya continua le habla, “Ciendo cerca ya el nuevo mundo, no quierre mas yo que hace tu usik el de tuyu tiempo.” Pensaba yo quierre le que descanza ya yo queda doctor, poreso ya rabia yo y ya queda malo el diamon relacion.

Nuay descanza el de mio mujer converza conmigo acerca na Biblia. Ya reza le con Dios que ayuda con ele busca maga justo texto para dale mira conmigo. El maga palabra na Eclesiastes 2:22, 23 ya alcanza na de mio corazon: “Cosa ba gayot puede saca el gente na de suyu todo esfuerzo y na de suyu ambicion que ta manda move con ele para trabaja gayot bajo na sol? . . . Gendeh ta puede descanza el de suyu corazon maskin de noche. Envano tambien este.” Dol ansina el cosa yo ta hace—ta trabaja yo de dia y de noche pero gendeh yo deverasan alegre.

Un Domingo aga del Julio 1975, cuando ya anda el de mio mujer na Kingdom Hall del maga Testigo de Jehova, bigla lang yo ya decidi que anda tambien. Bien espantao el de mio mujer cuando ya mira le conmigo alla y yan welcome gayot conmigo el maga Witness. Desde aquel, cada Domingo ya yo ta atende miting. Un mes despues, ya principia yo man Bible study junto na un Witness. Tres meses despues del primer visitada del maga Testigo de Jehova na de mio mujer, ya bautiza le.

Ya Acepta Yo con el Mirada del Dios na Sangre

Nuay dura, ya aprende yo que el Biblia ta habla que el maga Cristiano debe ‘evita con el sangre.’ (Maga Actividad 15:28, 29, NWT; Genesis 9:4) Ciendo daan ya yo tan duda si efectivo ba el abonada de sangre, nuay yo man dificil acepta con el mirada del Dios acerca na sangre. * Ya pensa yo, ‘Si tiene un Creador y amo se el cosa le ta habla, quierre decir justo se.’

Ya aprende tambien yo que ta enferma y ta muri el maga gente por causa na pecado que ya hereda kita con Adan. (Roma 5:12) Aquel tiempo, tan research yo acerca na arteriosclerosis. Mientras ta queda kita de edad, ta queda duro el diaton maga artery y ta queda diutay el pasada del sangre, y este ta causa maga grabe enfermedad. Para conmigo, justo lang que el causa de este amo el imperfeccion que ya hereda kita. Desde aquel, ya principia ya perde el de mio interes na estudiada acerca na medicina. Si Dios Jehova lang el quien puede quita con el enfermedad y muerte!

Del Marzo 1976, siete meses despues yo principia man Bible study, ya descanza yo na de mio estudiada acerca na medicina. Ya tiene yo miedo que baka gendeh mas yo puede trabaja otravez como un doctor pero ya incuntra yo trabajo na otro hospital. Ya bautiza yo del Mayo 1976. Ya pensa yo que el de con todo buen manera para usa yo con el de mio vida amo que predica full-time o queda un pioneer. Ya principia yo se hace del Julio 1977.

Ya Defende Yo con el Mirada del Dios Acerca na Sangre

Del Noviembre 1979, ya cambia kame de Masuko na un congregacion na Chiba Prefecture donde poco lang el publisher. Ya incuntra yo un hospital onde puede yo trabaja part-time. Na de mio primer dia na trabajo, tiene un grupo de maga surgeon que ya atraca conmigo. Gendeh sila ta descanza pregunta conmigo, “Como un Testigo de Jehova, cosa tu hace si tiene un paciente que necesita abonada de sangre?”

Con respeto yo ya explica que hay sigui yo con el mandamiento del Dios acerca na sangre. Ya habla yo que en vez abona sangre, tiene pa otro maga manera que puede yo usa para ayuda con el de mio maga paciente y hay hace yo el todo que puede yo hace. Despues del un hora discusion, el chief surgeon ya habla, “Ta entende yo. Pero si tiene un paciente que ya perde bien manada sangre, kame ya lang el cuidao con ele.” Despues de ese discusion, ya puede kame tiene buen relacion del chief surgeon maskin conocido con ele como un persona con quien tormento para man junto. Pirmi ya tambien le ta respeta con el de mio creencia.

Ya Pone na Probanza con el De Mio Mirada na Sangre

Mientras ta sirvi kame na Chiba, tiene ta construi un nuevo headquarters para na maga Testigo de Jehova na Japan na Ebina. Ta anda kame alla del de mio mujer una vez cada semana para mira con el salud del maga Witness quien tan volunteer na construida de este facilidad que ta llama Bethel. Despues del cuanto meses, ya invita kanamon que sirvi full-time na Ebina Bethel. Poreso del Marzo 1981, ya principia kame esta na maga temporario facilidad onde ta queda el mas de 500 maga volunteer. Si de dia, ta ayuda yo limpia con el maga CR na construction site y si tarde, tan volunteer yo como doctor.

Uno del de mio maga paciente amo si Ilma Iszlaub de Australia quien ya anda na Japan como un misionario del 1949. Tiene le leukemia y ya habla con ele el de suyu maga doctor que cuanto meses ya lang el de suyu vida. Nuay le acepta con el abonada de sangre y ya decidi le que esta na Bethel hasta muri. Aquel tiempo, nuay pa maga medicina que ta ayuda para produci manada maga colorao celula igual na erythropoietin. Poreso, tiene vez el de suyu hemoglobin 3 o 4 gramo lang! (El normal amo 12 hasta 15.) Pero, ya hace yo el todo para pricura cura con ele. Ya continua si Ilma demonstra con el de suyu fuerte fe na Palabra del Dios hasta cuando ya muri ele del Enero 1988—maga siete año pa el ya pasa!

Adentro na cuanto maga año, manada maga volunteer na branch office del maga Testigo de Jehova na Japan el necesita operacion. Ta rindi kame gracias que el maga doctor na maga cerca hospital ta puede hace con el maga operacion que gendeh ta usa sangre. Manada beses, ta invita conmigo para observa con el maga operacion y tiene vez, ta asisti pa gane yo kanila. Ta aprecia yo con aquellos maga doctor quien ta respeta con el mirada del maga Testigo de Jehova na sangre. Mientras ta trabaja junto kanila, ta puede tambien yo converza kanila acerca na cosa yo ta creé. Nuevo lang, el uno del maga doctor ya queda un Testigo de Jehova.

Tiene gayot buen resulta el esfuerzo del maga doctor que cura con el maga Testigo de Jehova que gendeh ta usa abonada de sangre. El ansina clase de maga operacion ya puede dale prueba que tiene maga beneficio si gendeh abona sangre. Ahora, sabe kita que na ansina manera de operacion, mas paspas ta queda bueno el paciente.

Ta Continua Yo Aprende na De Con Todo Buen Doctor

Ta continua yo pricura aprende acerca na maga nuevo manera de curada. Pero, ta continua tambien yo aprende na de con todo buen Doctor, si Jehova. Gendeh lang le ta mira con el diaton ichura, sino con el diaton entero personalidad. (1 Samuel 16:7) Como un doctor, si ta cura yo con el paciente, gendeh yo tan focus na de suyu lang enfermedad sino ta considera yo con el de suyu personalidad. Por causa con ese, mas ta puede yo cuida enbuenamente con el de mio maga paciente.

Ta sirvi siempre yo na Bethel. El un cosa que ta dale conmigo grande alegria amo si ta puede yo ayuda con otro aprende acerca con Jehova, incluido el de suyu mirada na sangre. Ta reza yo que ojala, gendeh mas dura, el De Con Todo Buen Doctor, si Dios Jehova, hay quita ya con el todo enfermedad y muerte.—Asegun na istoria de Yasushi Aizawa.

[Maga footnote]

[Blurb]

“Ya habla yo que en vez abona sangre, tiene pa otro maga manera que puede yo usa para ayuda con el de mio maga paciente y hay hace yo el todo que puede yo hace”

[Blurb]

“El ansina clase de maga operacion ya puede dale prueba que tiene maga beneficio si gendeh abona sangre”

[Maga letrato]

Arriba: Ta dale talk que base na Biblia

Derecha: Junto con el de mio mujer, si Masuko