Ya Tiene Grande Cambio na Moralidad

PARA contigo, del cuando ya principia tiene grande cambio na moralidad? Ya sucede ba se na de tuyu tiempo o na tiempo del de tuyu maga pariente o amigo que mas mayor contigo? El cuanto ta habla que ya principia este del 1914 cuando ya sucede el Guerra Mundial I. El un professor de history que si Robert Wohl ya escribi na de suyu libro The Generation of 1914: “Aquellos quien ya vivi durante el guerra ta entende que el mundo ya cambia gayot y gendeh mas este queda igual como de antes.”

El un historian ya habla: “Maskin onde, el custumbre del maga gente mas ya agraba. Durante el Primer Guerra Mundial [1914 -18], bien manada gente el ya muri que dol nuay lang valor el vida. El maga politico y general ya imbia con el maga gente na guerra y nuay sila queber que manada kanila el ya muri. Como resulta, nuay mas ya queber el maga gente y ya principia maltrata con uno y otro.”

El un historian ya habla que ya principia cambia el mirada del maga gente na moralidad cuando ya principia sila creé na evolucion. El cuanto ta pensa que el maga gente un clase de animal que mas inteligente lang na otro maga animal. Poreso, ya compara el cuanto con el maga gente na maga violente perro y ya habla sila que normal lang queda violente na maga mahina.

El primer guerra mundial ya cambia gayot completamente con el mirada del maga gente na cosa el justo y mali. Gendeh mas ta pone atencion el maga gente con el cosa ta habla el maga de edad acerca na politica, el manera si paquemodo muda y na sexo. Ya sucede tambien este cay el maga iglesia ya acepta con el evolucion y ya anima con el maga gente que participa na guerra. El un oficial de Britain ya habla que el maga Cristiano Iglesia ta hace sale que nuay cosa malo na guerra y ta anima con el maga gente que participa aqui, y alegre tambien el militar na diila suporta.

Ya Ignora con el Maga Ley Acerca na Moralidad

Na tiempo despues el Guerra Mundial I, bien importante na maga gente el alegria. Ya ignora sila con el maga ley acerca na moralidad y aceptable kanila el maskin cosa. El un historian ya llama con el diez año despues del guerra como el Decada de Mal Conducta. Manada gente el nuay sigui con el maga ley de moralidad de antes y ya queda dificil para sabe si cosa maga ley el debe sigui.

El grabe crisis de economia despues del 1930 ya causa con el manada para queda bien pobre. Pagka-1939, el mundo ya principia otravez otro guerra que mas terrible—el Guerra Mundial II. Nuay dura, ya principia el maga nacion hace maga armas y maskin pa ya ayuda este con el economia, ya causa este grabe sufrimiento na mundo. Cuando ya acaba el guerra, bien manada ciudad el ya sale destrozao; dos de ese na Japan por causa lang na un atomic bomb! Millones el ya muri na maga concentration camp. Todo-todo, maga 50 millon hombre, mujer y maga bata el ya muri na ese guerra.

Durante el Guerra Mundial II, el maga gente ta actua asegun na cosa sila quierre y gendeh mas sila ta respeta na cosa el aceptable de antes. El libro Love, Sex and War—Changing Values, 1939-45, ya observa: “Durante na ese tiempo, gendeh mas ta permiti el maga gente con el maskin cosa que sangga kanila acerca na sexo. Ciendo nuay cosa ya sangga kanila durante el guerra, gendeh mas ta permiti el maga gente con el maskin cosa que controla kanila na diila casa y maskin na diila familia. . . . Por causa na guerra, ta pensa el maga gente que corto lang el vida y nuay este valor, y despues del guerra, ya principia sila mira con el matrimonio y familia como un cosa que gendeh permanente.”

Cay puede muri el maga gente na maskin cosa hora, necesita sila sinti que ta ama kanila maskin pa corto tiempo lang. El un mujer de Britain ya explica con este na ansina manera: “Gendeh kame maga imoral, tiene lang ta sucede guerra.” El un Americano soldao ya admiti, “Mayoria del maga gente ta pensa que maga imoral kame pero maga joven kame y puede kame muri mañana.”

Manada del maga gente quien ya sobrevivi na aquel guerra el tan dificil por causa na cosa sila ya mira. Manada del maga gente, maskin aquellos maga bata pa durante na aquel guerra, el ta sufri siempre ahora si ta acorda sila con el cosa ya sucede. Manada el ya perde el fe con Dios y maskin el diila moral. Como resulta, ya sinti sila que el cosa bueno y malo ta depende na circumstancia.

El Nuevo Normal na Maga Gente

Despues del Guerra Mundial II, tiene maga report el yan publish acerca na sexo. El uno de ese maga report na United States del maga 1940 amo el Kinsey Report que tiene mas de 800 pagina. Como resulta, manada gente el ya principia man cuento acerca na maga cosas que tiene que hace na sexo que gendeh comon del una. Maskin pa por de mas el manada del maga informacion, el report ta dale mira que ya cambia el opinion del maga gente acerca na sexo durante na aquel guerra.

Por cuanto tiempo, ta pricura pretende el maga gente que ta sigui sila con el cosa el justo y malo. Por ejemplo, na radio, salida y television, ta quita sila con el maga imoral ecsena. Pero nuay se dura. Si William Bennett que un secretary of education na U.S. de antes, ya explica: “Pronto lang ya cambia el mirada del maga gente na America na cosa el justo y malo.” Y manada tambien maga nacion el ya queda ansina. Porque este ya sucede del maga 1960?

Durante na aquel diez año, ya tiene mas libertad el maga mujer y ya cambia el mirada del maga gente na sexo. Cay tiene ya maga birth-control pill, ta puede sila man sexo cay sabe sila que gendeh sila queda priñada. Poreso, manada del maga gente el tan sexo que gendeh ta casa.

Na aquel mismo tiempo, el maga media, salida y maga programa na television ya principia acepta y dale mira maga cosas que gendeh sila ta dale mira de antes. Nuay dura, si Zbigniew Brzezinski, un oficial del U.S. National Security Council de antes, ya habla acerca si cosa kita puede mira na maga programa na TV: “Este maga programa ta dale mira que el alegria amo el de con todo importante, que normal lang el violencia y puede lang man sexo na manada persona.”

Durante del maga 1970, ya queda popular el maga video tape. Poreso, manada gente puede mira maga imoral salida na casa que gendeh mas sila necesita anda na cine. Ahora, si tiene tu computer, puede tu mira pornografia maskin onde pa tu ta queda.

Ta puede kita mira con el resulta de ese ahora. Por ejemplo, el un guardia na preso ya habla que maga diez año ya pasa, si tiene maga joven persona el tan preso, ta puede le discuti kanila si cosa el justo o malo. Pero ahora, gendeh mas sila ta entende el diferencia de ese.

Onde Tu Puede Incuntra Guia?

Gendeh kanaton puede ayuda el maga iglesia para sabe si cosa el justo y malo. En vez sigui con el cosa ya enseña si Jesus y el de suyu maga dicipulo, el maga iglesia ya queda parte de este mal mundo. El un escritor ya habla: “Na cada guerra, todo aquellos envuelto ta habla que ta ayuda kanila el Dios.” Si acerca na maga moral principio del Dios, cuanto año ya el ya pasa, el un ministro na New York City ya habla: “Mas poco pa el cosa ta pidi para queda miembro na un iglesia contra para munta bus.”

Claro que el grande cambio na moral de este mundo ta dale mira que tiene cosa necesita hace para cambia con este. Pero, cosa cambio el necesita? Quien hay hace con este y paquemodo este sucede?

[Blurb]

“Durante el Primer Guerra Mundial [1914-18], bien manada gente el ya muri que dol nuay lang valor el vida”

[Letrato]

El maga umalin clase de entretenimiento mas facil ya puede obtene