Pidi Ayuda

“El un persona puede ganá con el uno, pero el dos que junto puede ganá contra con ele.”​—Eclesiastes 4:12.

SI GENDEH kita solo, mas grande el chansa que ganá kita contra con el diaton contrario​—maskin quien o maskin cosa ese contrario. Poreso si quierre tu quita con el pumada, mas bueno que pidi tu ayuda con el de tuyu familia y maga amigo​—o con otro quien deverasan puede suporta y man paciencia contigo.

Puede tu considera pidi ayuda con aquellos quien ya puede quita con ese vicio. Cay puera que dale sila contigo mira empatia, puede tambien sila ayuda contigo. “Grande ayuda gayot conmigo el suporta del otro,” ya habla si Torben, un Cristiano na Denmark. Si Abraham, quien ta queda na India, ya escribi: “El deverasan amor que ya dale mira el de mio familia y maga hermano y hermana ya puede ayuda conmigo para descanza puma.” Pero tiene vez, gendeh bastante maskin el suporta del familia y del maga amigo.

“Ya puma yo por 27 año,” ya habla el un hombre, si Bhagwandas, “pero por causa cay ya aprende yo si cosa el Biblia ta habla acerca na maga mabuling vicio, ya decidi yo descanza puma. Ya pruba yo menora el de mio pumada. Nuay mas yo man junto con el de mio maga uban de antes. Y ya pidi yo ayuda del maga experto. Pero todo se, nuay puede ayuda conmigo. Un noche, ya habla yo el todo con Dios Jehova na rezo y ya pidi yo con ele que ayuda conmigo quita con el de mio vicio. Despues de ese, ya puede yo descanza puma!”

El otro importante cosa que necesita hace amo prepara na maga dificultad que posible tu enfrenta. Cosa se maga dificultad? Hay explica se na sunod articulo.

[Cajon]

DEBE BA TU USA MAGA MEDICINA?

Grande sen el ya puede hace aquellos quien ta hace maga medicina que ta puede ayuda con otro descanza puma, igual con el nicotine patch. Pero antes tu decidi si usa ba tu maga medicina, considera con el siguiente maga pregunta:

Cosa el maga beneficio? Aquellos quien ta recomenda con ese maga medicina ta clama que puede se ayuda contigo para gendeh tu tanto experiencia maga withdrawal symptom. Pero, gendeh todo maga gente tan uyun que ese maga medicina deverasan ta puede ayuda.

Cosa el maga peligro? El cuanto maga medicina posible tiene maga mal efecto, igual como nausea, depression y el tendencia que man suicide. Puera con ese, ese maga medicina tiene siempre nicotine que tiene maga mal efecto na de tuyu salud. Poreso, el deverasan, el persona quien ta usa con ese maga medicina adicto lang siempre na nicotine.

Cosa el otro maga alternativo manera? Na un survey, 88 por ciento de aquellos quien ya puede quita con el pumada ya habla que el cosa ya puede ayuda kanila amo que ya descanza dayun sila puma maskin nuay sila usa maga medicina.