Esperanza​—Tiene Ba Gayot Este Efecto na Diaton Vida?

DIEZ año pa lang si Daniel pero ta sufri ya ele na cancer por un año. Ya habla el de suyu doctor, de suyu familia y el de suyu maga amigo nuay mas ya le esperanza. Pero nuay perde el esperanza de Daniel. Ta creé le que llega el tiempo hay queda le un researcher y ayuda busca cura na cancer. Ta espera gayot le el visitada del un doctor que un especialista na de suyu enfermedad. Pero cuando ya llega ese dia, nuay por sigui el visitada del especialista cay malo el tiempo. Yan luya gayot si Daniel. Por primer vez, ya perde de suyu esperanza. Despues del cuanto dia, ya muri le.

El un persona que ta cuida con el maga enfermo, el ya relata con el istoria de Daniel. Ta estudia ele si cosa el efecto na salud si el un persona tiene esperanza o nuay. Siguro ya puede ya tu oi igual ansina. El un de edad, por ejemplo, cerca ya muri pero ta espera ele con el un bien importante ocasion​—visitada man se del un familia o un aniversario. Despues llega ese ocasion, ya muri le. Cosa el envuelto na ese maga situacion? Tiene ba gayot grande efecto el esperanza como cosa el cuanto ta creé?

Manada maga medical researcher ta habla que el esperanza y pagka-positivo, tiene grande efecto na vida y salud del un persona. Pero tiene, gendeh uyun con ese. El cuanto researcher ta clama que gendeh se el cosa ta habla el ciencia. Ta pensa sila que nuay cosa puede ayuda el esperanza para queda bueno el un persona na de suyu enfermedad.

Maskin del antes, el cuanto gente ta pensa que el esperanza gendeh puede ayuda contigo. Miles de año ya el ya pasa, ya pregunta con el un Griego que si Aristotle si cosa el esperanza para con ele y ele ya contesta: “Un sueño lang este.” Y nuevo lang, el un politico na America, si Benjamin Franklin ya habla: “El quien ta vivi na esperanza, gendeh puede tiene el cosa le necesita.”

Entonces, cosa el verdad acerca na esperanza? Este ba un sueño lang para dale alivio con el maga gente? O tiene pa valido razon para creé que el esperanza puede ayuda kanaton queda alegre y tiene buen salud?