Cosa Ta Enseña El Maga Creacion?

“Pabor, pregunta con el maga animal y enseña sila contigo; pati con el maga pajaro na cielo, y habla sila contigo. O pone atencion con el tierra, y hay enseña este contigo; y el maga pescao na mar hay manda este sabe contigo.”—JOB 12:7, 8.

NA RECIENTE maga año, el maga cientista y engineer manada cosa ya puede aprende na maga siembra y animal. Ta pricura sila imita con el cosa sila ya puede aprende na creacion. Ta hace sila este para mejora con el maga producto que tiene ya daan o para hace nuevo. Mientras ta considera tu con el siguiente maga ejemplo, pregunta na de tuyu mismo cuerpo, ‘Quien debe ricibi el alabanza para na este maga diseño?’

Si Cosa Kita Puede Aprende na Maga Palikpik del Ballena

Cosa puede aprende el maga ta diseña maga eroplano na un ballena que ta llama humpback whale? Manada. El un adulto humpback whale tiene pesades de maga 30 tonelada—igual na un bien cargao truck. Duro el cuerpo de este y tiene maga grande palikpik que ta semeja na alas. Ese animal que tiene largor de 40 pies bien lijero ta move abajo del agua. Por ejemplo si este ballena ta come, pa-redondo este ta nada abajo del maga pescao que ta pricura este cuji mientras ta hace maga bula. Ese maga bula que tiene lang grandor de cinco pies ta queda igual na net que ta cuji con el maga pescao. Y despues, facil ya lang traga con este el ballena.

El maga cientista gendeh ta entende si paquemodo este bien grande animal ta puede nada na bien diutay redondo. Ya discubri sila que ya queda este posible por causa na forma del maga palikpik del ballena. Gendeh liso el punta del cada palikpik de este. Sino, tiene este maga bukul.

Este maga bukul na palikpik ta ayuda con el ballena para facil lang nada pa-arriba. Paquemodo? El magasin Natural History ta explica que este maga bukul ta hace posible para el agua pasa lang na palikpik poreso facil lang nada el ballena. Si liso el punta del palikpik, gendeh este queda posible.

Cosa el ayuda de este cosa sila ya discubri? Si el maga alas del maga eroplano ya diseña igual na maga palikpik del humpback whale, hay queda este mas simple, mas safe y mas facil compone y mentena. El un experto que si John Long ta creé que llega el tiempo, “puede kita mira que el cada alas del eroplano hay queda igual na palikpik del humpback whale que tiene bukul.”

Ta Copia con el Alas del Seagull

Siempre, el maga alas del eroplano igual ya el forma na maga alas del maga pajaro. Pero ahora, el maga engineer mas ya puede pa gayot copia con el diseño del maga alas del maga pajaro. “El maga researcher na University of Florida,” ya habla el magasin New Scientist, “ya pricura copia con el maga movimiento del maga seagull mientras ta bula este. Ya hace sila un drone que ta puede bula na aire y ta puede man dagit y despues subi dayun na aire.”

El maga seagull bien bueno bula cay ta puede sila dubla diila alas na codo y hombro. Para copia con el diseño del alas, “el drone que ya hace sila que tiene 24 pulgada tiene tambien maga alas que ta puede move,” ya habla el magasin. Por causa na maga alas de este, el drone ta puede man lutao na aire y ta puede man dagit entre medio del maga alto building. El U.S. Air Force quierre usa con este clase de maga drone para busca maga chemical o biological armas na maga grande ciudad.

Ta Copia con el Pies del Toco

Manada tambien kita cosa puede aprende na maga animal de tierra. Por ejemplo, el diutay butiki que ta llama toco tiene abilidad para man camang na dindin y man pilit na maga quisame. Maskin na tiempo del Biblia, conocido con este creatura que ta puede hace con ese. (Proverbio 30:28) Porque este ta puede hace el maga toco?

El toco ta puede man pilit maskin na maga liso lugar igual na glass por causa na maga diutay-diutay pelo na pies de este. El pies gendeh ta produci glue. Sino, ta puede este hace el toco cay el maga molecule na pies de este tan pilit na maga molecule del dindin o del quisame. El maga gente gendeh ta puede hace con este. Pero por causa na manada pelo na pies del toco, ta puede este man pilit na dindin o na quisame.

Paquemodo puede copia el maga gente con este? Puede sila hace un material que puede usa en vez con el Velcro. * El un researcher ya habla que puede gayot usa con el diseño de este na medicina si no puede usa chemical para cerra con el un irida.

Quien Debe Ricibi el Alabanza?

El National Aeronautics and Space Administration ya hace un robot que ta camina igual na alacran (scorpion) y el maga engineer na Finland ya puede inventa un tractora que tiene seis pies que ta puede pasa na maskin cosa sanggadura igual na un gigante insecto. El cuanto maga researcher ya puede diseña un tela que tiene maga diutay retazo que ta puede abri y cerra para entra o sale el aire igual na pinecone. El un compania ta usa con el diseño del un pescao que ta llama boxfish para hace un auto que ta puede corre que diutay esfuerzo lang ta usa maskin maviento. Y el otro maga researcher ta pricura entende si porque bien duro el maga shell del abalone. Quierre sila usa con el diseño de este para hace mas liviano y mas durable camisa para na maga soldao para protege kanila na peligro.

Bien manada kita cosa puede aprende na creacion poreso el maga researcher ya hace un database de maga informacion acerca na manada diferente animal y siembra. El maga cientista puede mira informacion na ese database para busca “maga solucion si tiene sila maga problema na diseño,” ya habla el The Economist. Este maga informacion acerca na maga animal y siembra puede compara na un trade mark. Si el un persona ta hace un invencion, ta registra le con este y despues ta conoce con ele como el dueño de este. El maga researcher ta habla que debe kita rindi gracias na maga creacion para na este maga invencion.

Onde estaba el maga bonito abilidad de este maga creacion? Manada maga researcher ta pensa que ya queda este posible por causa na evolucion adentro del miles de maga año. Pero, el otro maga researcher nuay man uyun con ese idea. El un microbiologist que si Michael Behe ya escribi na The New York Times del 2005: “Ta puede kita mira maga diseño [na maga creacion] y simple lang el cosa kita puede habla. Si el forma, caminada y el sonor de este igual de pato puede kita asigura que pato este. Poreso na igual manera, si tiene maga diseño na maga creacion, quierre decir lang de este que tiene quien ya diseña con ese.”

Asigurao, si el un engineer ya puede diseña un mas safe y mas bonito alas de eroplano, hay ricibi gayot le alabanza. Na igual manera, si el un inventor ya puede hace un mas bale bandage—o mas comfortable camisa o mas bonito vehiculo—asigurao hay alaba gayot con ele por causa na de suyu diseño. Gane, si el un persona ya copia con el diseño del otro gente pero nuay le menciona con el original inventor de este, puede con ele considera como un criminal.

Para contigo, razonable ba para habla que el maga bonito cosas que ta pricura copia el maga cientista ya sucede lang por medio na evolucion? Si necesita inteligencia para copia con el un diseño, quetal el original diseño? Quien ba el mas conviene ricibi el alabanza, el quien ya diseña con el original o el persona quien ya copia lang con ese?

Un Razonable Conclusion

Despues mira con el maga diseño na maga creacion, manada gente el tan uyun na cosa ya habla el salmista: “Que bien manada el cosa tu ya hace, O Jehova! Na de uste sabeduria ya crea tu con este todo. El tierra lleno del maga cosas que ya hace tu.” (Salmo 104:24) El un escritor na Biblia, si Pablo, ya puede tambien habla igual ansina. Ele ya escribi: “Cay el de suyu [del Dios] maga invisible calidad claro puede mira desde el creacion del mundo, cay este maga cosas, el de suyu poder y pagka-Dios que hasta para cuando, puede mira na maga cosas que ya hace le.”—Roma 1:20, NWT.

Maskin pa ansina, manada siempre del maga sincero persona quien ta respeta con el Biblia y ta creé con Dios el ta pensa que ya usa le con el evolucion para crea con el todo las cosas. Pero, cosa ta enseña el Biblia?

[Footnote]

[Blurb]

Onde estaba el bien manada abilidad del maga creacion?

[Blurb]

Quien el inventor del maga diseño na creacion?

 [Cajon/​Letrato]

Si necesita inteligencia para copia con el un diseño, quetal el original diseño?

Este eroplano ya copia con el maga alas del seagull

El pies del toco gendeh tan buling, gendeh ta deja rastro, tan pilit halos na maskin cosa y facil lang man pilit y quita con ese. El maga researcher ta pricura copia con ese

Este auto ya copia con el diseño del boxfish

[Credit Line]

Airplane: Kristen Bartlett/ University of Florida; gecko foot: Breck P. Kent; box fish and car: Mercedes-Benz USA

 [Cajon/​Letrato]

MAGA BIEN SABIO CREATURA

Manada maga animal el “bien sabio” y ta puede sila viaja y gendeh ta perde. Ta puede sila llega na diila destinacion. (Proverbio 30:24, 25) Considera kita dos ejemplo.

▪ El Camino del Subay Paquemodo el maga subay que ta busca comida ta puede incuntra con el diila casa? El maga cientista na England ya discubri que el maga subay ta deja olor na diila camino. Ta hace tambien sila camino na manera que mas facil sila incuntra con el diila casa. Por ejemplo, si el un clase de subay ta hace camino estaba na diila casa, ta disvia sila con ese. El un magasin ta habla que ta disvia sila na un especifico anggulo. Bien bonito este y ta puede ayuda cay si el un subay ya puede llega na lugar onde le ya disvia, hay pasa este na de con todo facil camino que pirmi ta guia para na diila casa. Este diseño amo ta hace mas facil para na maga subay que sale y bira na diila casa y gendeh mas sila ta hace kalas con el diila fuerza.

▪ El Compass del Maga Pajaro Si el maga pajaro ta cambia lugar, ta bula sila bien lejos na diferente clima y gendeh ta perde. Paquemodo se ya queda posible? El maga researcher ya discubri que el maga pajaro ta puede sinti con el magnetic field del tierra. Pero, el un magasin ta habla que otro-otro el magnetic field na cada lugar y gendeh pirmi ta insiña na igual direccion. Paquemodo el maga pajaro ta incuntra con el diila camino? Para gendeh sila perde camino mientras ta bula, el maga pajaro ta usa con el posicion del sol cada noche. Y maskin pa ta cambia el posicion del sol durante el año, ta sabe tambien sila si cosa ya particular tiempo del año. Ta usa sila con este maga informacion para sabe si para onde sila bula.

Quien ya enseña con el maga subay que disvia na un especifico anggulo? Quien ya enseña con el maga pajaro para incuntra con el diila camino? El evolucion ba o el Creador?

[Credit Line]

© E.J.H. Robinson 2004