Si Paquemodo Yo Ya Incuntra el Solucion na Injusticia

Asegun na istoria de Ursula Menne

Desde antes, tiene yo el deseo que puede yo mira que ta trata con el maga gente con justicia. Gane por causa con este, yan preso yo na Communist East Germany. Na todo lugar, alla pa yo ya puede incuntra el solucion na injusticia. Este el cosa ya pasa.

YA NACE yo del 1922 na lugar de Halle, Germany que ta existi ya mas de 1,200 año. Puede incuntra con este lugar maga 200 kilometro na southwest parte del Berlin. El Halle amo el uno del maga primer lugar del maga Protestante. El de mio hermana, si Käthe, ya nace del 1923. Si Papang ta sirvi na militar y si Mamang ta canta na teatro.

Por causa con Papang, ya tiene yo el deseo que solva con el injusticia. Cuando ya descanza le queda soldao, ya cumpra le un tienda. Ciendo pobre el mayoria del quien ta cumpra, ta tiene le lastima kanila poreso ta dale le debe. Pero por causa con este, yan bankrupt le. El experiencia de Papang ya enseña era conmigo que bien dificil quita con el injusticia. Pero, ciendo joven pa yo, bien fuerte el de mio deseo que solva con el injusticia.

Ya hereda yo con Mamang el hilig na art. Y ya enseña le kanamon de Käthe acerca na musica, cancion y bailada. Un alegre y activo bata yo y kame de Käthe tiene bonito clase de vida. Pero ya cambia que del año 1939.

Ya Principia el Maga Dificultad

Despues yo man high school, ya entra yo un escuela de ballet, donde ya aprende tambien yo el Ausdruckstanz dance, un clase de bailada que ya enseña si Mary Wigman. Uno ele na maga quien ya principia este clase de bailada, donde el quien ta baila necesita expresa el de suyu sentido por medio na bailada. Ya principia tambien yo man painting. Poreso cuando teenager yo, ya sinti yo bien alegre y mucho yo cosa ta puede aprende. Pero cuando ya llega el 1939, ya sucede el Guerra Mundial II. Tiene pa otro dificultad ya sucede del 1941, cuando si Papang ya muri por causa na tuberculosis.

Bien dificil gayot cuando na tiempo del guerra. Maskin 17 año pa yo cuando ya principia el guerra, ya pensa yo que el mundo ya queda ya bien trambulicao. Bien manada maga normal gente el ya queda influenciao del Nazi. Despues, ya tiene escasez, muerte y destrozo. El diamon casa ya queda destrozao por causa na bomba y na tiempo del guerra, mucho del miembro del de mio familia el ya muri.

Despues el guerra del 1945, si Mamang, si Käthe y iyo ta queda siempre na Halle. Y na este tiempo, tiene ya yo marido y un baby mujer pero el diamon matrimonio manada problema. Yan separtajan kame y ya trabaja yo como un dancer y painter para suporta con el de mio mismo cuerpo y con el de mio anak mujer.

Despues del guerra, el Germany ya dividi na cuatro region y el diamon lugar ya queda bajo na control del Soviet Union. Poreso, necesita kame todo man anad bajo na rulanza del maga Comunista. Del 1949, el diamon region na Germany que ta llama East Germany, ya queda German Democratic Republic (GDR).

El Vida Bajo na Maga Comunista

Na ese maga año, ya enferma si Mamang y necesita yo cuida con ele. Ya trabaja yo na un oficina de gobierno. Despues, ya conoce yo un activista estudiante quien ta pricura manda sabe con otro el injusticia que ta sucede. Por ejemplo, el un universidad nuay acepta con el un joven cay el de suyu tata un miembro de Nazi de antes. Bien conoce yo con aquel estudiante cay junto kame de antes ta tuca. Ya pensa yo, ‘Porque ele necesita sufri por causa na cosa ya hace de suyu tata?’ Mas ya queda yo envuelto na maga activista y ya decidi yo sigui na maga protesta. Un dia, ya hace pa gane yo pilit maga leaflet apuera na escalera del local corte.

Mas ya omenta el de mio rabia na injusticia por causa na maga carta que ya manda conmigo man type como un secretaria na Regional Peace Committee. Un tiempo por causa na politica, el Committee ya plaña imbia un propaganda de maga Comunista con el un de edad hombre quien ta queda na West Germany para suspecha con ele. Ya sinti gayot yo bien rabiao por causa na injusticia para con este hombre poreso ya esconde yo con el maga propaganda na oficina. Poreso, nuay este puede imbia.

Ya Dale Conmigo Esperanza “el De Con Todo Malo Persona na Cuarto”

Del Junio 1951, dos hombre el ya anda na de mio oficina y ya habla: “Hay arresta kame contigo.” Ya lleva sila conmigo na preso que ta llama Roter Ochse o Red Ox. Despues del un año, ya acusa conmigo que ta man contra na Estado. El un estudiante ya avisa na Stasi, o secret police, que ya hace yo pilit maga leaflet. Gendeh gayot justo el de mio hearing cay nuay quien ta oi con el de mio defensa. Ya sentencia conmigo por seis año na preso. Durante ese tiempo, ya enferma yo y ya lleva conmigo na dormitorio del hospital na preso donde tiene maga 40 paciente mujer. Cuando ya puede yo mira con aquel maga gente que bien triste, ya principia yo man panic. Ya corre yo para na puerta y ya bombia con ese.

“Cosa tu quierre?” el guardia ya pregunta.

“Necesita yo sale aqui,” ya grita yo. “Pone conmigo na bartolina si quierre ustedes, basta hace conmigo sale aqui!” Siempre, nuay le hace caso conmigo. Despues, ya nota yo un mujer quien diferente na otro. Puede mira na de suyu ojos que calmao le. Poreso, ya sinta yo junto con ele.

“Si sinta tu junto conmigo, tiene cuidao,” ya habla le y ya espanta yo. Despues, ele ya omenta, “El otro ta pensa que iyo el de con todo malo persona na cuarto cay uno yo del maga Testigo de Jehova.”

Na ese tiempo, no sabe yo que ta mira con el maga Testigo de Jehova como maga enemigo del Estado de Comunista. Pero el cosa yo sabe, tiene dos Estudiante del Biblia (como cosa ta llama con el maga Testigo de antes) el pirmi ta visita con Papang cuando bata pa yo. Gane, ya acorda yo el cosa ya habla si Papang, “Justo el maga Estudiante del Biblia!”

Ya puede yo llura cuando ya puede yo conoce con este mujer que si Berta Brüggemeier. “Pabor, enseña conmigo acerca con Jehova,” ya habla yo. Principia na aquel tiempo, pirmi kame tan junto y ta discuti con el Biblia. Manada yo cosa ya puede aprende con ele, ya puede yo aprende que el verdadero Dios, si Jehova, un Dios de amor, justicia y paz. Ya puede tambien yo aprende que hay quita le con el todo mal resulta que ya causa el maga malo. “Corto tiempo ya lang, el maga malo gendeh mas existi . . . Pero el maga sumiso hay hereda con el tierra y hay queda sila bien alegre cay tiene sila incomparable paz,” ya habla el Salmo 37:10, 11.

Ya Libra Conmigo y Ya Anda Yo na West Germany

Despues de mas de cinco año na preso, ya larga conmigo del 1956. Cinco dia despues conmigo larga, ya sale yo na GDR para queda na West Germany. Aquel tiempo, tiene ya yo dos anak mujer, si Hannelore y si Sabine, y ya lleva yo kanila junto conmigo. Yan divurcio kame man maridable y tiene ya tambien maga Witness con quien yo ya conoce. Mientras ta estudia yo con el Biblia, ya realiza yo que necesita yo hace cuanto maga cambio para puede yo vivi harmonia na maga principio de Jehova. Ya puede yo se hace y ya bautiza yo del 1958.

Nuay dura, ya casa yo otravez y na ese tiempo, na un Testigo de Jehova​—si Klaus Menne. Ya tiene kame un alegre matrimonio y dos bilug anak, si Benjamin y Tabia. Maka-triste, ya muri si Klaus maga 20 año ya el ya pasa na un accidente y desde aquel, ya queda yo un viuda. Pero, el esperanza de resureccion ta dale gayot conmigo comforta cay sabe yo hay resucita con el maga muerto na un Paraiso tierra. (Lucas 23:43; Maga Actividad 24:15) Bien alegre gayot yo cay el todo de mio cuatro anak ta sirvi con Jehova.

Por medio na de mio Bible study, ya puede yo aprende que solamente si Jehova el quien puede dale deverasan justicia. Gendeh igual con el maga gente, ta considera le con el todo diaton maga circumstancia, incluido el diaton background—maga detalle que mas mucho gendeh ta puede mira el otro. Este precioso saber ya dale conmigo paz hasta ahora, especialmente si ta puede yo mira o ta experiencia injusticia. El Eclesiastes 5:8 ta habla: “Si puede tu mira que ta maltrata con el maga pobre y tiene quien ta viola con el justicia na de ustedes distrito, no tu estraña. Cay ta vicia con ese alto oficial el uno que mas alto que con ele y tiene pa otro quien mas alto que kanila.” Siempre, el “mas alto que kanila” amo el diaton Creador. “Todo desnudo y . . . claro gayot na maga ojos de Aquel con quien ay dale kita cuenta,” ya habla el Maga Hebreo 4:13 (El Nuevo Testamento na Chavacano).

Ta Acorda Yo con el De Mio Vida Cerca 90 Año Ya el Ya Pasa

Tiene vez, ta pregunta conmigo el otro si cosa el vida bajo na rulanza del Nazi y del Comunista. Igual lang gendeh facil el vida na ese tiempo. Igual con el todo forma de gobierno, este dos forma de gobierno ta dale mira que el maga gente gendeh puede rula con el diila mismo cuerpo. El Biblia franca y claro ya habla: “El gente ya domina con el gente para na de suyu perjuicio.”​—Eclesiastes 8:9.

Cuando joven yo y nuay experiencia, ta pensa yo que el gente puede rula con justicia. Pero ahora, sabe ya yo si cosa el deverasan. Solamente el diaton Creador el quien puede dale deverasan justicia na tierra. Hay hace le se si hay destroza ya le con el todo maga malo y dale el rulanza na tierra na de suyu Anak, si Jesucristo, quien pirmi ta hace una el bien del otro. Acerca con Jesus, el Biblia ya habla: “Ta ama Uste el justicia y ta odia el maldad.” (Maga Hebreo 1:9) Ta rindi gayot yo gracias con Dios cay ya hace le conmigo cerca con el buen Rey y ta esperanza yo vivi bajo na de suyu rulanza hasta para cuando!

[Letrato]

Junto con el de mio maga anak, si Hannelore y Sabine despues kame llega na West Germany

[Letrato]

Junto con el de mio anak, si Benjamin y de suyu mujer, si Sandra