Puede Tu Ganá con el Pagka-Negativo

PAQUEMODO tu ta mira con el maga dificultad que ta enfrenta tu? Manada experto ahora ta creé que el contestacion na ese pregunta ta dale mira si positivo ba tu o negativo clase de persona. Todo kita ta experiencia diferente clase de problema na diaton vida. Gane, el cuanto kanaton mas manada problema que con otro. Pero porque el cuanto maga gente, maskin pa despues experiencia maga dificultad, preparao pruba otravez mientras el otro ta descanza ya maskin na maga diutay problema?

Por ejemplo, imagina que ta busca tu trabajo. Yan interview contigo pero nuay contigo saca. Cosa tu pensa despues de ese suceso? Posible pensa tu que no quierre sila contigo y mira con ese como un permanente problema y habla na de tuyu mismo cuerpo, ‘Nuay gayot quien saca conmigo. Gendeh gayot yo puede tiene trabajo.’ O mas grabe pa, puede tu permiti con ese un problema que influencia si paquemodo tu ta mira con el cada aspeto del de tuyu vida y pensa, ‘Palpak gayot yo. Nuay gayot yo sirvi.’ Ese pensamiento claro ta dale mira pagka-negativo.

Resisti con el Pagka-Negativo

Paquemodo tu resisti con el pagka-negativo? El primer cosa que necesita tu hace amo que determina con ese maga negativo pensamiento. El cosa tu hace sunod amo resisti con ese. Pruba busca otro razon si porque nuay contigo saca. Por ejemplo, deverasan ba que nuay contigo acepta na trabajo cay nuay contigo quien quierre saca? O posible ba que ta busca lang sila aquel persona que tiene otro maga cualificacion?

Si concentra tu na maga especifico verdad, hay dale este mira que el de tuyu maga negativo pensamiento amo maga sobra reaccion lang. Quierre decir ba que si ya falla tu na un cosa, palpak ya gayot tu? O puede ba tu pensa otro aspeto na de tuyu vida​—igual el de tuyu espiritual goal, relacion na familia o amistad con otro​—que ya puede tu tiene buen exito? Aprende que no pensa que el todo cosa tu hace hay queda palpak. Gane, puede ba gayot tu sabe que gendeh ya gayot tu puede incuntra trabajo? Tiene pa otro cosa que puede tu hace para quita con ese negativo pensamiento.

Queda Positivo na Cosa Tu Puede Hace

Del reciente maga año, el maga researcher ya dale bien limitao explanacion acerca si cosa el esperanza. Ta habla sila que el esperanza amo el creencia que puede tu alcanza con el de tuyu maga goal. Como cosa ta dale mira el siguiente articulo, mas pa el cosa envuelto na esperanza. Pero, el cosa sila ya habla dol puede ayuda na cuanto maga manera. Si man focus kita na este aspeto, puede se ayuda kanaton para queda positivo na cosa kita puede hace.

Para puede kita creé que puede kita alcanza con el diaton maga goal na futuro, necesita kita tiene experiencia na hacida maga goal y alcanza con ese. Si ta sinti tu nuay pa tu experiencia, posible mas bueno si pensa tu enbuenamente acerca con el maga goal que ta hace tu para na de tuyu mismo cuerpo. Una, tiene ba tu maga goal? Bien facil lang que queda rutina el cosa kita ta hace na diaton vida que gendeh ta pensa si cosa kita deverasan quierre y si cosa el mas importante para kanaton. Acerca na este practical principio que hace maga especifico prioridad, puede kita mira otravez que de antes pa el Biblia ya habla: “Asigura el maga cosas que mas importante.”​—Filipo 1:10, NWT.

Si ya determina ya kita con el diaton maga prioridad, mas facil para kanaton decidi si cosa goal kita alcanza na diferente aspeto del diaton vida, igual na diaton espiritualidad, vida de familia o secular trabajo y escuela. Pero na primero, bien importante que gendeh kita pricura alcanza bien manada goal. Iscuji kita aquel sabe kita que pronto lang kita puede alcanza. Si bien dificil para alcanza con el un goal, posible kita man luya y descanza ya. Poreso, mas bueno si el maga grande goal que tarda kita alcanza dividi kita na maga diutay-diutay goal.

Asegun con otro, “Si quierre, tiene manera.” Y dol verdad ese. Si ya determina ya kita si cosa goal kita una pricura alcanza, necesita kita el deseo y determinacion para pricura alcanza con ese. Puede kita hace fuerte con el diaton determinacion si medita kita si paquemodo de importante el diaton goal y si paquemodo kita beneficia con ese. Siempre, hay tiene maga sanggadura. Pero, necesita kita mira con este como un problema que tiene solucion en vez pensa que imposible ya para enfrenta con ese.

Pero, necesita tambien kita pensa maga practical manera para alcanza con el diaton maga goal. El un autor, si C. R. Snyder, quien ya hace estudiada acerca na importancia del esperanza, ya habla que el un persona debe pensa diferente manera para alcanza con el un goal. Como resulta, si el un manera gendeh tiene buen exito, puede kita pruba hace con el ika-dos, ika-tres y otro pa maga manera.

Ya recomenda tambien si Snyder que debe kita acerta cambia con el diaton goal si necesita. Si bien imposible ya alcanza con el un goal y man lingasa pa kita con ese, man luya lang kita. Pero, si cambia kita con ese y iscuji un goal que mas facil para alcanza, hay tiene kita cosa para esperanza.

El Biblia ta contene un ejemplo acerca con este que puede ayuda kanaton. Quierre si Rey David construi un templo para na de suyu Dios, si Jehova. Pero, el Dios ya habla con David que el de suyu anak, si Solomon, amo el quien hace con este. En vez de rabia o pricura hace con el un cosa que imposible para con ele, ya cambia si David con el de suyu maga goal. Ya usa le con el de suyu fuerza para ajunta pondo y materiales que necesita el de suyu anak para completa con el proyecto.​—1 Rey 8:17-19; 1 Cronicas 29:3-7.

Maskin pa ya aprende ya kita queda positivo na diaton vida, posible man dificil siempre kita tiene esperanza. Porque? Cay nuay kita el poder para solva con el maga problema na este mundo que ta quita con el esperanza del maga gente​—el pobreza, guerra, injusticia, enfermedad y muerte. Entonces, paquemodo kita esta positivo?

[Letrato]

Si nuay contigo acepta na trabajo que quierre tu, ta pensa ba tu que gendeh ya gayot tu tiene trabajo?

[Letrato]

Ya puede man adjust si Rey David y ya cambia con el de suyu goal