Onde Tu Puede Incuntra Deverasan Esperanza?

YA DESCANZA el de tuyu relo y dol ya queda este malo. Si manda tu con ese compone, manada tu onde puede iscuji. Manada gente el ta clama que puede sila compone con el de tuyu relo. Pero, paquemodo si ya puede tu sabe que el de tuyu vecinos amo el quien ya hace con ese relo. Y omento pa, preparao ele ayuda contigo sin pago. Dol claro ya si cosa tu iscuji.

Ahora, compara con ese relo na de tuyu abilidad para esperanza. Si ta perde ya el de tuyu esperanza​—igual como cosa ta experiencia el manada gente na este dificil tiempo—​onde tu pidi ayuda? Manada gente ta habla que puede sila solva con el de tuyu problema. Pero, ta dale sila manada solucion que puede causa contigo para man libug. Gendeh ba mas bueno si pidi kita ayuda con el diaton Creador, el quien puede dale deverasan esperanza kanaton? El Biblia ta habla que ‘gendeh ele lejos’ y quierre gayot le ayuda kanaton.​—Maga Actividad 17:27; 1 Pedro 5:7.

Si Cosa Gayot Quierre Decir del Esperanza

Mas deverasan el cosa ta habla el Biblia acerca na esperanza contra na idea del maga doctor, cientista y psychologist. Na Biblia, el “esperanza” quierre decir preparao espera y ta expecta buen resulta. Tiene dos cosas el envuelto na esperanza. El uno amo el cosas bueno que ta desea tu sucede y el otro amo el basejan para creé que sucede se. Deverasan el esperanza que el Biblia ta dale kanaton y base este na verdad.

El esperanza, semejante na fe y debe base este na evidencia. (Maga Hebreo 11:1) Pero, el Biblia ta dale mira que tiene diferencia entre na fe y esperanza.​—1 Corinto 13:13.

Para ilustra: Si ya pidi tu pabor con el de tuyu amigo, hay esperanza tu que ayuda le contigo. Ciendo bien conoce tu con el de tuyu amigo y ya puede tu mira que bueno y bondadoso le, tiene tu fe con ele. Tiene coneccion el de tuyu fe y esperanza. Pero diferente sila na uno y otro. Paquemodo tu tiene ansina clase de esperanza con Dios?

El Basejan del Esperanza

El Dios amo el tuburan del deverasan esperanza. Na tiempo del Biblia, ta llama con Jehova el “esperanza del Israel.” (Jeremias 14:8) Estaba con ele el maskin cosa esperanza que tiene el de suyu maga siervo poreso ele el diila esperanza. Deverasan el diila esperanza cay puede sila confia con Dios. Na de suyu tratamiento kanila del ya pasa maga siglo, ya dale mira que pirmi le ta cumpli con el cosa le ta promete. El diila lider si Josue ya habla con el Israel: “Sabe gayot ustedes que ni uno na maga buen promesa que ya promete si Jehova el de ustedes Dios el ya falla.”​—Josue 23:14.

Ahora, tiene kita el igual razon para confia con el maga promesa del Dios. Puede kita le na Biblia acerca con el de suyu maga promesa y si paquemodo le con ese todo ya cumpli. Puede gayot confia con el de suyu maga promesa. Poreso, tiene vez ta escribi con este na manera que dol ya cumpli ya el promesa.

Poreso, ta llama con el Biblia como el libro del esperanza. Mientras ta estudia tu con el tratamiento del Dios na maga gente, mas queda fuerte el de tuyu razon para pone el de tuyu esperanza con ele. Si apostol Pablo ya escribi: “Todo el maga cosa-cosa que ya escribi antes pa na maga Escritura amo para insiñanza diaton: para ay puede kita tene esperanza por medio del maga ejemplo de paciencia y consuelo que el maga Escritura ta dale.”​—Roma 15:4.

Cosa Esperanza Ya Dale el Dios Kanaton?

Cuando kita ta sinti que bien necesita kita con el esperanza? Gendeh ba na tiempo si tiene quien ya muri? Pero na ese tiempo, manada el ta sinti que nuay mas esperanza. Posible kita sinti ansina cay nuay ni uno kanaton el puede escapa na muerte. Y gendeh kita puede hace vivi otravez con el muerto. Poreso el Biblia ya llama con el muerte “el ultimo contrario.”​—1 Corinto 15:26.

Entonces, paquemodo kita puede tiene esperanza si tiene quien ya muri? Bueno, el Biblia que ya llama con el muerte como ultimo contrario ya habla tambien que “ay destroza” con este enemigo. Mas poderoso si Dios Jehova contra na muerte. Ya dale ya se ele mira na manada ocasion. Paquemodo? El Biblia ya menciona nueve diferente ocasion que el Dios ya usa con el de suyu poder para hace vivi otravez con el cuanto individual.

Por ejemplo, ya dale poder si Jehova con el de suyu Anak, si Jesus, para resucita con el de suyu amigo, si Lazaro quien muerto ya por cuatro dia. Ya hace este si Jesus, gendeh na secreto sino enfrente del manada gente.​—Juan 11:38-48, 53; 12:9, 10.

Posible pensa tu, ‘Porque ya resucita con aquellos maga gente? Gendeh ba ya queda sila viejo y vieja, y ya muri lang otravez?’ Si. Pero, por causa con este maga deverasan istoria de resureccion, puede kita tiene gendeh lang el deseo que hay vivi otravez aquellos con quien kita ta ama sino tiene tambien kita el razon que hay sucede se. Tiene kita el deverasan esperanza.

Si Jesus ya habla: “Yo amo el Resureccion y el Vida.” (Juan 11:25) Hay dale si Jehova con Jesus el poder para resucita con el maga gente na entero mundo. Si Jesus ya habla: “Ta llega ya el hora cuando todo el maga muerto ay oi el disuyo voz, y todo sila ay sale na diila maga sepultura.” (Juan 5:28, 29) Si, todo aquellos quien ya muri tiene el esperanza que vivi otravez na un paraiso tierra.

Si profeta Isaias ya relata acerca con el resureccion por medio na este maga bonito palabra: “El de tuyu maga muerto hay vivi. El de mio maga muerto cuerpo hay levanta. Dispierta y grita con alegria, ustedes quien ta queda na polvos! Cay el de tuyu hamuk igual na hamuk de aga, y hay permiti el tierra que vivi otravez el maga muerto.”​—Isaias 26:19.

Gendeh ba ta dale comforta ese promesa? Puede kita asigura que protegido aquellos quien ya muri igual na un bata quien protegido na vientre del de suyu nana. Si, aquellos maga muerto na sepultura preservao na perfecto memoria del Todo Poderoso Dios. (Lucas 20:37, 38) Y gendeh mas tarda, hay vivi sila otravez y ricibi kanila na un nuevo mundo igual si paquemodo el un amable familia ta ricibi con el nuevo nacido bata. Tiene esperanza maskin aquellos quien ya muri.

Si Cosa Puede Hace el Esperanza Contigo

Si Pablo ya enseña kanaton si paquemodo de importante el esperanza. Ya menciona le que el esperanza amo un importante parte del espiritual armadura​—el helmet. (1 Tesalonica 5:8) Cosa le quierre decir? Na tiempo del Biblia, el un soldao ta usa con el helmet que hacido de metal si ta anda na guerra. Por causa na helmet, puede protege con el cabeza del soldao desde na maga cosas que puede tupa na de suyu cabeza. Cosa el punto de Pablo? Igual si paquemodo el helmet ta protege con el cabeza, el esperanza ta protege con el pensamiento, el abilidad para pensa. Si fuerte el de tuyu fe na maga promesa del Dios, puede este ayuda contigo para tiene paz na pensamiento si tiene tu maga serioso problema. Todo kita necesita este clase de proteccion.

Si Pablo ya usa otro ilustracion para dale mira si paquemodo de importante el esperanza. Ele ya escribi: “Este esperanza igual como un ancla asegurao para del diaton alma.” (Maga Hebreo 6:19) Manada beses ya experiencia si Pablo que ya sumi el barco poreso sabe le si paquemodo de importante el ancla. Si ta enfrenta tifun, el maga marinero ta hace abaja con el ancla del barco. El ancla hay aguanta con el barco durante el tifun para gendeh este guinda na aplaya y man bangga na maga grande piedra.

Na igual manera, si el maga promesa del Dios amo un “asegurao” esperanza para kanaton, ese esperanza puede ayuda kanaton aguanta na maga dificultad que enfrenta kita na diaton vida. Si Jehova ya promete que gendeh mas dura, el maga gente gendeh mas sufri na maga guerra, crimen, tristeza o maskin pa gane na muerte. (Mira con el cajon Si Porque Kita Puede Tene Esperanza.) El esperanza puede protege kanaton y dale kanaton el fuerza que necesita kita para obedece con Dios y gendeh imita con el mundo.

Quierre si Jehova que tiene tu ese esperanza. Quierre le que tiene tu un alegre vida y quierre le que “todo el maga gente ay salva.” Paquemodo kita puede salva? Una, el cada uno kanaton debe “alcanza el completo conocimiento del verdad.” (1 Timoteo 2:4) Ta anima kame contigo que aprende acerca el verdad na Palabra del Dios. El esperanza que dale contigo el Dios mas pa na maskin cosa esperanza que puede tu incuntra na este mundo.

Por causa con ese esperanza, gendeh mas tu sinti que nuay tu cosa puede hace cay dale contigo el Dios el fuerza que necesita tu para alcanza el maskin cosa goal que harmonia na de suyu voluntad. (2 Corinto 4:7; Filipo 4:13) Gendeh ba ese clase de esperanza el necesita tu? Poreso si ta necesita tu esperanza, si ta busca tu con ese, tiene coraje. Puede tu tiene esperanza. Puede tu incuntra con ese!

[Cajon/Letrato]

Si Porque Kita Puede Tene Esperanza

Este maga versiculo estaba na Biblia puede hace fuerte con el de tuyu esperanza:

▪ El Dios ya promete un bonito futuro.

El de suyu Palabra ta habla que el entero mundo hay queda paraiso donde hay queda el maga alegre y unido familia.​—Salmo 37:11, 29; Isaias 25:8; Revelacion 21:3, 4.

▪ El Dios gendeh tan imbusterias.

Ta odia le con el todo clase de imbusterias. Si Jehova sagrao o puro, poreso imposible para con ele que man imbusterias.​—Proverbio 6:16-19; Isaias 6:2, 3; Tito 1:2; Maga Hebreo 6:18.

▪ Nuay fin el poder del Dios.

Si Jehova lang solamente el todo poderoso. Nuay quien puede sangga con ele para cumpli con el de suyu maga promesa.​—Exodo 15:11; Isaias 40:25, 26.

▪ El Dios quierre que vivi tu hasta para cuando.

​—Juan 3:16; 1 Timoteo 2:3, 4.

▪ El Dios ta esperanza que hay obedece kita con ele.

Mas ta iscuji le man focus gendeh con el diaton maga kamali sino con el diaton maga buen calidad y esfuerzo. (Salmo 103:12-14; 130:3; Maga Hebreo 6:10) Ta esperanza le que hace kita el cosa bueno y alegre le si ta hace kita con ese.​—Proverbio 27:11.

▪ El Dios ya promete que ayuda le contigo hace con el cosa ta hace alegre con ele.

El de suyu maga siervo gendeh debe perde esperanza. El Dios bondadoso ta dale de suyu sagrao espiritu, el de con todo poderoso fuerza que tiene, para ayuda kanaton.​—Filipo 4:13.

▪ Si hay esperanza tu con Dios gendeh gayot tu man mahay.

Puede tu completamente confia con Dios y gendeh le permiti que man mahay tu.​—Salmo 25:3.

[Letrato]

Igual si paquemodo el un helmet ta protege con el cabeza, el esperanza ta protege con el pensamiento

[Letrato]

Igual na un ancla, si fuerte el de tuyu esperanza puede este ayuda contigo para aguanta

[Credit Line]

Courtesy René Seindal/Su concessione del Museo Archeologico Regionale A. Salinas di Palermo