El Camisa y Mudada Ya Queda Sanggadura Para Conmigo

ASEGUN NA ISTORIA DE EILEEN BRUMBAUGH

YA ENGRANDA yo na religion de Old Order German Baptist Brethren que semejante na maga religion del maga Amish y Mennonite. Este religion ya principia na Germany del 1708. El The Encyclopedia of Religion ya habla que este religion ya principia cay convincido el cuanto maga gente que el todo necesita oi con el buen noticia acerca con el Cristo. Por causa con ese, ya imbia sila maga misionario na manada nacion.

Del 1719, el un diutay grupo ya anda na cosa ta llama ahora Pennsylvania, na United States. El lider de este amo si Alexander Mack. Desde aquel tiempo, este grupo ya queda dividido na manada grupo. El cada grupo tiene diila mismo interpretacion acerca na maga enseñanza de Alexander Mack. El diamon iglesia tiene maga 50 miembro. Ya enseña kanamon que bien importante que le con el Biblia y sigui con el todo decision del maga lider del iglesia.

Bien largo tiempo ya miembro el diamon familia de este religion. Ya bautiza yo cuando 13 año yo. Ya enseña conmigo mientras ta engranda yo que malo tene o usa vehiculo, tractora, telefono, radio o maskin cosa que ta usa corriente. Simple lang el mudada del maga mujer. Gendeh kame ta curta con el diamon pelo y pirmi kame ta tapa con el diamon cabeza. El maga hombre tiene barbas. Ciendo ya habla si Jesus que gendeh debe queda parte de este mundo, pensaba kame malo usa maga moderno camisa, makeup o alajas.

Ya enseña kanamon que tene hondo respeto na Biblia cay Palabra este del Dios. Cada aga antes almorza, tan junto-junto kame na sala y ta oi con Papang le con el un capitulo na Biblia y dale comento na cosa le ya le. Despues, ta hinca kame todo mientras ta reza si Papang. Acabar, ta repiti si Mamang con el Rezo del Señor. Quierre-quierre gayot yo con ese tiempo ciendo tan junto el diamon entero familia y ta pensa maga espiritual cosas.

Ta queda kame cerca na Delphi, Indiana, donde ta siembra kame diferente clase de gulay. Ta lleva kame con ese na pueblo por medio de carruaje que ta hala el caballo y despues, ta vende kame con ese na calle o na maga casa. Para kanamon, parte del diamon servicio con Dios que trabaja enbuenamente. Poreso, ta trabaja gayot kame puera lang si Domingo cay ta considera kame con este como Sabbath. Pero tiene vez, ta queda kame bien ocupao na diamon trabajo que dificil ya continua man focus na maga espiritual cosas.

Matrimonio y Familia

Del 1963, cuando 17 yo, ya casa yo con James, un miembro tambien del Old Brethren. El maga mayores del de suyu maga aguelo y aguela miembro tambien de ese religion. Igual kame dos que tiene fuerte deseo que sirvi con Dios y ta creé que el diamon religion lang el deverasan.

Del 1975, tiene ya kame seis anak y del 1983, ya nace el diamon ika-siete y ultimo anak. Si Rebecca, el diamon segundo anak, amo lang el mujer. Ta trabaja gayot kame enbuenamente, diutay lang ta gasta y ta vivi simple vida. Ta pricura kame enseña con el diamon maga anak el maga principio na Biblia que ya aprende kame na diamon mayores y con otro na diamon religion.

Importante gayot kanamon na Old Brethren el diamon ichura y mudada. Ta creé kame que ciendo nuay quien ta puede le con el corazon, el mudada del un persona ta revela si cosa le clase de gente. Poreso si sobra el arreglada del pelo del un mujer, para kanamon indicacion este de orgullo. Si bien grande el diseño na tela del camisa, indicacion tambien este de orgullo. Tiene vez, dol mas importante pa este maga ley contra na cosa ta habla el Biblia.

Ya Aprende el Verdad na Preso

Na ultimo parte del decada 1960, yan preso el hermano del de mio marido que si Jesse, quien miembro tambien del Old Brethren, cay nuay le conforma queda soldao. Mientras talla le na preso, ya puede le conoce con el maga Testigo de Jehova quien ta creé tambien que gendeh uyun na maga principio na Biblia que participa na guerra. (Isaias 2:4; Mateo 26:52) Manada beses ya puede man cuento si Jesse con el maga Testigo acerca na Biblia y ya puede observa con el diila custumbre. Despues del manada sesion de Bible study, ya bautiza le como uno del maga Testigo de Jehova y nuay gayot kame gusta con ese.

Si Jesse yan cuento con el de mio marido acerca na cosa le ya aprende. Ya hace tambien le manera para regular ricibi si James con el maga magasin Watchtower y Awake! Por causa con este maga magasin, si James ya queda mas interesao na Biblia. Ciendo bien quierre si James que sirvi con Dios pero ta sinti que lejos Le, bien interesao le sabe si cosa le necesita hace para queda mas cerca con Dios.

El diamon maga anciano ya anima kanamon que le con el maga magasin del maga Amish, Mennonite y otro maga religion del Old Brethren, maskin pa ta considera kame con este maga religion como parte del mundo. Pero, el de mio tata contra gayot na maga Testigo. Para con ele, gendeh gayot kame debe le con el The Watchtower y Awake! Poreso, bien malingasa gayot yo cuando ya mira yo con James que ta le con ese. Ya tiene yo miedo que baka aprende le y acepta maga falso enseñanza.

Pero, tarda ya tan duda si James acerca na cuanto maga enseñanza del Old Brethren cay ta sinti le que contra este na Biblia, especialmente el enseñanza que un culpa que hace maskin cosa pesao trabajo si Domingo. Por ejemplo, ta enseña el Old Brethren que puede lang dale toma agua con el maga animal si Domingo pero gendeh puede arranca sahbut. El maga anciano nuay con ele puede dale mira razon base na Biblia acerca na ese ley. Hinay-hinay, yan duda tambien yo acerca con ese maga enseñanza.

Desde antes, ya enseña kanamon que na deverasan religion kame y que hay tene kame manada problema si sale kame aqui. Poreso, yan dificil kame deja con este religion. Pero, el diamon conciencia gendeh mas ta permiti kanamon que esta na un religion que gendeh ta sigui con el todo verdad na Biblia. Poreso del 1983, ya escribi kame carta que ta explica si porque kame deja con ese religion y ya pidi que le con este carta na congregacion. Yan disfellow kanamon na ese religion.

Ya Busca Kame con el Deverasan Religion

Despues, ya principia kame busca con el deverasan religion. Ta busca kame con el religion que ta aplica con el maga cosas que ta enseña sila con el maga gente que hace. Una, nuay kame inclui na diamon lista el maskin cosa religion que ta participa na guerra. Quierre siempre kame con el maga religion que “simple” lang el vida y mudada cay ta sinti kame que indicacion se que gendeh sila parte del mundo. Del 1983 hasta 1985, ya viaja kame na entero United States para examina con el diferente maga religion​—con el maga Mennonite, Quaker y otro maga “simple” religion.

Durante ese tiempo, ya visita kanamon el maga Testigo de Jehova cerca na Camden, Indiana. Ya oi kame kanila pero ya pidi que con el King James version del Biblia lang sila usa. Bilib yo con el decision del maga Testigo acerca na guerra. Pero, ya pensa yo que parte siempre sila del mundo y gendeh el deverasan religion cay gendeh sila ta muda igual kanamon. Ya sinti yo que orgulloso aquellos quien ta usa maga moderno camisa y gamit.

Si James ya principia anda na Kingdom Hall del maga Testigo de Jehova y ya lleva con el cuanto del diamon maga anak hombre. No quierre gayot yo quel. Ta convida conmigo el de mio marido que sigui con ele pero nuay yo conforma. Despues, un dia ya habla le, “Maskin gendeh tu tan uyun na diila maga enseñanza, anda lang y observa si paquemodo sila ta trata con uno y otro.” Alli le yan bilib kanila.

Despues del cuanto tiempo, ya decidi yo que sigui pero con cuidao gayot yo. Ya anda yo na Kingdom Hall que ta visti simple ropa y de bonnet. De pies-pies el cuanto del diamon maga anak hombre y simple lang tambien el diila ropa. Pero, el maga Testigo ya atraca kanamon y ya trata kanamon enbuenamente. Ya pensa yo, ‘Diferente el diamon ichura pero ya acepta siempre sila kanamon.’

Bilib yo cay amable sila pero determinao siempre yo que observa lang. Nuay yo para o gane maskin canta con el diila cancion. Despues del miting, ya pregunta yo kanila acerca na manada cosas que ta pensa yo que gendeh sila justo ta hace o si cosa quierre decir del un texto. Maskin pa nuay yo tanto respeto ta converza, el cada uno ya dale gayot mira sincero interes conmigo. Bilib tambien yo cay ya dale yo igual pregunta con el diferente maga persona pero igual-igual el diila contestacion. El otro ya escribi con el diila contestacion y ya puede gayot se ayuda conmigo ciendo ya puede yo con aquel estudia cuando solo-solo yo.

Del 1985, el diamon familia ya atende na un convencion del maga Testigo de Jehova na Memphis, Tennessee​—para observa lang. Tiene siempre barbas si James y simple siempre el diamon ropa. Durante el maga intermission, ralo lang que nuay kanamon quien ta atraca. Ya gusta gayot kame con el amor y personal interes que ya dale sila mira. Bilib tambien kame con el diila unidad cay maskin onde kame atende miting, igual lang el cosa sila ta enseña.

Por causa na personal interes que ya dale mira el maga Testigo, ya acepta un Bible study si James. Ya examina le con el todo cay quierre le asigura que justo el cosa le ta aprende. (Maga Actividad 17:11; 1 Tesalonica 5:21) Despues del cuanto tiempo, ya queda convincido si James que ya incuntra ya le el verdad. Pero iyo gendeh pa ta puede decidi. Quierre yo hace si cosa el justo pero no quierre yo queda “modern” o queda “de mundo.” Cuando ya conforma yo que sigui na Bible study, tiene yo copia de King James Version y el mas moderno New World Translation. Ya chequia yo con el cada texto na ese dos translation para asigura que gendeh conmigo ta engaña.

Si Paquemodo Yo Ya Queda Convincido

Mientras ta estudia kame junto con el maga Testigo, ya aprende kame que el diaton Tata na cielo amo un Dios y gendeh tres na un Dios, y que nuay kita imortal alma sino kita mismo el alma. (Genesis 2:7; Deuteronomio 6:4; Ezequiel 18:4; 1 Corinto 8:5, 6) Ya aprende tambien kame que el infierno amo el comon sepultura del todo maga gente y gendeh un lugar donde ta castiga kanila. (Job 14:13; Salmo 16:10; Eclesiastes 9:5, 10; Maga Actividad 2:31) Uno se del maga cosas que ya convinci kanamon que ya incuntra kame con el verdad, ciendo el maga miembro del diamon religion de antes gendeh tan uyun si cosa se quierre decir.

Pero, yan duda siempre yo si el maga Testigo ba gayot el deverasan religion cay para conmigo, parte siempre sila del mundo. Gendeh sila ta vivi “simple” vida que para conmigo bien importante. Pero, sabe tambien yo que ta cumpli sila con el mandamiento de Jesus que predica con el buen noticia acerca del Reino con todo maga gente. Yan libug gayot yo!​—Mateo 24:14; 28:19, 20.

Durante ese tiempo, el amor del maga Testigo ya ayuda conmigo para continua el de mio investigacion. El entero congregacion ya dale mira personal interes na diamon familia. Manada kanila el ta visita kanamon​—tiene vez ta cumpra con el diamon leche y huevos para lang visita kanamon. Por causa con ese, ya principia kame mira kanila como maga deverasan buen gente. Maskin pa un Testigo lang el tan Bible study kanamon, nuay se sangga con el otro maga Testigo para visita kanamon. Cada vez cerca sila na diamon casa, ta visita sila. Necesita kame con este maga oportunidad para mas conoce con el maga Testigo y ya puede kame realiza que sincero el interes y amor que ta dale sila mira.

Gendeh lang el maga Testigo na cerca congregacion el ya dale mira personal interes kanamon. Cuando tan dificil yo acepta con el camisa y mudada del maga Testigo, ya visita conmigo si Kay Briggs, un Testigo de otro congregacion quien ya iscuji que muda simple y gendeh man makeup. Ya sinti yo comfortable que man cuento y man junto con ele. Despues, un dia, ya visita conmigo el un hermano que si Lewis Flora quien ya engranda tambien na un “simple” religion. Ya puede le mira que bien destorbao yo poreso ya imbia le conmigo un carta que tiene diez pagina para alivia con el de mio lingasa. Ya puede gayot yo llura na cosa le ya hace y manada beses yo ya le con el de suyu carta.

Ya pidi yo con el un traveling overseer que si Hermano O’Dell que explica conmigo si cosa quierre decir del Isaias 3:18-23 y 1 Pedro 3:3, 4. Ya pregunta yo: “Gendeh ba ese maga versiculo ta dale mira que necesita kita muda simple para puede hace alegre con Dios?” Ya contesta le: “Malo ba usa bonnet? Malo ba hace trenzas con el pelo?” Na Old Brethren, ta hace kame trenzas con el pelo del maga bata y el maga mujer ta usa bonnet. Ya puede yo mira que tiene contradiccion na creencia del diamon religion de antes y yan bilib gayot yo na paciencia y buen tratamiento del traveling overseer.

Hinay-hinay, ya queda yo mas convincido pero tiene pa un cosa que tan libug yo​—ta curta con el pelo del maga mujer. Ya habla el maga anciano que el pelo del cuanto maga mujer ta queda bien largo pero el cuanto gendeh. Gendeh quierre decir que ta puede queda bien largo el pelo del un mujer, mas bueno ya le contra na otro mujer. Ya ayuda tambien sila conmigo para mira que necesita kita sigui con el diaton conciencia si ta decidi acerca na camisa y mudada, y ya dale sila conmigo informacion para le na casa.

Ya Actua Base na Cosa Kame Ya Aprende

Ta busca kame con el buen fruta y ya puede kame incuntra con ese. Si Jesus ya habla: “Ansina ay sabe todo el maga gente cay ustedes dimio maga dicipulo: Si tiene ustedes amor con uno y otro.” (Juan 13:35, El Nuevo Testamento na Chavacano) Convincido kame que el maga Testigo de Jehova amo el maga gente quien ta dale mira deverasan amor. Maskin pa ansina, dificil tiempo este para con el diamon dos mayor anak, si Nathan y Rebecca, ciendo ya acepta ya sila con el maga enseñanza del Old Brethren y ya bautiza alla. Ya llega el tiempo, ya queda sila convincido por causa na maga verdad na Biblia que ya enseña kame kanila y na amor que ya dale mira kanila el maga Testigo.

Por ejemplo, si Rebecca bien quierre tene cerca relacion con Dios desde antes. Mas facil ya para con ele que reza cuando ya aprende le que nuay determina daan el Dios si cosa hace el un persona o cosa sucede con ele na futuro. Ya queda tambien ele mas cerca con Dios cuando ya sabe le que gendeh parte del un misterioso Trinidad el Dios, sino un deverasan persona con quien le puede imita. (Efeso 5:1) Y alegre si Rebecca cay gendeh mas le necesita usa maga daan palabra si tan cuento con Dios. Mientras ta aprende le si cosa el maga necesita para oi el Dios con el diaton maga rezo y que proposito del Dios que hay vivi hasta para cuando el maga gente na un paraiso tierra, ya sinti le que mas ya queda le cerca con el de suyu Creador.​—Salmo 37:29; Revelacion 21:3, 4.

Maga Privilegio que Tiene Kame

Kame de James y el diamon cinco mayor anak​—si Nathan, Rebecca, George, Daniel y John—​ya bautiza como maga Testigo de Jehova del 1987. Si Harley ya bautiza del 1989 y si Simon del 1994. El diamon entero familia ya esta activo para hace con el trabajo que ya manda si Jesucristo con el de suyu maga siguidores que proclama con el buen noticia acerca del Reino del Dios.

El diamon cinco mayor anak hombre​—si Nathan, George, Daniel, John y Harley​—y el diamon anak mujer, si Rebecca​—todo ya sirvi na U.S. branch office del maga Testigo de Jehova. Talla siempre si George despues de 14 año y si Simon, quien ya acaba entra escuela del 2001, nuevo lang tambien ya sirvi na branch office. El todo del diamon maga anak hombre ta sirvi como maga anciano o siervo ministerial na maga congregacion del maga Testigo de Jehova. El de mio marido ta sirvi como un anciano na Thayer Congregation, na Missouri, mientras iyo ta esta ocupao na ministerio.

Tiene ya kame ahora tres apu​—si Jessica, Latisha y Caleb​—y alegre kame mira con el diila maga mayores que ta enseña kanila que ama con Jehova. Como un familia, alegre kame cay ya guia kanamon si Jehova para con ele y ya ayuda kanamon para conoce con el de suyu maga siervo por medio na amor que ya dale sila mira.

Tiene kame empatia para con el maga gente quien quierre hace alegre con Dios pero ya engranda que ta creé que mas importante el maga ley na religion contra con el Biblia. Ta esperanza kame que hay incuntra sila con el alegria que ya tiene kame. Del antes, ta vende kame maga gulay na casa en casa pero ahora ta anda ya kame para predica acerca con el Reino del Dios y el maga buen cosas que hay cumpli este. Ta rindi gayot yo gracias y ta puede llura si ta pensa yo con el paciencia y amor que ya dale mira kanamon el maga gente quien ta lleva el nombre de Jehova!

[Letrato]

Cuando maga siete año yo y despues, cuando adulto

[Letrato]

Si James, George, Harley y Simon que ta visti simple camisa

[Letrato]

Ya abuya na un diario este de mio letrato que ta lleva gulay na tiangue

[Credit Line]

Journal and Courier, Lafayette, Indiana

[Letrato]

Junto con el diamon familia ahora