SI COSA TA HABLA EL MAGA GENTE

Manada gente el ta mira con el juego de sen como un cosa que gendeh peligroso basta legal este. Ta usa con el cuanto sen que estaba na cuanto juego de sen, igual na loto, para ayuda na maga gente.

SI COSA TA HABLA EL BIBLIA

El Biblia nuay menciona con el palabra “juego de sen.” Pero, ta dale este maga principio que ta revela si cosa ta sinti el Dios acerca na juego de sen.

El idea de juego de sen amo que ganá con el sen que ya hace perde el otro na juego. Y este idea contra na aviso del Biblia que “tene cuidao con todo clase de ambrentadas.” (Lucas 12:15, El Nuevo Testamento na Chavacano) Manada gente el ta hace con este por causa na hambrientadas. Na lugar onde ta juga maga juego de sen, ta habla con el maga gente si cosa el jackpot pero gendeh ta habla kanila si paquemodo de diutay el chansa que ganá sila ciendo sabe sila que el maga gente conforme gasta manada sen para lang ganá mas grande cantidad de sen. En vez de ayuda con el un persona para gendeh queda hambriento, el maga juego de sen ta enseña con el gente que tene sen na facil manera.

El maga gente ta juga juego de sen cay canalla sila. Quierre sila ganá el sen que ya hace perde el otro na juego. Pero, el Biblia ta anima con el un persona que ‘no busca el de suyu interes lang, sino el interes del los demas.’ (1 Corinto 10:24) Y el uno del Diez Mandamiento ta habla: “No desea con el . . . maskin cosa que tiene de tuyu projimo.” (Exodo 20:17) Si el un gente quierre ganá, dol aquel quierre tambien le que perde el sen del otro.

Ya habla tambien el Biblia que no creé na maga supersticion y na suerte. Na Israel de antes, tiene cuanto quien nuay fe con Dios y ya principia “pone mesa para na dios de Suerte.” Aceptable ba con Dios el diila devocion para na “dios de Suerte”? Gendeh, ya habla le kanila: “Ya continua ustedes hace si cosa el malo na de mio ojos, y ya iscuji ustedes el cosa que gendeh conmigo ta hace alegre.”—Isaias 65:11, 12.

Deveras, na cuanto parte del mundo, ta usa el maga gobierno con el cuanto sen estaba na maga juego de sen para paga con el educacion, puede ayuda na economia y na otro pa programa. Pero, el manera si paquemodo ya usa con ese maga pondo gendeh ta cambia si paquemodo ya obtene con ese sen—por medio na maga actividad que ta anima con el maga gente queda hambriento, canalla y tene sen maskin nuay sila hace esfuerzo.

“No desea con el . . . maskin cosa que tiene de tuyu projimo.”​—Exodo 20:17.

SI COSA TA HABLA EL BIBLIA

El Biblia ya dale aviso que “aquellos quien quiere queda rico ta cai na tentacion; ta queda sila cugido na trampa de todo clase de deseo loco y peligroso, que ta hace con el maga gente queda estropiao y destrozao.” (1 Timoteo 6:9) Mucho maga gente ta juga juego de sen cay hambriento sila y el pagka-hambriento ta causa grabe peligro poreso el Biblia claro ya habla que debe kita evita con este.—Efeso 5:3.

El Biblia ta habla que el amor na sen amo “el raiz de todo maga cosa-cosa malo” y el juego de sen puede causa contigo para ama con el sen cay ta promete este que puede tu tene sen maskin gendeh tu hace esfuerzo. El deseo que tene manada sen puede queda bien fuerte que hay causa sobra lingasa y puede destroza con el fe con Dios. Poreso, el Biblia ya compara con aquellos quien ta ama con el sen na maga gente quien “ya hace iri el diila corazon con mucho irida.”—1 Timoteo 6:10.

Si hambriento tu, gendeh tu contento na cosa tu tiene y gendeh tu alegre. “El quien ta ama con el plata gendeh queda satisfechao na plata y el ta ama con el riqueza gendeh queda satisfechao na de suyu incuntrada.”—Eclesiastes 5:10.

Millones del quien ya pruba juga juego de sen el ya queda addict na ese juego. Bien calayat este problema que gane na United States lang, millones el quien yan addict con este asegun na cuanto report.

El un proverbio ya habla: “El herencia que ya obtene por medio na hambrientadas gendeh queda bendicion na uliji.” (Proverbio 20:21) El cuanto ya tene debe o gane yan bankrupt y ya perde el diila trabajo, matrimonio y maga amigo o amiga. Si aplica el un persona con el maga principio na Biblia, puede se con ele ayuda para evita con el maga negativo efecto que puede lleva el juego de sen na vida y na alegria.

“Aquellos quien quiere queda rico ta cai na tentacion; ta queda sila cugido na trampa de todo clase de deseo loco y peligroso, que ta hace con el maga gente queda estropiao y destrozao.”​—1 Timoteo 6:9.