Un Falso Amigo

Tiene tu un “amigo” con quien tu ya conoce cuando joven tu. Por causa con ele, ta sinti tu que ya queda tu un adulto y dol mas ta acepta contigo el de tuyu maga amigo. Si triste tu, ta puede le dale contigo “alivio.” Na manada situacion, con ele tu ta atraca para pidi ayuda.

Pero ya llega el tiempo, ya discubri tu que peligroso ele. Quierre le que pirmi sigui contigo maskin pa por causa con ele, gendeh tu puede entra na cuanto lugar. Y maskin pa ta manda le sinti contigo que dol mas adulto ya tu, ta pone tambien le na peligro con el de tuyu salud. Mas pa con ese, ta ruba le con el cuanto del de tuyu sen.

Del cuanto tiempo ya pasa, ya pricura tu separta con ele pero no quierre le larga contigo. Dol vene cae, ya queda ya le el de tuyu amo. Ya arripinti gayot tu cay ya conoce tu con ele.

MANADA de aquellos quien ta puma ansina el cosa ta sinti acerca na cigarillo. Despues del 50 año que ele ta puma, el un mujer que si Earline ya acorda: “Mas ta puede ayuda conmigo el cigarillo contra na otro gente. Gendeh lang este basta un amigo de mio de antes​—tiene vez este lang el de mio amigo.” Pero na uliji, ya realiza si Earline que el cigarillo gendeh lang basta un falso amigo, sino peligroso tambien este para con ele. Tupao para con ele el cosa ya menciona arriba. Pero, el diferente lang amo que ya descanza le con el de suyu vicio cuando ya sabe le que el pumada gendeh aceptable con Dios cay ta hace este buling con el diaton cuerpo.​—2 Corinto 7:1.

El un hombre, si Frank, ya decidi tambien que descanza puma para hace alegre con Dios. Pero un dia pa lang despues ele puma con el de suyu ultimo cigarillo, nuay le aguanta y ya pricura ele busca maga upus de cigarillo maskin onde. “Na ese tiempo, ya decidi yo,” habla si Frank. “Ta asquia ya gayot yo cay ta pricura yo busca maga upus de cigarillo abajo del casa. Despues de aquel, nuay mas ya gayot yo puma.”

Porque bien dificil para descanza puma? Tiene cuanto maga razon que ya puede discubri el maga researcher: (1) El maga producto de tabaco maka-addict igual con el maga prohibido droga. (2) El nicotine que ya entra na resuello puede alcanza na utuk adentro lang na siete segundo. (3) El pumada amo un importante parte del vida del un persona quien ta puma cay mientras ta hace le se, ta sigui le come, toma, converza o ta sinti le que ta dale se con ele alivio y otro pa.

Pero igual na cosa ya dale mira na experiencia de Earline y Frank, puede quita con este peligroso vicio. Si ta puma tu pero quierre tu descanza, el siguiente maga articulo puede ayuda contigo para hace se.