Hace Fuerte con el De Tuyu Determinacion

“El fuerte determinacion que descanza puma amo el un importante cosa que tiene aquellos quien ya puede quita con ese vicio.”​—“Stop Smoking Now!”

EL SIMPLE manera para descanza puma amo que debe etu mismo tiene determinacion para hace se. Paquemodo tu hace fuerte con el de tuyu determinacion? El un manera amo si considera tu si paquemodo queda mas enbuenamente el de tuyu vida si descanza tu puma.

Puede tu man tipid sen. Si puma tu con caja de cigarillo na un dia, hay gasta tu grande cantidad de sen na un año. “Nuay yo puede realiza que bien grande cantidad de sen el ya hace yo usik na tabaco.”​—Gyanu, Nepal.

Hay queda mas enbuenamente el de tuyu vida. “Ya queda enbuenamente el de mio vida cuando ya descanza yo puma.” (Regina, South Africa) Si ta descanza puma el un persona, ta queda enbuenamente el de suyu sentido para pruba y ole, y el de suyu ichura.

Hay mejora el de tuyu salud. “Tiene grande beneficio na salud del maga hombre y mujer maskin cosa el diila edad si descanza sila puma.”​—The U.S. Centers for Disease Control and Prevention.

Hay tene tu mas confianza na de tuyu mismo cuerpo. “Ya descanza yo puma cay no quierre yo queda esclavo del tabaco. Quierre yo iyo el controla con el de mio mismo cuerpo.”​—Henning, Denmark.

Hay beneficia el de tuyu familia y maga amigo. “El pumada . . . tiene mal efecto na salud de aquellos alrededor contigo. . . . Asegun na cosa ya discubri el maga experto, el secondhand smoke ya causa muerte del miles de maga gente cada año por causa na enfermedad na pulmon y corazon.”​—American Cancer Society.

Hay hace tu alegre con el de tuyu Creador. “Mi maga querido hermano: este maga promesa ya hace para canaton. Poreso, limpia kita todo mancha na diaton cuerpo.” (2 Corinto 7:1) “Presenta con el de ustedes cuerpo . . . sagrao y aceptable con Dios.”​—Roma 12:1, NWT.

“Cuando ya entende yo que gendeh aceptable con Dios el maga cosas que ta hace buling con el cuerpo, ya decidi yo descanza puma.”​—Sylvia, Spain.

Mas mucho, gendeh bastante el determinacion. Posible que necesita tambien kita el ayuda del otro, incluido el diaton familia y maga amigo. Cosa sila puede hace?