Puede ba tu habla kanamon el de tuyu pasada?

Ya nace yo del 1979 na United States. Cuando tres año yo, yan divurcio el de mio mayores. Ya hace conmigo engranda el de mio nana na maga tradicion de Judio y ya imbia conmigo na maga yeshiva o maga escuela de maga Judio. Cuando siete año yo, ya cambia kame na Israel por un año y ya atende yo na un escuela de un comunidad que ta llama kibbutz. Despues, ya cambia kame del de mio nana para na Mexico.

Maskin pa nuay sinagoga na diamon lugar, ya continua yo hace con el de mio maga tradicion de Judio. Ta sindi yo candela durante el Sabbath, ta le con el diamon Torah y ta reza por medio del un siddur o prayer book. Na escuela, pirmi yo ta habla con el de mio maga classmate que el de mio religion amo el original. Nuay yo le con el libro que ta llama sila Nuevo Testamento que tan centro na ministerio y enseñanza de Jesucristo. Gane, ya dale aviso el de mio nana que no hace se cay baka queda yo influenciao na maga enseñanza de este.

Porque tu ya decidi le con el Nuevo Testamento?

Cuando ya queda yo 17, ya bira yo otravez na United States para hace acaba con el de mio escuela. Alla, tiene yo un conoce quien ya habla conmigo que un Cristiano le y gendeh queda completo el de mio vida si nuay si Jesus.

“El maga gente quien ta creé con Jesus nuay direccion el vida,” ya contesta yo.

“Ya le ya ba tu con el Nuevo Testamento?” ya pregunta le.

“Nuay,” ya contesta yo.

“Si ansina,” ya habla le, “gendeh ba dol aquel tu ignorante quien ta dale opinion na un cosa que nuay tu cosa sabe?”

Ya abri gayot quel el de mio pensamiento cay para conmigo gendeh razonable que dale opinion na un cosa que nuay yo cosa sabe. Poreso, ya lleva yo bolbe con el de suyu Biblia na diamon casa y ya principia le con el Nuevo Testamento.

Paquemodo ya afecta contigo el cosa tu ya le?

Nuay gayot yo expecta que maga Judio el maga escritor del Nuevo Testamento. Mas pa, si mas ta le yo con este, mas ta puede yo mira con Jesus como un bueno, humilde Judio quien quierre ayuda con el maga gente y gendeh ta abusa kanila. Gane, ya anda yo na library y ya presta maga libro acerca con ele. Pero, nuay ni uno de este el ya convinci conmigo que ele el Mesias. Gane, el cuanto ya refiri con ele como Dios—un cosa que gendeh razonable para conmigo. Cay con quien man ta reza si Jesus—con el de suyu mismo cuerpo? Mas pa, ya muri si Jesus. Pero, el Biblia ya habla acerca con Dios: “Gendeh tu ta muri.” *

Paquemodo tu ya incuntra el contestacion na ese maga pregunta?

El verdad gendeh tan contra con el verdad y determinao yo busca con ese. Poreso, ya reza yo con todo corazon con Dios mientras ta llura—por primer vez que gendeh ta usa con el de mio siddur. Nuay lang pa dura despues yo reza, tiene yan tuktuk na puerta. Tiene ya llega dos bilug Testigo de Jehova. Ya dale sila conmigo uno del diila maga publicacion que ta usa na estudiada del Biblia. Este publicacion y el cosa kame ya discuti del maga Testigo ya convinci conmigo que el diila creencia amo base na Biblia. Por ejemplo, ta conoce el maga Testigo con Jesus gendeh como un parte del Trinidad sino como “el Anak del Dios” * y “el Tuburan de todo maga cosa-cosa ya crea el Dios.” *

Nuay dura, ya bira yo na Mexico donde ya continua yo estudia con el maga profecia acerca del Mesias junto con el maga Testigo. Nuay yo expecta que bien manada gale profecia! Maskin pa ansina, yan duda siempre yo. Ya pensa yo: ‘Con Jesus lang ba gayot ya cumpli el maga profecia?’ y ‘Paquemodo si ta pretende lang le que ele el Mesias?’

Cosa el ya convinci gayot contigo?

El maga Testigo ya dale mira conmigo maga profecia que imposible hace el maga impostor. Por ejemplo, mas de 700 año adelantao, si profeta Miqueas ya habla que el Mesias hay nace na Betlehem, Judea. * Quien man puede controla onde le nace? Si Isaias ya escribi que hay mata con el Mesias como un criminal pero hay entera con ele junto con el maga rico. * Todo este maga profecia ya cumpli con Jesus.

El ultimo evidencia amo tiene que hace na linea de descendencia de Jesus. El Biblia ta habla que el Mesias amo un descendiente de Rey David. * Cay ta recuji el maga Judio de antes el maga record de linea de descendencia, si nuay sale si Jesus na linea del familia de David, asigurao ya hace se calayat el de suyu maga enemigo. Pero, nuay se sila puede hace cay claro ta dale mira el evidencia que ya sale si Jesus na linea de David. Gane, el maga gente ta llama con ele “el Anak de David.” *

Del 70 C.E.—37 año despues muri si Jesus—el maga Romano soldao ya destroza con el Jerusalem y el maga record del linea de descendencia ya perde o ya destroza. Entonces, para puede conoce con el Mesias por medio na linea de descendencia, necesita le aparece antes el 70 C.E.

Paquemodo este informacion ya afecta contigo?

El Deuteronomio 18:18, 19 ya predicta que el Dios hay imbia un profeta igual con Moises na Israel. “Responsable conmigo el gente quien gendeh oi con el de mio maga palabra que hay habla le na de mio nombre,” el Dios ya habla. El de mio hondo estudiada del entero Biblia ya convinci conmigo que si Jesus de Nazaret amo ese profeta.