Cosa el de tuyu vida cuando bata pa tu?

Ya nace yo na Italy del 1943. Ya engranda yo junto na de mio maga hermano y hermana na un diutay barrio donde un siembrador y carpintero el de mio tata. Ya hace kanamon engranda el diamon mayores como maga devoto Catolico.

Porque tu quierre queda padre?

Cuando bata yo, quierre-quierre yo oi con el maga padre na iglesia. Ta gusta yo oi con el maga misa y con el maga ritual que ta hace sila. Poreso, quierre gayot yo queda padre. Cuando 13 año yo, ya lleva conmigo el de mio nana na un escuela para na maga hombre para queda padre.

Ya estudia ba ustedes con el Biblia?

Nuay. Cuando 15 año yo, el uno del de mio maga maestro ya dale conmigo un copia del Evangelio—el historia del vida y ministerio de Jesus—y ya le yo con ese libro manada beses. Cuando 18 yo, ya anda yo na Rome para estudia na maga universidad que bajo na control del papa. Ya estudia yo Latin, Greek, history, philosophy, psychology y theology. Maskin ta le kame con el maga versiculo na Biblia y ta oi con el lehida de este na maga sermon cada Domingo, gendeh kame ta estudia con el Biblia.

Ya queda tu un rector. Ya enseña ba tambien tu?

El de mio trabajo amo organiza o mira con el maga actividad na seminario. Pero, ya enseña tambien yo na maga clase acerca na maga ley del Second Vatican Council.

Porque tu ya principia man duda con el iglesia?

Tiene tres razon. Envuelto el iglesia na politica. Acabar, ta consinti el iglesia con el mal conducta del maga padre y del maga gente quien ta atende misa. Y tiene cuanto enseñanza del Catolico que dol gendeh justo. Por ejemplo, paquemodo puede queda posible que el Dios de amor ta castiga con el maga gente hasta para cuando despues del muerte? Mas pa, quierre ba gayot el Dios que repiti kita manada beses con el diaton rezo usando el rosario? *

Cosa tu ya hace?

Llurando yo ya reza con Dios para pidi guia. Ya cumpra tambien yo un copia de Jerusalem Bible de Catolico que nuevo lang ya produci na lengguaje Italian y ya principia le con este. Despues, un Domingo aga mientras ta hace yo bitay el de mio sotana despues del misa, tiene dos hombre quien ya anda na seminario. Ya manda sila conoce que maga Testigo de Jehova sila. Mas de un hora kame yan cuento acerca na Biblia y na cosa este ta habla acerca na identificacion del verdadero religion.

Cosa tu puede habla acerca kanila?

Ya gusta yo el diila conviccion y si paquemodo de facil para kanila que busca con el maga texto na Catolico edicion de Biblia. Na uliji, el otro Testigo que si Mario ya principia visita conmigo. Paciencioso ele y cada Sabado—ulan man o sol—ta visita gayot le conmigo na seminario cada alas nueve del aga.

Cosa el reaccion del otro maga padre?

Ya invita yo kanila na diamon estudiada del Biblia pero gendeh sila interesao. Pero iyo, ya gusta gayot yo quel. Manada bonito cosas yo ya aprende, igual si porque ta permiti el Dios con el maldad y sufrimiento—un cosa que ya dura ya yo ta pensa.

Ya pricura ba el maga lider del iglesia sangga contigo para estudia con el Biblia?

Del 1975, manada beses yo ya visita na Rome para explica si cosa yo ta pensa. Ya pricura sila cambia con el de mio pensamiento pero nuay ni uno kanila el ya usa con el Biblia. Na uliji, del Enero 9, 1976, ya escribi yo na Rome para manda sabe que gendeh mas yo un Catolico. Dos dia despues, ya sale yo na seminario y ya munta un tren para atende con el miting del maga Testigo de Jehova por primer vez. Un asemblea quel donde manada congregacion el ta atende. El cosa yo ya experiencia otro gayot na cosa yo yan anad! El cada Testigo tiene Biblia y ta sigui sila na diila Biblia mientras ta discuti el maga speaker con el diferente maga topico.

Cosa el reaccion del de tuyu familia?

Manada kanila el ya queda bien rabiao. Pero, ya sabe yo que el uno del de mio maga hermano ta estudia junto na maga Testigo na Lombardy, un region na norte del Italy. Ya anda yo con ele y el maga Testigo alla ya ayuda conmigo para incuntra trabajo y un lugar onde esta. Na ese mismo año, ya bautiza conmigo como un Testigo de Jehova.

Ya arripinti ba tu?

Nuay gayot! Ya sinti yo que deverasan ya yo cerca con Dios cay el cosa yo sabe acerca con ele amo base na Biblia y gendeh na filosofia o tradicion del iglesia. Y ta puede ya yo ahora enseña con otro con conviccion y sinceridad.