Hace prioridad. “Asigura el maga cosas que mas importante,” ya habla el Biblia. (Filipo 1:10, NWT) Prepara un lista del maga cosas que importante o necesita hace dayun y acorda que el maga cosas que importante—igual como cumpra comida para cena—posible gendeh necesita dayun hace. Y el cosa que dol necesita hace dayun—igual como mira con el de tuyu favorito programa na TV—posible gendeh importante.

Pensa adelantao. “Si mapurul el hacha y nuay con este amula, necesita le mas grande esfuerzo para usa con ese,” ya habla el Eclesiastes 10:10 y ya omenta: “Pero el sabeduria ta ayuda para tene buen exito.” El leccion? Si amula tu con el de tuyu hacha—quierre decir, si plaña tu adelantao—puede tu usa con el de tuyu tiempo na de con todo efectivo manera. Hace uliji o quita con el maga trabajo que gendeh importante que ta saca lang con el de tuyu tiempo y fuerza. Si ya acaba ya tu hace con el maga cosas que necesita tu hace, porque gendeh hace con el trabajo que yan schedule tu que hace na otro tiempo? Si pensa tu adelantao, puede tu queda mas productivo, igual con el un sabio trabajador quien ya amula con el de suyu hacha.

Hace simple con el de tuyu vida. No hace el maga cosas que gendeh importante o ta hace lang acaba con el de tuyu tiempo. Si bien manada tu cosa hace, puede se causa stress contigo y quita con el de tuyu alegria.

Tan dulug y gendeh dayun ta decidi. “El quien ta vicia con el viento gendeh puede siembra y el quien ta vicia con el celaje gendeh puede cosecha.” (Eclesiastes 11:4) El leccion? Si tan dulug kita, ta hace lang kita usik con el diaton tiempo y poco lang el cosa kita ta puede hace. Si el un siembrador ta espera pa que queda bien enbuenamente el situacion, posible gendeh le puede siembra o cosecha. Na igual manera, posible gendeh dayun kita ta decidi cay ta espera pa kita que queda enbuenamente el diaton situacion. O posible, ta sinti kita que necesita pa kita espera que tene el todo informacion que necesita kita sabe antes de hace decision. Siempre, necesita kita el bastante informacion y pensa enbuenamente antes hace maga importante decision. “El sabio ta pensa antes hace paso,” ya habla el Proverbio 14:15. Pero el deverasan, necesita kita hace maga decision maskin pa nuay el todo informacion que quierre kita sabe.—Eclesiastes 11:6.

Pagka-perfeccionista. “El saber que ta sale na cielo [o ta sale con Dios] . . . ta tene consideracion,” ya habla el Santiago 3:17. Siempre, bueno si quierre kita hace con el un cosa na enbuenamente manera. Pero tiene vez, posible bien alto el cosa kita ta expecta na diaton mismo cuerpo y gendeh mas kita con ese ta puede hace poreso tan luya lang kita. Por ejemplo, el un persona quien ta aprende otro lengguaje debe queda preparao que hace maga kamali, ciendo sabe le que hay aprende le na ese manera. Pero si el un persona ta tiene gayot miedo que man kamali, mas dificil con ele para aprende con ese lengguaje. Mas bueno pa si gendeh bien alto el cosa kita ta expecta na diaton mismo cuerpo! “El sabeduria talli con el maga modesto,” ya habla el Proverbio 11:2. Mas pa, el maga modesto y humilde gente gendeh sobra de serioso y ta puede re na diila mismo cuerpo si tan kamali sila.

Tene tiempo na trabajo y recreacion. “Mas bueno pa el diutay descanzo contra na sobra trabajo y ta hace apas na viento.” (Eclesiastes 4:6) El maga gente quien sobra ta trabaja gendeh ta provecha con el resulta del diila trabajo. Nuay mas sila tiempo o fuerza que usa para na otro cosas. Pero, el maga plojo mas quierre con el “sobra descanzo” y hace usik con el diila precioso tiempo. El Biblia ta anima que tene balance mirada: Trabaja enbuenamente y queda alegre na resulta de este. Ese alegria amo ‘regalo del Dios.’—Eclesiastes 5:19.

Tene bastante durmida. “Hay acusta yo y durmi con paz,” ya habla el un escritor del Biblia. (Salmo 4:8) Mayoria del maga adulto necesita maga ocho hora de durmida cada denoche para el diila cuerpo, emocion y pensamiento hay queda na condicion. Si tiene kita bastante durmida, ta usa kita enbuenamente con el diaton tiempo cay ta ayuda este na diaton concentracion y memoria para puede kita aprende maga nuevo cosas. Pero si gendeh bastante el diaton durmida, dificil para kanaton aprende maga nuevo cosas, puede este causa maga accidente, kamali y mas facil kita queda iritable.

Hace maga goal que puede tu alcanza. “Mas bueno pa queda alegre na cosa ta puede mira el ojos contra desea con el maga cosas que gendeh puede obtene.” (Eclesiastes 6:9) El punto? El un sabio persona gendeh ta permiti con el de suyu maga deseo que controla con el de suyu vida, especialmente si gendeh realistico ese maga deseo o imposible obtene. Poreso, gendeh con ele puede engaña el maga advertisement o cae na tentacion que man debe. En vez, ya aprende le queda contento na cosa le puede obtene—“na cosa ta puede mira el [de suyu] ojos.”

Considera con el de tuyu maga principio. El de tuyu maga principio hay ayuda contigo para determina si cosa el bueno, importante y si cosa el tiene beneficio. Si pana el de tuyu vida, el de tuyu maga principio hay asenta con ese pana. Entonces, el maga buen principio hay ayuda contigo para hace maga justo prioridad na vida y usa con el de tuyu tiempo na de con todo buen manera cada hora y cada dia. Onde tu puede incuntra con ese maga principio? Manada gente el ta busca con ese na Biblia cay ta contene este incomparable sabeduria.—Proverbio 2:6, 7.

Dale mira amor. “El amor ta dale unidad,” ya habla el Colosa 3:14. Gendeh kita puede queda deverasan alegre y sinti protegido si nuay amor, especialmente adentro na familia. El maga gente quien ta ignora con ese verdad, quien posible ta dale prioridad na diila riqueza o trabajo, gendeh queda alegre. Poreso, el Biblia ta hace claro que el amor amo el de con todo importante cosa y gane ya menciona con este mas de cien beses.—1 Corinto 13:1-3; 1 San Juan 4:8.

Dale tiempo para na de tuyu espiritual necesidad. El un hombre que si Geoff tiene un amable mujer, dos anak, maga buen amigo y ta trabaja como un paramedic. Pero na de suyu trabajo, pirmi le ta mira maga gente que ta sufri y ta muri. “Este ya lang ba el vida?” ya pregunta le. Despues un dia, ya puede ele le cuanto literatura que base na Biblia que ya hace el maga Testigo de Jehova y ya incuntra le maga contestacion.

Ya explica si Geoff con el cosa le ta aprende na de suyu mujer y maga anak, y ya queda tambien sila interesao. El familia ya principia estudia con el Biblia que ya dale alegria na diila vida y ya ayuda kanila para mas enbuenamente puede usa con el diila tiempo. El diila estudiada na Biblia ya dale tambien kanila un bonito esperanza de vida hasta para cuando que tiene proposito na un mundo que nuay sufrimiento.—Revelacion 21:3, 4.

El experiencia de Geoff ta hace acorda kanaton el maga palabra de Jesucristo cuando ya habla le: “Alegre aquellos quien ta pensa el diila espiritual necesidad.” (Mateo 5:3, NWT) Preparao ba tu dale tiempo para na de tuyu espiritual necesidad? Ese el de con todo buen manera que puede tu usa con el de tuyu tiempo.