Prepara Para na Maga Dificultad

“Ya decidi yo descanza puma cay tiene kame nuevo nacido bata. Poreso, ya pone yo un caratula ‘No Smoking’ apuera del diamon casa. Pero un hora lang despues, ta busca nicotine el de mio cuerpo. Nuay yo puede aguanta y ya cindi yo un cigarillo.”​—Yoshimitsu, Japan.

EL EXPERIENCIA de Yoshimitsu ta dale mira que tiene maga dificultad que posible tu enfrenta si descanza tu puma. Mas pa, asegun na research cerca 90 por ciento de aquellos nuay puede aguanta puma el ya bira lang siempre na diila vicio. Poreso si quierre tu descanza puma, mas grande por ciento que puede tu se hace si preparao tu na maga dificultad que posible tu enfrenta. Cosa el cuanto con ese?

El tendencia busca nicotine: Mas mucho, ta sucede se tres dia despues el de tuyu ultimo pumada y ta perde se despues del maga dos semana. Durante na ese tiempo “el deseo puma ta llega-llega lang y ta perde lang se,” ya habla el un pumador de antes. Pero maskin cuanto año ya el ya pasa, posible siempre bira el de tuyu deseo puma. Si sucede se, resisti con el deseo puma. Espera pasa el cinco minuto o mas pa y hay perde lang se deseo.

El otro maga withdrawal symptom: Na primero, ta man dificil sila este dispierto o concentra y posible, mas pronto sila queda gordo. Posible tambien que ta suda sila, ta tose, tiene cosa duele na cuerpo y rasca. Posible tambien que pronto perde diila paciencia, pronto rabia o tiene sila depression. Pero mas mucho del maga sintomas, ta perde lang despues del cuatro para seis semana.

Durante na este maga tiempo, tiene cuanto practical cosa que puede ayuda contigo. Por ejemplo:

● Dale mas tiempo para durmi.

● Toma manada agua o juice. Come maga sustancioso comida.

● Tene un balance ejercicio.

● Resulla hondo y imagina con el limpio aire que ta entra na de tuyu pulmon.

Cosas que puede contigo dale gana puma: Incluido alli el maga actividad o maga sentido que puede causa contigo para puma. Por ejemplo, baka yan anad tu puma mientras ta toma. Poreso si quierre tu descanza puma, evita toma por largo hora. Na uliji, si puede ya tu quita con el vicio, puede ya tu otravez bira na normal.

Maskin pa gendeh mas tu ta usa nicotine si ta hace tu el cuanto cosas, posible siempre tu sinti que quierre tu puma. “Diez y nueve año despues yo descanza de mio vicio,” ya admiti si Torben que ya menciona enante, “Tiene siempre yo el deseo puma si ta man cafe.” Pero, el deseo puma mientras ta hace un cosa hay perde lang pasa el tiempo.

Pero, diferente el situacion si ta puma tu mientras ta toma alcoholico tomada. Poreso si quierre tu descanza puma, necesita tu evita con el maga alcoholico tomada y na maga lugar que donde tiene tomada. Manada gente ta puma otravez cay ta toma sila alcoholico tomada. Porque?

● Maskin el umpoco alcoholico tomada ta hace grabe con el efecto del nicotine na cuerpo del gente.

● Mas mucho de aquellos quien ta toma junto con otro ta puma.

● El persona que tomao gendeh mas tanto ta puede determina si cosa el justo y gendeh mas le tanto ta puede controla con el de suyu cuerpo. El Biblia ta habla que el “vino ta quita con el deseo que hace si cosa el justo.”​—Oseas 4:11.

Maga persona con quien tu tan junto: Iscuji si con quien tu man junto. Por ejemplo, evita man junto si gendeh necesita con el maga gente quien ta puma o con el un persona quien posible convida contigo puma. No tambien man junto con aquellos quien posible gangguia contigo cay quierre tu descanza puma.

De tuyu emocion: Asegun na un research, halos 70 por ciento de aquellos quien ya bira na vicio ya puma cay stress sila o rabiao. Poreso si el un sentido ta causa contigo para puma, hace otro cosa. Puede tu toma agua, man usang bubble gum o camina. Hace cosas positivo, igual como reza con Dios o le cuanto pagina del Biblia.​—Salmo 19:14.

Evita Man Razon

● Un halada lang man.

El deverasan: Na un halada lang, hay entra ya el 50 por ciento de nicotine que necesita el de tuyu cuerpo adentro lang de tres hora. Como resulta, dol ya bira lang tu otravez na de tuyu vicio.

● El pumada ta ayuda conmigo si stress yo.

El deverasan: Actualmente asegun na research, el nicotine ta hace mas stress contigo. Posible, dol ya sinti tu tiene alivio cay temporario ya perde el maga withdrawal symptom.

● Atrasao ya para descanza puma.

El deverasan: Imposible kanaton hace el un cosa si negativo kita. El Biblia ta habla: “Si tan luya tu na tiempo de problema, hay menora el de tuyu fuerza.” (Proverbio 24:10) Poreso, evita queda negativo. El todo quien deverasan quierre quita con ese vicio y ta sigui con el maga sugestion, igual con aquellos que ya menciona na este magasin, puede descanza puma.

● Gendeh yo puede aguanta con el maga withdrawal symptom.

El deverasan: Maskin pa grabe el maga withdrawal symptom, hay perde lang ese despues del cuanto semana. Esta determinao! Si ya sinti tu que quierre tu otravez puma despues del cuanto meses o maga año, pronto lang se perde​—si gendeh tu cindi con el cigarillo.

● Tiene yo problema na pensamiento.

El deverasan: Si ansina el de tuyu condicion por causa na depression o schizophrenia, pidi ayuda na doctor que ayuda contigo descanza puma. Posible, hay cambia le con el manera del cura o con el medicina que ta usa tu para gendeh queda mas grabe el de tuyu enfermedad cay ya descanza tu puma.

● Si ya puede yo otravez puma, ta sinti yo que ya falla yo.

El deverasan: Si ya ganá contigo el de tuyu inclinacion​—ya puma tu otravez igual na cosa ta sucede con otro quien ta pricura descanza puma—​no tu pensa que nuay mas tu esperanza cambia. No man luya. Continua pricura quita con ese. Hay falla lang tu si descanza tu hace esfuerzo. Poreso si hay continua tu, na uliji hay tene tu buen exito!

Considera con el experiencia de Romualdo, quien ta puma por 26 año y ya puede quita con ese mas de 30 año ya el ya pasa. “Gendeh mas yo ta acorda si cuanto beses yo ya puma otravez,” ele ya escribi. “Cada vez se ta sucede, ta sinti yo dol aquel nuay mas ya yo esperanza. Pero cuando ya queda gayot yo determinao que tene buen relacion con Dios Jehova y manada beses ya pidi con el de suyu ayuda na rezo, ya puede yo permanente descanza puma.”

Na ultimo articulo na este serie, hay considera kita omento maga practical sugestion que puede ayuda contigo queda alegre como un persona quien ya descanza puma.

[Cajon/​Letrato]

PELIGROSO NA MASKIN COSA CLASE

Ta usa con el tabaco na manada manera. El cuanto maga producto de tabaco puede incuntra na maga tienda que ta vende maga comida y herbal medicina. Pero asegun na World Health Organization, peligroso el tabaco na maskin onde man con ese usa. Posible muri el gente por causa na maga enfermedad que ta saca na tabaco, igual na cancer y enfermedad na corazon. El maga mujer priñada quien ta puma posible causa peligro na vida del maga bata que nuay pa nace. Na cosa maga producto mas mucho ta usa con el tabaco?

Bidis: Un diutay cigarillo este que ta rolla de mano y comon ta usa na maga lugar na Asia. Tiene este mas manada tar, nicotine y carbon monoxide contra na maga ordinario cigarillo.

Cigars: Ya envolve este na ojas de tabaco o na papel que hacido de tabaco. Gendeh este tanto acidic si compara na otro cigarillo poreso pronto lang entra el nicotine na boca maskin gendeh con este ta cindi.

Kretek o cigarillo que hacido de clove: Mas mucho, ta contene este maga 60 por ciento tabaco y 40 por ciento clove. Mas manada este tar, nicotine y carbon monoxide si compara na maga ordinario cigarillo.

Cuaco: Nuay diferencia el pumada usando el cuaco y el cigarillo cay igual se puede causa maga cancer y otro maga enfermedad.

Tabaco que gendeh necesita puma: Incluido alli el mascada de tabaco, snuff y gutkha que ta usa na Southeast Asia. El nicotine ta entra na cuerpo por medio na boca. Este manera de usada igual lang de peligroso na otro manera de usada de tabaco.

Water pipe: Por medio con este instrumento, el humera de tabaco ta pasa na agua antes con este hila. Maskin pa ansina, este proceso gendeh ta menggua con el toxin, incluido el otro maga substance que ta causa cancer que ta entra na pulmon.

[Cajon/​Letrato]

AYUDA CON OTRO DESCANZA PUMA

● Queda positivo. Mas bueno si habla kita cosas positivo contra man sermon kanila. Mas bueno si habla kita, “Ta mira yo puede tu se quita si continua tu hace esfuerzo” contra “Ya puma ya tambien tu otravez?”

● Queda preparao perdona. Man paciencia si ya rabia contigo el persona quien ta pricura descanza puma. Habla kanila maga buen cosas igual como, “Sabe yo dificil se hace pero alegre yo cay ta pricura tu.” Nunca habla, “Mas bueno pa tu de antes cuando ta puma tu!”

● Queda un deverasan amigo. El Biblia ta habla: “El verdadero amigo ta ama na todo tiempo, y un hermano quien ya nace para na tiempo de dificultad.” (Proverbio 17:17) Pricura queda paciencioso y amable “na todo tiempo” con el un persona quien ta pricura quita de suyu vicio maskin cuando o maskin cosa le ta sinti.