Porque Kita Necesita Esperanza?

COSA era ya pasa con Daniel, el bata que tiene cancer que ya menciona na ya pasa articulo si ya mentena ele el de suyu esperanza? Ya ganá gaha le contra na cancer? Vivo pa gaha le ahora? Maskin el maga gente quien ta creé gayot que el esperanza puede ayuda kanila queda bueno, posible gendeh se habla. Y este el importante punto. Gendeh kita debe pensa que el esperanza puede solva y cura con el todo cosas.

Na un interview del CBS News, si Dr. Nathan Cherney ya menciona que gendeh justo habla con el maga enfermo paciente que queda sila bueno si tiene sila esperanza: “Tiene vez el maga marido ta rabia con el diila maga mujer cay falta sila meditacion y gendeh sila ta pensa positivo. Si Dr. Cherney ya omenta: “Ese clase de pensamiento ta dale el gendeh justo idea que si positivo tu, puede tu controla con el de tuyu enfermedad y si nuay tu queda bueno hay pensa sila que gendeh bastante el de tuyu esfuerzo. Pero gendeh se justo.”

El deverasan, aquellos quien ta sufri na grabe enfermedad ta necesita fuerza para enfrenta con ese. Asigurao que no quierre el maga familia y maga amigo manda man conciencia con el paciente para gendeh omenta el diila sufrimiento. Pero, quierre decir ba que nuay valor el esperanza?

Gendeh. Por ejemplo, el mismo doctor ya ayuda con el maga paciente que hace mas facil el ultimo parte del diila vida. Este maga doctor ta creé que grande ayuda el curada que ta hace positivo con el maga paciente maskin na maga bien enfermo. Tiene evidencia que el esperanza puede se hace.

El Esperanza Puede Ayuda Contigo

“El esperanza tiene poder para cura,” ya habla el un medical journalist si Dr. W. Gifford-Jones. Ya estudia ele manada medical research acerca si paquemodo de importante que suporta na emocional con el maga paciente que pamurida ya. Manada ta pensa que este clase de suporta puede ayuda con el maga gente esta positivo y gendeh perde esperanza. Un research del 1989 ya habla que el paciente ya ricibi ese suporta mas tarda pa ya vivi. Pero el reciente research, nuay confirma con ese. Sino, el research ya confirma que el maga paciente quien ya ricibi emocional suporta nuay tanto experiencia depression y dolor contra con aquellos nuay ricibi con ese ayuda.

Considera con el otro research que ta dale mira el efecto del pagka-positivo y pagka-negativo na maga gente quien tiene enfermedad na corazon. Ya pregunta con el grupo de mas de 1,300 maga hombre si tiene ba sila positivo o negativo mirada na vida. Despues del diez año, mas de 12 por ciento de este maga hombre ya tiene enfermedad de corazon. Y mayoria kanila tiene negativo mirada. Si Laura Kubzansky, un assistant professor na Harvard School of Public Health, ya habla: “Este el primer evidencia base na ciencia que ta suporta con el idea que el pagka-positivo bueno na de tuyu corazon. Cuanto maga medical research ya dale mira que el maga gente quien ta creé que tiene sila buen salud, yan recover pronto na operacion contra con aquellos quien ta creé que nuay sila buen salud.”

El otro research ta habla que mas largo el vida del maga gente positivo. Na un estudiada ya examina si cosa el efecto si positivo el mirada del maga de edad na diila pagka-de vejez. Cuando ya dale kanila mira un corto mensaje que mas sabio y experienciao el maga de edad, ya puede sila camina con omento fuerza. Igual de ese resulta na 12 semana programa de fisical ejercicio.

Porque el esperanza y pagka-positivo tiene beneficio na salud? Posible el maga cientista y doctor, nuay pa gayot entende con el pensamiento y cuerpo del gente para puede dale asigurao contestacion. Pero, tiene cuanto idea el maga experto quien ya estudia con este. Por ejemplo, el un professor de neurology ya habla: “Bien bonito na sentido si alegre y tiene esperanza el un persona. Gendeh le tanto stress y bueno se para na de suyu cuerpo. Y omento cosa este que puede hace el maga gente para tiene buen salud.”

Posible que nuevo este idea para na maga cuanto doctor, psychologists y cientista pero gendeh este nuevo para con el maga quien ta estudia con el Biblia. Cerca 3,000 año ya el ya pasa, el Dios ya causa con el un sabio Rey, si Solomon que escribi con el cosa le ta pensa: “El alegre corazon amo un buen medicina, pero el machacao espiritu ta hace acaba con el fuerza.” (Proverbio 17:22) Bien razonable este. Este versiculo gendeh ta habla que el alegre corazon hay cura maskin cosa enfermedad sino ta habla lang que “un buen medicina” este.

Gane, puede kita pregunta, Si el esperanza un medicina, tiene ba doctor quien gendeh reseta con este? Puera que el esperanza bueno na diaton salud, tiene pa este otro beneficio.

Si Paquemodo el Pagka-positivo o Pagka-negativo Puede Afecta na De Tuyu Vida

El maga researcher ya discubri que manada beneficio si positivo el maga gente. Mas ta puede sila hace enbuenamente na escuela, na trabajo y maskin na sport. Por ejemplo, ya estudia con el grupo de maga mujer que maga runner. El maga coach ya estudia enbuenamente con el cada mujer na grupo para mira el diila abilidad. Ya pregunta tambien con el maga mujer si cosa el diila esperanza na competicion. Y el resulta amo que el cosa ta esperanza el maga mujer amo el ya sucede contra con el cosa ta expecta el maga coach. Porque bien grande gayot el efecto del esperanza?

Manada cosa ya aprende el maga cientista cuando ya estudia sila con el maga gente negativo. Durante del maga 1960, el maga cientista ya aprende que el maga animal y maskin el maga gente puede sinti nuay esperanza. Ya pone con el maga gente na un cuarto que bien alboroto y ya habla kanila que puede sila hace descanza el sonor si pichi sila con el maga button na justo pagka-sunod sunod. Y ya puede sila hace descanza con el sonor.

Ya manda tambien hace ansina con el segundo grupo pero nuay efecto cuando ya pichi sila con el maga button. Como cosa tu puede imagina, manada na segundo grupo ya perde esperanza. Y na siguiente maga experimento, no quierre ya sila hace maskin cosa. Convincido sila que nuay efecto maskin cosa sila hace. Pero el maga gente positivo na segundo grupo, nuay perde el esperanza.

Si Dr. Martin Seligman, quien ya ayuda na cuanto de ese experimento ya decidi que continua estudia con el pagka-positivo y pagka-negativo del maga gente. Ya estudia le si porque el maga gente ta mira con el diila mismo cuerpo como nuay esperanza. Ya habla le que el maga gente negativo tan dificil hace accion o gendeh mas gane ta hace con ese. Como conclusion si Seligman ya habla acerca na pagka-negativo y el efecto de este: “Ya estudia yo con este por 25 año. Ya estudia yo que ta pensa el maga gente negativo que diila culpa si tiene malo ta sucede kanila que continua sucede este mal cosa y maskin cosa pa sila hay hace hay sucede este siempre. Convincido yo cay por causa ansina sila ta pensa, mas manada el cosa ya sucede kanila contra con el maga gente positivo.”

Otravez, posible que nuevo idea este para na cuanto ahora pero sabe ya se el maga quien ta estudia con el Biblia. Nota con este proverbio: “Si tan luya tu na tiempo de problema, hay menora el de tuyu fuerza.” (Proverbio 24:10) Si, el Biblia claro ta habla que menora el de tuyu fuerza para actua si tan luya y tiene tu negativo pensamiento. Entonces, cosa tu puede hace para gendeh tu queda negativo y queda mas positivo y tiene esperanza na vida?

[Letrato]

Manada bueno cosa puede hace el esperanza